Rasaratnākara · Chapter 3.4

RRĀ, 3, 4
samyak siddhamatāntaraiḥ samucitaiḥ satsaṃpradāyaiḥ śubhaiḥ khyātair gandhakajāraṇādivividhairyogaiḥ susiddhaiḥ kramāt /
yaddṛṣṭaṃ sulabhaṃ suvarṇakaraṇaṃ tārasya saṃraṃjanāt /
satyaṃ sajjanarakṣaṇāturatayā saṃtanyate tattvataḥ

{gandhapiṣṭi}
daśaniṣkaṃ śuddhasūtaṃ niṣkaikaṃ śuddhagandhakam /
stokaṃ stokaṃ kṣipetkhalve mardakena śanaiḥ śanaiḥ

kuṭṭanājjāyate piṣṭiḥ seyaṃ gandhakapiṣṭikā /
{svarṇapiṣṭi}
bhāgatrayaṃ śuddhasūtaṃ bhāgaikaṃ śuddhahāṭakam

amlena mardayedyāmaṃ khyāteyaṃ svarṇapiṣṭikā /
{sulfur:: ṣaḍguṇajāraṇa}
gandhapiṣṭiṃ hemapiṣṭyā samayā veṣṭayedbahiḥ

vastreṇa veṣṭayed gāḍhaṃ sūtākhye lohasaṃpuṭe /
nidhāya poṭalīmadhye sarvatulyaṃ ca gandhakam

kṣiptvā nirodhayetsaṃdhiṃ mṛlloṇena ca rodhayet /
bhūdharākhye puṭe paktvā jīrṇe gandhaṃ punaḥ kṣipet

ṣaḍguṇe gandhake jīrṇe śanairvastraṃ nivārayet /
punaḥ punaḥ samaṃ gandhaṃ dattvā jāryaṃ śanaiḥ śanaiḥ

niḥśeṣaṃ naiva kartavyaṃ pramādādyāti sūtakaḥ /
evaṃ śataguṇe jīrṇe yantrāduddhṛtya piṣṭikām

{vedha:: silver => gold}
tattulye saṃpuṭe hemni ruddhvā bāhye ca veṣṭayet /
kumārīdravapiṣṭena kācenāṅgulamātrakam

tadbahiṣṭaṅkaṇenaiva loṇamṛttikayā tataḥ /
veṣṭyam aṅgulitailena sūryatāpena śoṣitam

koṣṭhīyantre gataṃ dhāmyaṃ vaṅkanāle dṛḍhāgninā /
tatkhoṭaṃ jāyate divyaṃ sindūrāruṇasaṃnibham

tena vedhastu tārasya drutasya śatabhāgataḥ /
deyaḥ saṃjāyate svarṇaṃ siddhayoga udāhṛtaḥ

{gandhapiṣṭi}
gandhakaṃ śodhitaṃ cūrṇyaṃ saptadhā kanakadravaiḥ /
bhāvayedātape tadvannārīṇāṃ rajasā punaḥ

tad gandhaṃ karṣamekaṃ tu narapittena lolitam /
palaikaṃ pāradaṃ śuddham ātape kharpare kṣipet

tatpṛṣṭhe lolitaṃ gandhaṃ kṣiptvāṅguṣṭhena mardayet /
piṣṭikā jāyate divyā sarvakāmaphalapradā

{gandhapiṣṭi}
tilaparṇīrasenaiva saptadhā śuddhagaṃdhakam /
bhāvayetpeṣayettacca chāyāśuṣkaṃ punaḥ punaḥ

śuddhaṃ sūtaṃ palaikaṃ ca mūṣāyāṃ hi nidhāpayet /
śuddhasvarṇasya gulikāṃ niṣkamātrāṃ vinikṣipet

tāṃ mūṣāṃ vālukāyantre sthāpayetpūrvagandhakam /
truṭiśastruṭiśo dattvā cullyāṃ mandāgninā pacet

pādāṃśe gandhake jīrṇe jāyate gandhapiṣṭikā /
gandhapiṣṭiḥ pṛthaggrāhyā svarṇasya gulikāṃ vinā

{gandhapiṣṭi}
chāyāyāṃ gandhakaṃ bhāvyaṃ śatadhā markaṭīdravaiḥ /
gharme mṛtkharpare sūtaṃ kṣipet kiṃcic ca gandhakam

markaṭīdravasaṃyuktaṃ jīrṇe gandhe dravaṃ punaḥ /
deyaṃ pādāṃśakaṃ yāvadgandhakaṃ sadravaṃ kramāt

jāyate piṣṭikā divyā sarvakāmaphalapradā /
{gandhapiṣṭi}
gandhakaṃ sūkṣmacūrṇaṃ tu kāñjikaiḥ kṣālayettridhā

tridhā jambīrajairdrāvairhaṃsapādyāśca saptadhā /
karpūraṃ ca pṛthagbhāvyaṃ śvetādrikarṇikādravaiḥ

ātape trīṇi vārāṇi tato jāraṇamārabhet /
dviguñjāmātrakarpūrair yantragarbhaṃ pralepayet

tadgarbhe bhāvitaṃ gandhaṃ sārdhaniṣkaṃ pradāpayet /
śuddhasūtaṃ palaṃ cārdhaṃ karpūraṃ pūrvatulyakam

pūrvatulyaṃ tato gandhaṃ krameṇātha pradāpayet /
śvetādrikarṇikāmūlaṃ gomūtreṇa prapeṣayet

ācchādya tena kalkena śarāveṇa nirudhya ca /
pācayennalikāyantre dinānte taṃ samuddharet

karpūrādi punardeyaṃ tadvajjāryaṃ dināvadhi /
ityevaṃ tu punaḥ kuryājjāyate gandhapiṣṭikā

{gandhapiṣṭi}
pāradasya palaikaṃ tu karṣaikaṃ śuddhagandhakam /
snigdhakhalve karāṅgulyā devadālīdrave plutam

mardayedātape tīvre jāyate gandhapiṣṭikā /
{gandhapiṣṭi}
śuddhasūtaṃ palaikaṃ tu karṣārdhaṃ śuddhagandhakam

nidhāya tāmrakhalve tu tadadho'gniṃ mṛduṃ kṣipet /
karāṅguṣṭhena saṃmardya yāmādbhavati piṣṭikā

{gandhapiṣṭi:: stambhana}
tiktakośātakībījaṃ cāṇḍālīkanda eva ca /
nārīstanyena sampiṣya lepayed gandhapiṣṭikām

nikṣipetsūraṇe kande kṣīrakandodare tathā /
vandhyākarkoṭakīvajrakande vā kuḍuhuñjike

mukhaṃ kandasya majjābhī ruddhvā kandaṃ mṛdā lipet /
puṭayedbhūdhare yantre karīṣāgnau dināvadhi

ūrdhvādhaḥ parivartena yathā kando na dahyate /
tataḥ piṣṭīṃ samuddhṛtya stambhitā jāyate dhruvam

{gandhapiṣṭi:: stambhita:: jāraṇa}
athāsyā jāraṇā kāryā stanākhye lohasaṃpuṭe /
nidhāya jārayedgandhaṃ tulyaṃ tulyaṃ tu bhūdhare

jīrṇe gandhe punardeyaṃ yantre jāryaṃ ca pūrvavat /
evaṃ śataguṇaṃ jāryaṃ jīrṇe yantrātsamuddharet

sarvāsāṃ gandhapiṣṭīnāṃ rañjanaṃ syāttu jāraṇāt /
{gandhapiṣṭi:: māraṇa}
divyauṣadhagaṇadrāvaiḥ piṣṭiḥ khalve vimardayet /
dinānte golakaṃ kṛtvā bījair divyagaṇodbhavaiḥ

lepayedvajramūṣāṃ tu golaṃ tatra nirodhayet /
dinaikaṃ bhūdhare pacyādūrdhvādhaḥ parivartayet

samuddhṛtya punarmardyaṃ pūrvadrāvaistu pūrvavat /
puṭāntaṃ kārayed evaṃ daśavāraṃ punaḥ punaḥ

{gandhapiṣṭi:: vedha:: silver => gold}
mriyate nātra saṃdeho gandhapiṣṭyās tataḥ punaḥ /
mṛtapiṣṭipalaikaṃ tu peṣayedvāsakadravaiḥ

tatkalkairnāgapatraṃ tu lepayitvā palāṣṭakam /
chāyāśuṣkaṃ nyasetpiṇḍe vāsāpatrasamudbhave

taṃ piṇḍaṃ saṃpuṭe ruddhvā puṭedāraṇyakotpalaiḥ /
samuddhṛtya punardeyā palaikā mṛtapiṣṭikā

vāsādrāvairdinaṃ mardyaṃ taṃ golaṃ veṣṭayetpunaḥ /
vāsāpatrotthapiṇḍena ruddhvā gajapuṭe pacet

evaṃ punaḥ punaḥ kuryādraktavarṇaṃ mṛtaṃ bhavet /
tannāgaṃ palamātraṃ tu yāmaikaṃ vāsakadravaiḥ

marditaṃ lepayettena tāmrapatraṃ palāṣṭakam /
dinaikaṃ pācanāyantre pācayenmriyate dhruvam

ṣoḍaśāṃśena tenaiva tāre vedhaṃ pradāpayet /
tattāraṃ jāyate svarṇaṃ jāmbūnadasamaprabham

yayā kayā gandhapiṣṭyā stambhanaṃ jāraṇaṃ vinā /
pūrvavatkramayogena divyaṃ bhavati kāñcanam

{vedha:: silver => gold}
arjunasya tvaco bhasma vāsābhasma samaṃ samam /
gṛhakanyādravairmardyaṃ dinaikaṃ tena lepayet

kaṇṭavedhyaṃ nāgapatraṃ ruddhvā laghupuṭe pacet /
uddhṛtya mardayedyāmaṃ pūrvadrāvaiḥ sabhasmakaiḥ

ruddhvā gajapuṭe paktvā svāṅgaśītaṃ samuddharet /
evaṃ śatapuṭaiḥ pācyaṃ bhasma drāvaiśca mardayet

tenaiva tārapatrāṇi madhuliptāni lepayet /
ruddhvā gajapuṭe paktvā punarliptvā puṭe pacet

ityevaṃ tu tridhā kuryāttāramāyāti kāñcanam /
{vedha:: silver => gold}
lohapātre drute nāge cūrṇitaṃ rasakaṃ samam

kṣiptvā cullyāṃ pacedyāmaṃ cālyaṃ pāṣāṇamuṣṭinā /
yāmānte hiṅgulaṃ kṣepyaṃ cūrṇitaṃ nāgatulyakam

susūkṣmaṃ mardayettāvat dṛḍhaṃ pāṣāṇamuṣṭinā /
paceccaṇḍāgninā tāvaddinānāmekaviṃśatim

jāyate kuṅkumābhaṃ tu tāraṃ tenaiva vedhayet /
catuḥṣaṣṭitamāṃśena divyaṃ bhavati kāñcanam

{vedha:: silver => gold}
drāvayetkharpare nāgaṃ pādāṃśaṃ tatra nikṣipet /
ciñcāśvatthatvacaḥ kṣāraṃ lohadarvyā vimardayet

yāmānte tatsamuddhṛtya vajrīkṣīrairdināvadhi /
mardyaṃ khalve samuddhṛtya mṛdbhāṇḍāntarnirodhayet

pacedrātrau caturyāmaṃ cullyāṃ caṇḍāgninā punaḥ /
uddhṛtya mardayetkhalve vajrīkṣīrairdināvadhi

rātrau pācyaṃ divā mardyaṃ yāvat ṣaṇmāsameva ca /
yathā na patate tasmiñjalaṃ dhūlistu rakṣayet /
sahasrāṃśe dhṛte śare vedhe datte sukāñcanam

{vedha:: silver => gold}
śilāgandhakakarpūrakuṅkumaṃ mardayetsamam /
jambīrotthadravairyāmaṃ tatsamaṃ nāgapatrakam

liptvā liptvā puṭaiḥ pacyād yāvacchaṣṭipuṭī bhavet

tannāgaṃ vidyudābhāsaṃ jāyate tena vedhayet /
catuḥṣaṣṭitamāṃśena tāramāyāti kāñcanam /
{vedha:: silver => gold}
tīkṣṇaṃ śulbaṃ nāgavaṅgau drutaṃ nāgaṃ tu tutthakam /
cūrṇitaṃ bhāgamekaikaṃ dvau bhāgau hemamākṣikam

vajramūṣāgataṃ ruddhvā dhmātaṃ khoṭaṃ sucūrṇitam /
siddhacūrṇena saṃyuktaṃ tāramāyāti kāñcanam

{tārāriṣṭa}
śulbacūrṇaṃ tīkṣṇacūrṇaṃ tulyaṃ ruddhvā dhamet haṭhāt /
tatkhoṭaṃ siddhacūrṇaṃ ca mardyaṃ pācyaṃ ca pūrvavat

tenaiva madhuyuktena tārapatrāṇi lepayet /
ruddhvā gajapuṭe pacyādevaṃ vāratrayaṃ kṛte

pītavarṇaṃ bhavettattu tārāriṣṭaṃ nigadyate /
{tārāriṣṭa}
vaṅganāgasamaṃ kāntamathavā tāmranāgakam

mākṣikaṃ śulbatīkṣṇaṃ vā śulbanāgaṃ savaṅgakam /
ete yogāstu catvāraḥ pṛthak cūrṇāni kārayet

pṛthagdhmātāni khoṭāni siddhacūrṇayutāni ca /
mardanādipuṭāntāni tārāriṣṭakarāṇi vai

pūrvavallepayogena pratyekena tu kārayet /
tārāriṣṭasya tasyaiva svarṇīkaraṇamucyate

{vedha:: silver => gold}
śuddhavaikrāntabhāgaikaṃ kiṃvā vaikrāntasattvakam /
nāgacūrṇaṃ ca bhāgaikamandhamūṣāgataṃ dhamet

siddhacūrṇena saṃyuktaṃ mardanādipuṭāntakam /
kartavyaṃ pūrvavatprājñaistāmādāya vimardayet

madhunā yāmamātraṃ tu tena lepaṃ tu kārayet /
śatāṃśena tu patrāṇāṃ tārāriṣṭasya yatnataḥ

ruddhvā gajapuṭe pacyād divyaṃ bhavati kāñcanam /
{vedha:: silver => gold}
mūlapatraphalaṃ bilvācchākavṛkṣācca tattrayam /
śigrumūlaṃ rasaṃ caitanmardayetkiṃśukadravaiḥ

anena nāgacūrṇaṃ tu mardyaṃ mardyaṃ puṭe pacet /
evaṃ śatapuṭaiḥ pakvaṃ jāyate padmarāgavat

tenaiva tārapatrāṇi madhuliptāni lepayet /
ruddhvā gajapuṭe pacyādevaṃ vāratraye kṛte

tattāraṃ jāyate divyaṃ jāmbūnadasamaprabham /
{vedha:: silver => gold}
rājāvartaṃ hiṃgulakaṃ kaṃkuṣṭhaṃ ca pravālakam

pratyekaṃ karṣamātraṃ syādrasakasya palaṃ tathā /
sūkṣmacūrṇaṃ kṛtaṃ sarvaṃ siddhacūrṇena saṃyutam

andhamūṣāgataṃ dhmātaṃ mardanādipuṭāntakam /
pūrvavat kārayetpaścānmadhunā saha miśrayet

tārāriṣṭasya patrāṇi lepayitvā puṭe pacet /
evaṃ vāratrayaṃ kuryād divyaṃ bhavati kāñcanam

{vedha:: silver => gold (with tārāriṣṭa)}
mākṣikaṃ daradaṃ tutthaṃ rājāvartaṃ pravālakam /
etāni samabhāgāni dvibhāgaṃ rasakaṃ bhavet

meṣīkṣīreṇa tatsarvaṃ dinamekaṃ vimardayet /
chāyāśuṣkaṃ tu tatkṛtvā tulyāṃśaṃ mitrapañcakam

dattvā tu mardayet khalve tārāriṣṭaṃ tu lepayet /
prathamaṃ samakalkena ruddhvā gajapuṭe pacet

ardhakalkena lepyātha pādakalkena vā punaḥ /
evaṃ puṭatrayaṃ deyaṃ divyaṃ bhavati kāñcanam

{vedha:: silver => gold (with tārāriṣṭa)}
rasakaṃ nāgasaṃtulyaṃ ruddhvā khoṭaṃ prakārayet /
siddhacūrṇena saṃyuktaṃ puṭāntaṃ pūrvavat kṛtam

tenaiva madhunoktena tārāriṣṭaṃ pralepayet /
ruddhvā ruddhvā puṭe pacyāt tridhā bhavati kāñcanam

{vedha:: silver => gold (with lead)}
gaṃdhakaṃ tālakaṃ śulvaṃ samahiṃgulapeṣitam /
mātuluṅgadravaiḥ sārdhaṃ nāgapatrāṇi tena vai

liptvā ruddhvā puṭe pacyātpunastenaiva mardayet /
evaṃ ṣaṣṭipuṭaiḥ pakvo nāgaḥ syātkuṅkumaprabhaḥ

tena tārasya patrāṇi madhuliptāni lepayet /
ruddhvā tīvrāgninā dhāmyamevaṃ vāratraye kṛte

tattāraṃ jāyate divyaṃ jāmbūnadasamaprabham /
{vedha:: lead => gold}
lāṅgalī girikarṇyagniḥ karavīrajamūlakam /
sauvīraṃ ṭaṅkaṇaṃ stanyaiḥ piṣṭvā piṇḍaṃ prakalpayet

caturdhā vimalā śuddhā teṣvekā palamātrakam /
dvipalaṃ pāradaṃ śuddhaṃ śuddhaṃ hemapalatrayam

yāmaikaṃ mardayet sarvaṃ pūrvapiṇḍodare kṣipet /
tatpiṇḍaṃ vajramūṣāyāṃ ruddhvā dhāmyaṃ haṭhāgninā /
tatkhoṭaṃ śatamāṃśena drutaṃ nāgaṃ tu vedhayet

tannāgena śatāṃśena drutaṃ śulbaṃ tu vedhayet /
tatkhoṭaṃ śatamāṃśena drutaṃ nāgaṃ tu vedhayet /
jāyate kanakaṃ divyaṃ devābharaṇamuttamam

{vedha:: silver => gold}
pāradaṃ kuṅkumaṃ gandhaṃ strīpuṣpeṇa dināvadhi /
mardayettulyatulyāṃśaṃ tena kalkena sādhayet

śuddhāni tārapatrāṇi liptvā ruddhvā dhameddhaṭhāt /
patraṃ kṛtvā punarlepyaṃ ruddhvā dhāmyaṃ ca pūrvavat

ityevaṃ saptadhā kuryāllepanaṃ drāvaṇaṃ kramāt /
tatastasyaiva patrāṇi tena kalkena lepayet

udghāṭaṃ drāvayettaṃ ca drutamājye vinikṣipet /
saptāhaṃ dhārayettasmindivyaṃ bhavati kāñcanam

{vedha:: silver => gold}
kuṅkumaṃ gandhakaṃ sūtaṃ mañjiṣṭhā tatsamaṃ samam /
śākavṛkṣaphaladrāvaiḥ supakvair mardayed dinam

tena tārasya patrāṇi praliptāni viśoṣayet /
āvartya ḍhālayettasmiṃstena kalkena bhāvitam

evaṃ punaḥ punaḥ kuryādekaviṃśativārakam /
tattāraṃ jāyate svarṇaṃ samyagdvādaśavarṇakam

{vedha:: silver => gold}
pāradaṃ kāntapāṣāṇaṃ gandhakaṃ raktacandanam /
rudantīdravasaṃyuktaṃ dinamekaṃ vimardayet

tena tārasya patrāṇi praviliptāni śoṣayet /
dhāmayedandhamūṣāyāmevaṃ kuryāttrisaptadhā

śākavṛkṣasya mūlaṃ tu bhāvyaṃ tatpatrajairdravaiḥ /
raktāśvamārajaiścaiva pṛthagbhāvyaṃ tridhā tridhā

anena pūrvatārasya drutasya prativāpanam /
dāpayetsaptavāraṃ tu divyaṃ bhavati kāñcanam

{siddhacūrṇa}
gandhakaṃ gandhamūlī ca ravidugdhena mardayet /
mṛṇmaye saṃpuṭe ruddhvā māsaṃ bhūmau vinikṣipet

uddhṛtya tena tārasya patralepaṃ tu kārayet /
pūrvatāre drute deyaḥ prativāpaḥ punaḥ punaḥ

saptaviṃśatime vāpe tattāraṃ kāñcanaṃ bhavet /
{siddhacūrṇa}
śuddhasūtasamaṃ gandhaṃ khalve mardyaṃ dināvadhi

jāyate kajjalī śreṣṭhā sarvakāryakarī śubhā /
kajjalī ṭaṅkaṇaṃ tāpyaṃ pratyekaṃ karṣamātrakam

karṣadvayaṃ śuddhagandhaṃ yāmaṃ sarvaṃ vicūrṇayet /
siddhacūrṇamidaṃ khyātaṃ bhavet pādādikaṃ palam

yatra yatra milatyetattatra cūrṇaṃ palaṃ palam /
yojayellohavādeṣu tadidānīṃ nigadyate

{vedha, rañjana:: silver => gold}
tāmratīkṣṇārakāntānāṃ cūrṇam ekasya cāharet /
yathā lohe palaikaṃ tu siddhacūrṇena saṃyutam

vajramūṣāgataṃ ruddhvā dhmātaṃ khoṭaṃ bhavettu tat /
tulyairbhūnāgajīvairvā gandhakena samena vā

mardayenmātuluṅgāmlaiḥ pūrvakhoṭaṃ dināvadhi /
tatpiṇḍaṃ pakvamūṣāyāṃ ruddhvā gajapuṭe pacet

āraṇyopalakairevaṃ puṭaṃ dadyāccaturdaśa /
indragopakasaṃkāśaṃ jāyate pūjayecchivam

kṣaudrayuktena tenaiva tārapatrāṇi lepayet /
ruddhvā dhametpuṭedvātha evaṃ vāratraye kṛte

jāyate kanakaṃ divyaṃ siddho'yaṃ tārarañjakaḥ /
ityevaṃ sarvayogānāmatratyānāṃ pṛthak pṛthak

siddhacūrṇena saṃyuktaṃ kartavyaṃ vidhinā budhaiḥ /
{vedha:: silver => gold}
śulbaṃ nāgaṃ samaṃ dhāmyaṃ samaṃ vā śulvavaṅgakam

āvartate tu taccūrṇaṃ siddhacūrṇena pūrvavat /
śulbaṃ nāgaṃ vaṅgaghoṣaṃ yatheṣṭaikaṃ vicūrṇayet

tatsamaṃ tīkṣṇacūrṇaṃ ca tvandhamūṣāgataṃ dhamet /
etatkhoṭaṃ vicūrṇyātha siddhacūrṇena saṃyutam

pūrvavat kramayogena tāramāyāti kāñcanam /
{??}
śulbasya bhāgatritayamekaikaṃ nāgavaṅgayoḥ

samāvartya vicūrṇyātha siddhacūrṇena pūrvavat /
nāgamekaṃ dvayaṃ śulbaṃ tacchulvenaiva pannagam

ruddhvā dhmātaṃ ca taccūrṇya siddhacūrṇena pūrvavat /
siddhacūrṇatrayo bhāgā bhāgaikaṃ hemagairikam

ruddhvā dhmātaṃ punaścūrṇya siddhacūrṇena pūrvavat /
{vedha:: silver => gold}
gandhakena hataṃ śulvaṃ mākṣikaṃ ca samaṃ samam

haṃsapāccitrakadrāvair dinamekaṃ vimardayet /
tenaiva tārapatrāṇi liptvā ruddhvā puṭe pacet

tam uddhṛtya dhametpaścātkṛtvā patrāṇi lepayet /
pūrvakalkena ruddhvātha puṭaṃ dattvā samuddharet

ityevaṃ daśadhā kuryāttāramāyāti kāñcanam /
{silver:: rañjana}
tīkṣṇaṃ dvayaṃ trayaṃ ghoṣamāraṃ bhāgacatuṣṭayam

navabhāgaṃ tāmracūrṇaṃ nāgaṃ ca navabhāgakam /
aṃdhamūṣāgataṃ dhmātaṃ tat khoṭaṃ sūkṣmacūrṇitam

siddhacūrṇena saṃyuktaṃ pūrvavat tārarañjanam /
{??}
mṛtanāgasamaṃ tutthaṃ dvābhyāṃ tulyaṃ ca mākṣikam

kevalaṃ mṛtanāgaṃ vā siddhacūrṇena pūrvavat /
{vedha:: silver => gold}
nāgābhraṃ vātha vaṅgābhramandhayitvā dhameddhaṭhāt

tatkhoṭaṃ sūkṣmacūrṇaṃ tu siddhacūrṇena saṃyutam /
pūrvavat kramayogena tāramāyāti kāñcanam

{vedha:: silver => gold}
tīkṣṇaṃ śulbaṃ nāgavaṅgaṃ mṛtaṃ nāgaṃ tu tutthakam /
cūrṇitaṃ bhāgamekaikaṃ dvau bhāgau hemamākṣikam

vajramūṣāgataṃ ruddhvā dhmātaṃ khoṭaṃ sucūrṇitam /
siddhacūrṇena saṃyuktaṃ tāramāyāti kāñcanam

{tārāriṣṭa:: production}
śulbacūrṇaṃ tīkṣṇacūrṇaṃ tulyaṃ ruddhvā dhameddhaṭhāt /
tat khoṭaṃ siddhacūrṇaṃ tu mardyaṃ pācyaṃ ca pūrvavat

tenaiva madhuyuktena tārapatrāṇi lepayet /
ruddhvā gajapuṭe pacyādevaṃ vāratraye kṛte

pītavarṇaṃ bhavettattu tārāriṣṭaṃ nigadyate /
{tārāriṣṭa:: production}
vaṅgaṃ nāgaṃ samaṃ kāntamathavā tāmranāgakam

mākṣikaṃ śulbatīkṣṇaṃ ca śulvaṃ nāgaṃ savaṅgakam /
ete yogāstu catvāraḥ pṛthak cūrṇāni kārayet

pṛthagdhmātāni khoṭāni siddhacūrṇayutāni ca /
mardanādipuṭāntāni tārāriṣṭakarāṇi vai

{vedha:: silver => gold (with tārāriṣṭa)}
pūrvavallepayogena pratyekena tu kārayet /
tārāriṣṭasya tasyaiva svarṇīkaraṇamucyate

{vedha:: silver => gold (with tārāriṣṭa)}
śuddhavaikrāntabhāgaikaṃ kiṃvā vaikrāntasattvakam /
nāgacūrṇaṃ tu bhāgaikamandhamūṣāgataṃ dhamet

siddhacūrṇena saṃyuktaṃ mardanādipuṭāntakam /
kartavyaṃ pūrvavatprājñaistamādāya vimardayet

madhunā yāmamātraṃ tu tena lepaṃ tu kārayet /
śatāṃśena tu patrāṇāṃ tārāriṣṭasya yatnataḥ

ruddhvā gajapuṭe paktvā divyaṃ bhavati kāñcanam /
{vedha:: silver => gold (with tārāriṣṭa)}
rājāvartaṃ hiṅgulakaṃ kaṃkuṣṭhaṃ ca pravālakam

pratyekaṃ karṣamātraṃ syādrasakasya palaṃ tathā /
sūkṣmacūrṇaṃ kṛtaṃ sarvaṃ siddhacūrṇena saṃyutam

andhamūṣāgataṃ dhmātaṃ mardanādipuṭāntakam /
pūrvavat kārayetpaścānmadhunā saha miśrayet

tārāriṣṭasya patrāṇi lepayitvā puṭe pacet /
evaṃ vāratrayaṃ kuryāddivyaṃ bhavati kāñcanam

{vedha:: silver => gold (with tārāriṣṭa)}
mākṣikaṃ daradaṃ tutthaṃ rājāvartaṃ pravālakam /
etāni samabhāgāni dvibhāgo rasako bhavet

meṣīkṣīreṇa tatsarvaṃ dinamekaṃ vimardayet /
chāyāśuṣkaṃ tu tatkṛtvā tulyāṃśaṃ mitrapaṃcakam

dattvā tu mardayet khalve tārāriṣṭaṃ tu lepayet /
prathamaṃ samakalkena ruddhvā gajapuṭe pacet

ardhakalkena lepyo'tha pādakalkena vai punaḥ /
evaṃ puṭatraye datte divyaṃ bhavati kāṃcanam

{vedha:: silver => gold (with tārāriṣṭa)}
rasakaṃ nāgasaṃtulyaṃ ruddhvā khoṭaṃ prakārayet /
siddhacūrṇena saṃyuktaṃ puṭānte pūrvavatkṛtam

tenaiva madhunāktena tārāriṣṭaṃ pralepayet /
ruddhvā ruddhvā puṭaiḥ pacyāttridhā bhavati kāñcanam

{vedha:: silver => gold (with copper)}
śulbapatrāṇi taptāni āranāle vinikṣipet /
punaḥ pācyaṃ punaḥ kṣepyaṃ yāvattatraiva śīryate

tatpatramāranālasthaṃ kṣālayedāranālakaiḥ /
pādāṃśaṃ ṭaṅkaṇaṃ dattvā yāmamamlena peṣayet

ruddhvā laghupuṭaiḥ pacyādevaṃ śatapuṭaiḥ pacet /
madhvājyaṃ ṭaṅkaṇaḥ paścātpacyādruddhvā dhameddhaṭhāt

tacchulbaṃ kālikāhīnaṃ jāyate śukatuṇḍavat /
tacchulbaṃ triguṇaṃ tāre nirvāpyaṃ kāñcanaṃ bhavet

{vedha:: silver => gold}
śigrupatrasamaiḥ patrairmūlaiḥ pravālasaṃnibhaiḥ /
jñeyā divyauṣadhī siddhā nāmnā sā kīṭamāriṇī

taddravaiḥ pārado mardyo yāvatsaptadināvadhi /
tenaiva tārapatrāṇi praliptāni viśoṣayet

ruddhvā gajapuṭe pacyādevaṃ kuryāttrisaptadhā /
jāyate kanakaṃ divyaṃ purā nāgārjunoditam

{vedha:: silver => gold}
śuddhasūtasamā rājī sūtapādaṃ ca gandhakam /
mṛdbhāṇḍe pācayeccullyāṃ dhattūradravasaṃyutam

vāsākāṣṭhena tanmardyaṃ dravo deyaḥ punaḥ punaḥ /
evaṃ dinatrayaṃ kuryājjāyate bhasmasūtakaḥ

tanmardyaṃ mātuluṅgāmlairdinamekaṃ tu tena vai /
catuḥṣaṣṭitamāṃśena tārapatrāṇi lepayet

ruddhvā gajapuṭe pacyādevaṃ vāratraye kṛte /
tattāraṃ jāyate svarṇaṃ mahādevena bhāṣitam

tārasya rañjanamidaṃ sukhabhogahetuṃ kṛtvā vivekamatibhirbhuvane janānām /
deyaṃ sadā sakalakīrtiśubhāptisiddhyai no cedvane vasatireva parā hi dhanyā