Revākhāṇḍa (revised text) · Chapter 129
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe bhṛkuṭeśvaratīrthamāhātmyavarṇanaṃ nāmāṣṭāviṃśatyuttaraśatatamo 'dhyāyaḥ ||
RKV adhyāya 129
śrīmārkaṇḍeya uvāca:
tato gacchen mahīpāla brahmatīrthamanuttamam /
anyeṣāṃ caiva tīrthānāṃ parātparataraṃ mahat
tatra tīrthe suraśreṣṭho brahmā lokapitāmahaḥ /
caturṇāmapi varṇānāṃ narmadātaṭamāśritaḥ
vācikaṃ mānasaṃ pāpaṃ karmajaṃ yatpurākṛtam /
tatkṣālayati deveśo darśanād eva pātakam
śrutismṛtyuditānyeva tatra snātvā dvijarṣabhāḥ /
prāyaścittāni kurvanti teṣāṃ vāsastriviṣṭape
ye punaḥ śāstramutsṛjya kāmalobhaprapīḍitāḥ /
prāyaścittaṃ vadiṣyanti te vai nirayagāminaḥ
snātvādau pātakī brahmannatvā tu kīrtayed agham /
tasya tannaśyate kṣipraṃ tamaḥ sūryodaye yathā
tatra tīrthe tu yaḥ snātvā pūjayet pitṛdevatāḥ /
agniṣṭomasya yajñasya sa labhet phalamuttamam
tatra tīrthe tu yad dānaṃ brahmoddiśya prayacchati /
tadakṣayaphalaṃ sarvamityevaṃ śaṅkaro 'bravīt
gāyatrīsāramātro 'pi tatra yaḥ kriyate japaḥ /
ṛgyajuḥsāmasahitaḥ sa bhavennātra saṃśayaḥ
tatra tīrthe tu yo bhaktyā tyajeddehaṃ sudustyajam /
anivartikā gatistasya brahmalokān na saṃśayaḥ
yāvadasthīni tiṣṭhanti brahmatīrthe ca dehinām /
tāvad varṣasahasrāṇi devaloke mahīyate
avatīrṇastato loke brahmajño jāyate kule /
uttamaḥ sarvavarṇānāṃ devānāmiva devatā
vidyāsthānāni sarvāṇi vetti vedāṅgapāragaḥ /
jāyate pūjito loke rājabhiḥ sa na saṃśayaḥ
putrapautrasamopetaḥ sarvavyādhivivarjitaḥ /
jīvedvarṣaśataṃ sāgraṃ brahmatīrthaprabhāvataḥ
etatpuṇyaṃ pāpaharaṃ tīrthaṃ jñānavatāṃ varam /
ye paśyanti mahātmāno hyamṛtatvaṃ prayānti te
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0