Revākhāṇḍa (revised text) · Chapter 119
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe indratīrthamāhātmyavarṇanaṃ nāmāṣṭādaśottaraśatatamo 'dhyāyaḥ ||
RKV adhyāya 119
śrīmārkaṇḍeya uvāca:
tato gacchettu rājendra kahloḍītīrtham uttamam /
revāyāścottare kūle sarvapāpavināśanam
hitārthaṃ sarvabhūtānām ṛṣibhiḥ sthāpitaṃ purā /
tapasā tu samuddhṛtya narmadāyāṃ mahāmbhasi
snātvā tu kapilātīrthe kapilāṃ yaḥ prayacchati /
śrutvā cākhyānakaṃ divyaṃ brāhmaṇāñchṛṇu yatphalam
sarveṣāmeva dānānāṃ kapilādānamuttamam /
brāhmaṇānveṣitaṃ pūrvamṛṣidevasamāgame
sadyaḥ prasūtāṃ kapilāṃ śobhanāṃ yaḥ prayacchati /
sopavāso jitakrodhastasya puṇyaphalaṃ śṛṇu
sasamudraguhā tena saśailavanakānanā /
dattā caiva mahābāho pṛthivī nātra saṃśayaḥ
vācikaṃ mānasaṃ pāpaṃ karmaṇā yatpurā kṛtam /
naśyate kapilāṃ dattvā saptajanmārjitaṃ nṛpa
bhūmidānaṃ dhanaṃ dhānyaṃ hastyaśvakanakādikam /
kapilādānasyaikasya kalāṃ nārhanti ṣoḍaśīm
tatra tīrthe naraḥ snātvā kapilāṃ yaḥ prayacchati /
mṛto viṣṇupuraṃ yāti gīyamāno 'psarogaṇaiḥ
yāvanti tasyā romāṇi savatsāyāstu bhārata /
tāvadvarṣasahasrāṇi sa svarge krīḍate ciram
tato 'vakīrṇakālena tviha mānuṣyatāṃ gataḥ /
dhanadhānyasamopeto jāyate vipule kule
vedavidyā vratasnātaḥ sarvaśāstraviśāradaḥ /
vyādhiśokavinirmukto jīvecca śaradāṃ śatam
etatte sarvamākhyātaṃ kalhoḍītīrtham uttamam /
yatkṛtvā sarvapāpebhyo mucyate nātra saṃśayaḥ
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0