Revākhāṇḍa (revised text) · Chapter 112
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe skandatīrthamāhātmyavarṇanaṃ nāmaikādaśottaraśatatamo 'dhyāyaḥ ||
RKV adhyāya 112
śrīmārkaṇḍeya uvāca:
tato gacchettu rājendra tīrthamāṅgirasasya tu /
uttare narmadākūle sarvapāpavināśanam
purāsīdaṅgirānāma brāhmaṇo vedapāragaḥ /
putrahetor yugasyādau cacāra vipulaṃ tapaḥ
nityaṃ triṣavaṇasnāyī japandevaṃ sanātanam /
pūjayaṃśca mahādevaṃ kṛcchracāndrāyaṇādibhiḥ
dvādaśābde tataḥ pūrṇe tutoṣa parameśvaraḥ /
vareṇa chandayāmāsa dvijam āṅgirasaṃ varam
vavre sa tu mahādevaṃ putraṃ putravatāṃ varam /
vedavidyāvratasnātaṃ sarvaśāstraviśāradam
devānāṃ mantriṇaṃ rājan sarvalokeṣu pūjitam /
brahmalakṣmyāḥ sadāvāsam akṣayaṃ cāvyayaṃ sutam
tathābhilaṣitaḥ putraḥ sarvavidyāviśāradaḥ /
bhaviṣyati na sandehaścaivamuktvā yayau haraḥ
varair aṅgirasaścāpi bṛhaspatirajāyata /
yathābhilaṣitaḥ putro vedavedāṅgapāragaḥ
jāte putre'ṅgirās tatra sthāpayāmāsa śaṅkaram /
hṛṣṭatuṣṭamanā bhūtvā jagāmottaraparvatam
tatra cāṅgirase tīrthe yaḥ snātvā pūjayecchivam /
sarvapāpavinirmukto rudralokaṃ sa gacchati
aputro labhate putramadhano dhanamāpnuyāt /
icchate yaśca yaṃ kāmaṃ sa taṃ labhati mānavaḥ
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0