Revākhāṇḍa (revised text) · Chapter 128
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe agnitīrthamāhātmyavarṇanaṃ nāma saptaviṃśatyuttaraśatatamo 'dhyāyaḥ ||
RKV adhyāya 128
mārkaṇḍeya uvāca:
tato gacchettu rājendra bhṛkuṭeśvaram uttamam /
yatra siddho mahābhāgo bhṛguḥ paramakopanaḥ
tena varṣaśataṃ sāgraṃ tapaścīrṇaṃ purānagha /
putrārthaṃ varayāmāsa putraṃ putravatāṃ varaḥ
varo datto mahābhāga devenāndhakaghātinā /
tatra tīrthe tu yaḥ snātvā pūjayet parameśvaram
agniṣṭomasya yajñasya phalamaṣṭaguṇaṃ labhet /
bhṛkuṭeśaṃ tu yaḥ kaścid ghṛtena madhunā saha
putrārthī snāpayed bhaktyā sa labhet putramīpsitam /
tatra tīrthe tu yaḥ snātvā dadyād viprāya kāñcanam
godānaṃ vā mahīṃ vāpi tasya puṇyaphalaṃ śṛṇu
sasamudraguhā tena saśailavanakānanā /
dattā pṛthvī na sandehas tena sarvā nṛpottama
tena dānena sa svarge krīḍayitvā yathāsukham /
martye bhavati rājendro brāhmaṇo vā supūjitaḥ
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0