Rasaratnākara · Chapter 2.8

RRĀ, 2, 8
śrīśaile dehasiddhiḥ prabhavati sahasā vṛkṣamṛtkandatoyais tacchāstraṃ śambhunoktaṃ pragahanam akhilaṃ vīkṣitaṃ yattu sāram /
vyāhṛtyānekayuktyā sakalasukhakaraṃ dṛṣṭasiddhaṃ tu yadyattadvakṣye sādhakānāmanubhavapathagaṃ bhuktaye muktaye ca

{Fels mit guggulu bei Mallikārjuna}
mallikārjunadevasya purato gajasaṃnibhā /
śilā tiṣṭhati yā rātrau sravate gugguluṃ sadā

pālāśacāṭunā grāhyaṃ kṣipedalābupātrake /
tadguggulusamaṃ gandhaṃ niṣkaikaṃ bhakṣayetsadā

māsānmṛtyujarāṃ hanti jīvedācandratārakam /
tadgugguluṃ drute tāmre koṭibhāgena yojayet

tadbhavetkanakaṃ divyaṃ jāmbūnadasamaprabham /
{Glocke bei Ghaṇṭāsiddheśvara}
vāmato mallināthasya ghaṇṭāsiddheśvaraḥ sthitaḥ

taddvāre vidyate kuṇḍaṃ tatra ghaṇṭā vilambate /
rātrau kṛṣṇacaturdaśyāṃ sopavāsais tribhirjanaiḥ

kartavyaṃ sādhanaṃ tatra nirvikalpairanidritaiḥ /
ekastu snāpayeddevaṃ jalamekastu vāhayet

ekastu vādayedghaṇṭāmavicchinnaṃ niśāvadhi /
tatastuṣṭo bhavecchambhuḥ khecaratvaṃ prayacchati

ghaṇṭāsiddheśvarasyaiva dakṣiṇe krośamātrake /
nikhaneddṛśyate tatra mṛdgorocanasaṃnibhā

sitākṣīraiḥ pibetkarṣaṃ saptāhādamaro bhavet /
{candrodaka im W von Mallinātha}
candrodakaṃ prasiddhaṃ vai mallināthasya paścime

sthitaṃ vaiśākhamāse tu pūrṇamāsyāṃ susādhayet /
sādhako nirvikalpena sthitvā tasya samīpataḥ

rātrau japaṃ prakurvāṇastattoyaṃ cārdharātrake /
spraṣṭuṃ candro yadā gacchettadā kṣipraṃ karāñjalim

kṛtvā tiṣṭhedyadā yāti tajjalaṃ tatkṣaṇātpibet /
vajrakāyo bhavedvīro jīvedācandratārakam

{Tamarindenbaum im Osten von Śrīśaila}
śrīśailapūrvadvāre tu devo'sti tripurāntakaḥ /
devasyottaradigbhāge ciñcāvṛkṣaḥ samīpataḥ

vidyate tasya mūle tu bhairavo dṛśyate svayam /
tasyāgre nikhanedbhūmiṃ puruṣasya pramāṇataḥ

dṛśyate taptakuṇḍaṃ tu nīlavarṇajalānvitam /
ciñcāvṛkṣasya pattrāṇi samyagvastreṇa bandhayet

tasmin kuṇḍe vinikṣipya tāni mīnā bhavanti vai /
saṃgṛhya tasya kāṣṭhena pacetteṣāṃ vivarjayet

kaṇṭakāni śiraḥ pucchaṃ śeṣaṃ bhakṣeta sādhakaḥ /
kṣaṇaṃ mūrchā bhavettena prabuddho jāyate svayam

chidraṃ paśyati medinyāṃ jīvedvarṣāyutaṃ naraḥ /
tripurāntakadevasya paścime gavyūtidvaye

maṇipalliriti grāmastasya paścimato giriḥ /
tasya paścimadigbhāge kapāṭaṃ dṛśyate śubham

pūrvābhimukhaḥ praviśettato gacchecca dakṣiṇam /
daśadhanvantaraṃ yāvaddṛśyante jvalanaprabhāḥ

āmrākārāḥ supāṣāṇā grāhyā vastreṇa bandhayet /
raktavarṇaṃ bhavedvastraṃ kṣīramadhye kṣipettataḥ

tatkṣīraṃ jāyate raktaṃ tatkṣīraṃ sādhakaḥ pibet /
saptāhādvajrakāyaḥ syājjīveccandrārkatārakam

tripurāntakadevasya uttare kokilābilam /
vikhyātaṃ sarvalokeṣu kṛtvā vamanarecanam

sādhakaḥ praviśettatra daśadhanvantarāvadhi /
pāṣāṇāḥ kokilākārāstiṣṭhanti tāṃs tu cāharet

teṣāṃ pṛṣṭhe tilāḥ kṣiptāḥ sphuṭantyeva hi tatkṣaṇāt /
ityevaṃ pratyayaṃ dṛṣṭvā tāṃś ca ghṛṣṭvā parasparam

kṣīramadhye kṣipettān vai kṣīraṃ kṛṣṇaṃ prajāyate /
ākaṇṭhāntaṃ pibettattu divyakāvyo bhavennaraḥ

valīpalitanirmukto jīvedbrahmadinatrayam /
chidraṃ paśyati medinyāṃ vāyuvego mahābalaḥ

tripurāntakadevasya pūrvadigyojanāntare /
devaḥ svargapurī nāma vidyate tatra vai khanet

devāgre bhūmikāṃ jānumātrāṃ tatra phalā iva /
nirgacchanti tu pāṣāṇāḥ kharasparśā bhavanti vai

tripurāntakadevasya paścime yojanārdhake /
vidyate hi biladvāraṃ tanmadhye dhanuṣāṃ trayam

gacchetkharjūravṛkṣo vai dṛśyate kṛṣṇavarṇakaḥ /
tatphalānāṃ rasaṃ pītvā mūrchā saṃjāyate kṣaṇam

tataḥ saṃjāyate siddho jīveccandrārkatārakam /
śrīśaile dakṣiṇe dvāre jāleśvarasureśvarau

devau prasiddhau vidyete nikhanettatra bhūmikām /
pāṣāṇāḥ śrīphalākārā niryānti sparśabhedakāḥ

devo rāmeśvarastatra vidyate tasya saṃnidhau /
rudrākṣākārapāṣāṇāḥ kharasparśā bhavanti te

jyotiḥsiddhavaṭe vṛkṣe ekapādena tiṣṭhati /
āvartadevako nāma tatsamīpe tu paścime

vidyate parvatastatra pāṣāṇāstālakopamāḥ /
ādāya tān dhamettīvraṃ divyaṃ bhavati kāñcanam

tatraiva dakṣiṇadvāre devaḥ syātkuṇḍaleśvaraḥ /
tatsamīpe khanedbhūmiṃ jānumātrāṃ tato haret

pāṣāṇāḥ śrīphalākārā raktāśca sparśavedhakāḥ /
puruṣeśvaradevasya kuṇḍamasti samīpataḥ

guñjā ca riṭhṭhakaś caiva dvau vṛkṣau tatra tiṣṭhataḥ /
tayoḥ pattrāṇi saṃbhakṣya tatkṣaṇādamaro bhavet

tathā hastiśilā tatra tasyā dakṣiṇataḥ khanet /
hastamātraṃ tataḥ paśyejjambūphalasamākṛtiḥ

śilā tatra samākhyātā sparśagrāhyā prayatnataḥ /
nāmnā hastiśiraḥ khyātaṃ saiva hastiśilā bhavet

tasyā dakṣiṇadigbhāge yojanaikena tiṣṭhati /
chāyāchattraṃ prasiddhaṃ tacchivarūpaṃ śivoditam

śatahastapramāṇaṃ tu tatkṣetraṃ parivartulam /
yo 'sau gacchati tasyādho nāsau kenāpi dṛśyate

rudratulyo bhavetsiddhaḥ krīḍate bhuvanatraye /
athavā sādhayeddūrātkhyātaṃ siddhyaṣṭakaṃ tu yat

kāntābhraṃ kāñcanaṃ sūtaṃ mardyaṃ kramaguṇottaram /
tadgolaṃ veṣṭayel lohais tribhir yatnātkrameṇa vai

vastre baddhvā tu tadvastraṃ vaṃśāgre bandhayeddṛḍham /
mantrayetkālīmantreṇa chāyāchattre niveśayet

tadvaṃśāgraṃ kṣaṇaikena jāyate guṭikā tu tām /
sādhako dhārayedvaktre khecaratvapradāyikām

tālakaṃ kunaṭīṃ tadvadvaṃśe baddhvā niveśayet /
tābhyāmañjitanetro yo nidhiṃ paśyati bhūgatam

vaṃśe baddhvā kṣipetkhaḍgaṃ pūrvamantreṇa mantritam /
tatkhaḍgaṃ dhārayeddhaste trailokyavijayī bhavet

vastre gorocanaṃ baddhvā vaṃśasthaṃ tatra veśayet /
tenaiva tilakaṃ kuryāddṛṣṭvā mohayate jagat

srotoñjanaṃ kajjalaṃ ca kṣiptvā tatraiva pūrvavat /
tena cāñjitanetro yo devairapi na dṛśyate

pādukāṃ tena yogena kṣiptvā padbhyāṃ tu dhārayet /
yatrecchā tatra tatraiva gantā bhavati tatkṣaṇāt

tadvadraktapaṭaṃ tatra kṣiptvā saṃveṣṭya sādhakaḥ /
adṛśyo jāyate samyakpaṭe mukte tu dṛśyate

kāntābhraṃ kāñcanaṃ sūtaṃ kṛtvā golaṃ tu veśayet /
vaṃśāgrasthaṃ mantrayuktaṃ sparśavedhī bhavettu tat

śrīśaile paścime dvāre nāmnā brahmeśvareśvaraḥ /
talliṅgaṃ sparśamityāhurdurgā tatraiva tādṛśī

navamaṃ yattu sopānaṃ nadyāṃ tattādṛśaṃ sthitam /
devasya tiṣṭhati dvāre mudgavarṇaṃ vilokayet

brahmeśvarasya nairṛtye saṃsthitaṃ tintiṇīvanam /
tasmin vane sthitaṃ kuṇḍaṃ tatra tiṣṭhati caṇḍikā

ekapādena ciñcādhas tadvṛkṣāt pattramāharet /
baddhvā vastre kṣipetkuṇḍe snānaṃ tatra samācaret

snānānte poṭalī grāhyā sarve matsyā bhavanti te /
tatkāṣṭhaiḥ pācayettāni kaṇṭhaṃ pucchaṃ śirastyajet

bhāgaṃ devāya saṃkalpya dvitīyamatitherbhavet /
tṛtīyaṃ sādhako bhuktvā kṣaṇaṃ bhavati mūrchitaḥ

tatkṣaṇājjāyate siddhaśchidrāṃ paśyati medinīm /
ajarāmaratāṃ yāti na bādhyastridaśairapi

alampurottare bhāge grāmaḥ syādbhīmapādukaḥ /
tasya grāmasya pārśve tu hastamātraṃ khanedbhuvam

pāṣāṇāḥ sarpavadvakrā grāhyāḥ sparśā bhavanti te /
yogeśvarīti vikhyātā devatā yā tv alampure

devyā hy agre guhā ramyā tanmadhye nikhanedbhuvam /
pāṣāṇā bhekasaṃkāśā grāhyā mārjāraviṣṭhayā

miśrīkṛtya kṣipedvaṅge tadvaṅgaṃ tāratāṃ vrajet /
madhvājyasahitān bhakṣetpāṣāṇāṃstānvicakṣaṇaḥ

śrīśailasyottaradvāre maheśo nāma devatā /
bhramarāmraḥ sthitastatra tasya pakvaphalāni vai

sphoṭayettatra niryānti bhramarā jīvasaṃyutāḥ /
ityevaṃ pratyayaṃ jñātvā bhramarāṃstān parityajet

phalāni pācayetkṣīraiḥ pibetkṣīraṃ yatheṣṭakam /
kiṃcinmūrchā bhavettena tato bodhe pibetpunaḥ

evaṃ kuryāttrisaptāhaṃ vajrakāyo bhavennaraḥ /
valīpalitanirmukto jīvedācandratārakam

sarvavāṅmayavettā ca vāyuvegī bhavennaraḥ /
tenaivāmraphalaikena varjitabhramareṇa ca /
sahasrapalavaṅgaṃ tu drāvitaṃ stambhayeddhruvam

kṣepāttāramavāpnoti satyamīśvarabhāṣitam /
tatphalaṃ chidritaṃ kṛtvā utpātya bhramaraṃ tataḥ

śuddhapāradakarṣaikaṃ tattulyaṃ kṛṣṇamabhrakam /
kṣiptvā tasminmukhaṃ ruddhvā limpenmṛdgomayena ca

chāyāśuṣkaṃ tadāmrotthaiḥ kvāthairyāmaṃ vipācayet /
svabhāvaśītalā grāhyā guṭikā phalamadhyagā

mukhasthā khecaraṃ datte adṛśyatvaṃ mahābalā /
kvāthe vākpatitulyaḥ syājjīvedācandratārakam

tāraṃ tāmraṃ bhujaṃgaṃ vā koṭibhāgena vedhayet /
kṛṣṇābhraṃ śuddhasūtaṃ ca pūrvavattatphale kṣipet

limpenmṛdgomayaistadvadāraṇyotpalakaiḥ puṭet /
svabhāvaśītalaṃ grāhyaṃ tadrasaṃ madhusarpiṣā

guñjāmātraṃ sadā khādenmāsādbālo bhavennaraḥ /
jīvedbrahmadinaṃ vīro navanāgabalānvitaḥ

vidyate lokavikhyātaḥ pūjyaḥ pañcopacārakaiḥ /
oṃ huṃ phaṭkāramantreṇa nirvikalpena sādhakaiḥ

vīkṣya paścimadigbhāge hy antarikṣe ca tatkṣaṇāt /
paśyeddivyavimānāni jāyate pratyayo mahān

tataḥ paścimadigbhāge gacchennadīṃ taretsudhīḥ /
gahvaraṃ dṛśyate tatra praviśetpaścimamukham

yojanatritayaṃ gacchedekākī nirvikalpakaḥ /
pañcayojanavistīrṇaṃ dṛśyate kadalīvanam

tasya madhye'tivistīrṇaṃ jalapūrṇaṃ sarovaram /
siṃhāsanaṃ tu tanmadhye śuddhasphaṭikasaṃnibham

taṃ dṛṣṭvā daṇḍavadbhūmau nipatenmantramuccaret /
oṃ hrīṃ vidyāvāgīśvarādhipataye hrīṃ oṃ svāhā /
snānaṃ kṛtvā prayatnena lakṣamekaṃ japedanu /
yatheṣṭaṃ bhojanaṃ kṛtvā kandamūlaphalādikam

tataḥ siṃhāsanasyordhvaṃ śuddhasphaṭikasaṃnibhaḥ /
caturbhujastrinetraśca dṛśyate parameśvaraḥ

stotramantrairnamaskāraiḥ praṇipatya punaḥ punaḥ /
varaṃ datte yatheṣṭaṃ vai sādhakasya na saṃśayaḥ

śatamāyatanaṃ tatra kūpānāṃ ca śataṃ nava /
tāvatsaṃkhyāstathārāmā nandanākhyavanāni ca

tathā navaśataṃ vāpyo vidyante kadalīvane /
biladvārāṇi tāvanti kalpavṛkṣāstathaiva ca

tatraiva maukalī nāma yakṣiṇī prakaṭā sthitā /
sā vakti bhojanaṃ dehi yadīcchasi samīhitam

tatastasya pravaktavyaṃ dāsyāmi parameśvari /
kṣīrānnaṃ vā phalāhāraṃ tadagre dāpayet sudhīḥ

sā vakti mama putro'yaṃ kṣaṇaṃ vakṣasi dhāraya /
yadā na muñcase bhūmau tadā siddhyaṣṭakaṃ tava

dāsye'haṃ nātra saṃdeho bhojanānte'thavā punaḥ /
tyakte karomi saṃhāraṃ tasmādyatnena rakṣaya

ityevaṃ sādhako vīraḥ kuryātsiddhimavāpnuyāt /
gaccheduttaradigbhāge tatsaro yojanārdhakam

tatrāsti puṣpasampūrṇaṃ divyākhyaṃ nandanaṃ vanam /
puṣpāṇāṃ ghrāṇamātreṇa kṣutpipāsā na vidyate

athavā bhakṣayettasmātphalamekaṃ yathācitam /
tena bhakṣitamātreṇa vajrakāyo bhavennaraḥ

saro dakṣiṇadigbhāgaṃ gacchedyojanapādakam /
tatra dāḍimasampūrṇaṃ dṛśyate nandanaṃ vanam

tatphalaṃ bhakṣayetsiddho jīvedyugasahasrakam /
tatsaraḥpūrvadigbhāge gacchetkrośārdhamātrakam

tatra dhātrīphalaiḥ pūrṇaṃ śyāmalaṃ nandanaṃ vanam /
phalāni bhakṣayettāni jīvetkalpaśatatrayam

tatsaraḥpaścimabhāge gacchedyojanamātrakam /
tatra bilvaphalaiḥ pūrṇaṃ dṛśyate nandanaṃ vanam

tatphalaṃ bhakṣayedvīro jīveccandrārkatārakam /
tannandanavane ramye liṅgaṃ syānnīlavarṇakam

praviśeduttaradvāre tatra nāgo mahābalaḥ /
ugraḥ saptaphaṇākāro dṛśyate 'tibhayaṃkaraḥ

tasya kuryānnamaskāraṃ hruṃ hruṃ kuryātsamuddharet /
tadāsau vadate vāṇīmadṛśyatvaṃ dadāmi te

gaccha tvaṃ paścimadvāre tatrāsti divyakanyakā /
gacchettatra mahāvīraḥ sādhako mantramuccaran

hāraṃ dāsyati sā tuṣṭā na praveśaṃ prayacchati /
taṃ hāraṃ dhārayetkaṇṭhe sākṣādvāgīśvaro bhavet

tatastu dakṣiṇaṃ dvāraṃ gacchettatra bhayaṃkaram /
muktakeśaṃ vakranetraṃ gadāhastaṃ digambaram

nīlavarṇaṃ kṣetrapālaṃ dṛṣṭvā mantraṃ samuccaret /
ha hā he he haṃ hruṃkāraṃ phaṭ huṃ svāhāntameva ca

anena mantrapāṭhena kṣetrapālaḥ prasīdati /
dadāti khecarīṃ siddhiṃ na praveśaṃ kadācana

tatastu pūrvadigbhāge dvāraṃ tatra gaṇeśvaraḥ /
dṛśyate pūjayettaṃ vai sādhakaḥ praviśettataḥ

dṛśyate divyacāpaṃ tu tathā liṅgaṃ manoharam /
pūjayecchivamantreṇa rakāreṇaiva nānyathā

tatastatra japaṃ kuryādahorātramupoṣitaḥ /
pratyakṣo jāyate rudro varaṃ datte yathepsitam

ityevamādayaḥ santi siddhayaḥ kadalīvane /
akṣarairlikhitaṃ dvāre tatra padmāvatībilam

sarasaḥ pūrvadigbhāge yojanaikena tiṣṭhati /
vamanaṃ recanaṃ kṛtvā praviśettatra sādhakaḥ

dhanvantaraṃ śataṃ yāvadgacchettatra mṛdaṅgam /
dṛṣṭvā taṃ vādayedvīraḥ samyakpadmāvatī tataḥ

āgatya cāmṛtaṃ datte yatpānādamaro bhavet /
tatastaṃ prārthayatyeva āgaccha mama mandiram

divyaṃ kanyāpañcaśataṃ parivāreṇa svīkuru /
ahaṃ patnī bhaviṣyāmi yāvadbrahmā ca jīvati

tadante paramaṃ sthānaṃ gacchāmo nātra saṃśayaḥ /
kadambeśvaradevastu āgneyyāṃ diśi vidyate

tasya pūrvataṭākāgre sthito vṛkṣaḥ kadambakaḥ /
tasya pattrāṇi saṃgṛhya kaṭutailena lepayet

tadvṛkṣabījatailairvā tatkāṣṭhaiḥ pācayet sudhīḥ /
matsyā bhavanti te sarve tāmrapātre vinikṣipet

kaṇṭhapucchaśirovarjaṃ madhvājyābhyāṃ tu bhakṣayet /
tatkṣaṇājjāyate siddho rudratulyo mahābalaḥ

nadīsthāne ca yo vṛkṣo vidyate kuṇḍaleśvare /
pūrvavatkramayogena siddhiḥ syānnātra saṃśayaḥ

kapoteśvaradevasyottare puṣpagiriḥ sthitaḥ /
tasya kuryāt prayatnena trivāraṃ tu pradakṣiṇam

tataḥ śiraḥ samāruhya khecaratvaṃ labhennaraḥ /
tatpūrvottaradigbhāge chelikādvārasthitam

uttarābhimukhaṃ tatra praviśeddhanuṣāṃ trayam /
mūṣikākārapāṣāṇāstiṣṭhanti tān samāharet

takraiḥ piṣṭvā tadekaṃ tu pibenmūrchāmavāpnuyāt /
kṣaṇāduttiṣṭhate siddho jīvedbrahmadinatrayam

sa eva sarvalohānāṃ sparśavedhakaro bhavet /
ahorātroṣito bhūtvā devāgre siddhimāpnuyāt

kapoteśvaradevasya dakṣiṇe devatādvayam /
tanmadhye kaṭimātraṃ tu khanedgorocanopamāḥ

pāṣāṇāstān samādāya madhvājyābhyāṃ prapeṣayet /
tatpānājjāyate martyaḥ kalpāyur nātra saṃśayaḥ

kapoteśvaradevasya vāyavye hastamātrakam /
khanetpārāvataprakhyāḥ pāṣāṇāḥ sparśabhedakāḥ

tiṣṭhanti grāhayedekaṃ devatārādhane kṛte /
mallikārjunadevasya aiśānyāṃ bhṛgupātanam

vidyate tatsamīpasthaṃ kuṇḍaṃ tasmānmṛdāharet /
pañcagavyena sammiśrāṃ khadirāṅgārakairdhamet

nīlotpalasamaṃ lohaṃ patatyevātha secayet /
madhvājyābhyāṃ sutaptaṃ tatsaptavāraṃ punaḥ punaḥ

tadgolaṃ dhārayedvaktre viṣṇutulyo bhavennaraḥ /
bhṛgupātāt pūrvabhāge krośodadhikapāṭake

tasyāgre acchatailākhyaḥ parvato nāma viśrutaḥ /
tatpaścime biladvāraṃ tanmadhye dhanvapañcakam

gate tu dṛśyate kuṇḍaṃ raso lākṣārasaprabhaḥ /
alābupātre saṃgṛhya koṭivedhī bhavettu saḥ

{sparśavedha:: rock near a tempul}
mallikārjunadevasya pūrvato lokaviśrutaḥ /
prākāraścandraguptasya vidyate tatra mandiram

tasya pūrve sthitaścaityaścaityapūrve mahāśilā /
mudgavarṇā ca sā khyātā sparśavedhakarā tu sā

gajastatraiva vikhyātastamāruhya samāhitaḥ /
tasya pṛṣṭhāttṛṇaṃ grāhyaṃ tatsarvaṃ kanakaṃ bhavet

gajasya cottare pārśve jānumātraṃ khanedbhuvam /
jambūphalasamākārāḥ santi te sparśavedhakāḥ

gajasyādhaḥ khanedvātha jānumātraṃ labhettataḥ /
trikoṇaguṭikāṃ siddhāṃ lakṣavedhakarāṃ parām

śrīśailasya tu vāyavye tīrthaṃ devahradaḥ sthitam /
tatra kuṇḍe mudgavarṇāḥ pāṣāṇāḥ sparśavedhakāḥ

tatra kūrmopamaṃ liṅgaṃ sparśavedhakaraṃ param /
kṛttikāyāṃ supūrṇāyāṃ kṛtvā pūjāṃ samāharet

gavyūtidvayatastasmānnāmnā nīlavanaṃ smṛtam /
tatra liṅgaṃ nīlavarṇaṃ jalaṃ caiva tu tādṛśam

aśvābhrakākasadṛśāḥ pāṣāṇāḥ sparśavedhakāḥ /
santi devagṛhasyāntaḥ khanejjānvantarāddharet

śrīśailasya tu nairṛtye nāmnā guṇḍiprabhā sthitā /
tasyāgrādgartamṛdgrāhyā pītavarṇā puṭairdahet

tasmānniḥsarate hema sphuradrūpaṃ na saṃśayaḥ /
tatraiva bhramarāḥ syuśca pūrvavatphaladāyakāḥ

tathā tambīpure nāmni tīrthe ca vipule śubham /
sadāphalaṃ tu vikhyātaṃ pūrvavatsādhayet sudhīḥ

mahānandeśvaraṃ nāma śrīśailasya tu nairṛte /
tasya pūrvottare pārśve gacchedrājapathena tu

kālavarṇeśvaro nāma devastasyāgrakuṇḍakam /
indragopakasaṃkāśas tanmadhye vidyate rasaḥ

taptāni saptalohāni tatsekātkāñcanaṃ bhavet /
śrīśailasya tu īśāne devaḥ syātturaleśvaraḥ

tasyottare suvikhyāta umāparvata uttamaḥ /
tasya mūrdhni triśūlābhā darbhāstiṣṭhanti śobhanāḥ

tasyādhaḥ kaṭimātraṃ tu khātvā nīlāṃ mṛdaṃ haret /
tāṃ pacedakṣajaiḥ kāṣṭhairbhāgaṃ devāya kalpayet

atitheśca tathāgneśca bhāgaṃ bhāgaṃ prakalpayet /
bhāgamātmani bhuñjīta jīvetkalpāyutaṃ naraḥ

tatra koṭīśvaraṃ khyātamileśvarasamīpataḥ /
tasyāgre puṣpamātraṃ tu sparśavedhakaraṃ bhavet

acaleśaśca tatraiva sparśavedhakaraḥ paraḥ /
dakṣiṇe leśasya yojanaikena vidyate

amareśvaradevākhyastatra svarṇaśilā śubhā /
tasya pṛṣṭhe ca gomāṃsaṃ mahāmāṃsaṃ ca vā kṣipet

prajvālya badarīkāṣṭhaiḥ prātaḥ svarṇopamā tu sā /
dṛśyate rajasā strīṇāṃ bhāvitaṃ vastrakhaṇḍakam

tacchilāloḍitaṃ kuryādrakṣedalābupātrake /
tena saṃsparśamātreṇa lohaṃ bhavati hāṭakam

śrīśaile tatra tatraiva pāṣāṇāḥ piṇḍabhūsthitāḥ /
taccūrṇaṃ triphalāsārdhaṃ karṣaikaṃ bhakṣayetsadā

māsārdhaṃ tu jarāṃ hanti jīvedācandratārakam /
nairṛtye śailarājasya paṭāhakarṇa īśvaraḥ

tasya ceśānadigbhāge pañcaviṃśatidhanvake /
dvihastamātrordhvaśilā tatra hastadvayaṃ khanet

śrāvasampuṭasaṃkāśān pāṣāṇāṃstriṃśadāharet /
kṛtvā tānagnivarṇāṃśca siñcetkūṣmāṇḍajairdravaiḥ

tanmadhyānnavanītaṃ tu gṛhṇīyād devāya bhāgakam /
atitherbhāgaikaṃ tu bhāgaikaṃ bhakṣayedbudhaḥ

mūrchā bhaveddivārātraṃ prabuddho jāyate naraḥ /
jīvedvarṣāyutaṃ vīro valīpalitavarjitaḥ

tasya devasya sopānaṃ dvitīyaṃ sparśavedhakam /
tasya devasya pārśve tu pāṣāṇāḥ śvetapītakāḥ

sarvasparśā na saṃdeha ekameva samāharet /
tasya devasya pūrve tu kūpaḥ syānnātidūrataḥ

tanmadhye bhekasaṃkāśāḥ pāṣāṇāḥ sparśavedhāḥ /
uttare tasya devasya vikhyāto liṅgaparvataḥ

tasya cottarapārśve tu nadī syātpūrvavāhinī /
nadyāḥ paścimadigbhāge liṅgaṃ piṅgalavarṇakam

tatra śailodakaiḥ kuṇḍaṃ pūrṇaṃ syātkṣaṇavedhakam /
maheśāddakṣiṇe bhāge caṇḍikā yojanadvaye

piṇḍādevīti vikhyātā tasyā vāyavyakoṇataḥ /
kūpastiṣṭhati tanmadhye pāṣāṇā mudgavarṇakāḥ

tathā pathyānibhāścaiva sarve te sparśavedhakāḥ /
sparśanādatra sarveṣāṃ vedhayuktir vidhīyate

sthūlaścetpeṣayecchlakṣṇaṃ tena mūṣāṃ tu kārayet /
aṣṭalohāni tanmadhye samāvartyāni kārayet

tatsarvaṃ jāyate svarṇamevaṃ kuryādyathepsitam /
sūkṣmaścedaṣṭalohānāṃ drutānāṃ yatra kutracit

taṃ sarvaṃ nikṣipenmadhye sarvaṃ tatkāñcanaṃ bhavet /
mallikārjunavāyavye tīrthaṃ sarveśvaraṃ sthitam

tasya dakṣiṇadigbhāge jalamārge'rdhayojane /
gate ḍāṅgarikaṃ tatra dṛśyate tasya mūrdhani

dhātrīphalāni kṛṣṇāni vidyante tāni bhakṣayet /
yatheṣṭāni tu saptāhaṃ vajrakāyo bhavennaraḥ

valīpalitanirmukto jīvetkalpaśatatrayam /
tasmācca dakṣiṇe bhāge kākalerīmahānavam

tatrāsti stambhakadalī praviśettatra sādhakaḥ /
gacchetkrośārdhamātraṃ tu dṛśyate rasakuṇḍakam

gṛhītvālābupātre tu koṭivedhī bhavedrasaḥ /
tasmin vane mayūraḥ syānnīlavarṇaśilāmayaḥ

mukhāgre tasya kuṇḍaṃ tu dvādaśāṅgulanīlakam /
tanmadhye śuṣkavaṃśaṃ tu kṣiptvā syānnūtanaḥ kṣaṇāt

dine pattraṃ phalaṃ puṣpaṃ jāyate tasya nānyathā /
tatra pāradaprasthaikaṃ kṣiptvā tāvajjalaṃ haret

kṣaudratulyaṃ pibettaṃ vai tatkṣaṇānmūrchito bhavet /
muhūrtāllabdharājyaḥsyājjīvedyugasahasrakam

śailasyāgneyabhāge tu guṭikāsiddhakeśvaraḥ /
vidyate tasya purataḥ pañcahastāṃ khanedbhuvam

pāṣāṇā badarākārāḥ santi khegatidāyakāḥ /
ekameva samāhṛtya vaktre dhāryaḥ khagāmibhiḥ

śrīśaile sarvayogānām uktānāṃ vidhirucyate /
mantranyāsaṃ purā kṛtvā paścāllakṣaṃ japedanu

aghoraṃ tena vai śīghraṃ tattatsiddhimavāpnuyāt /
kṣetradevatāmāvāhayet /
tatra svapne devatā pratyakṣībhūya varaṃ dadāti /
evaṃ mantraparaiḥ suniścalatarair bhaktaiśca tatsādhakaiḥ śambhoḥ pūjanatatparaiḥ pratidinaṃ pūjāvidheḥ pālakaiḥ /
kāryaṃ śrīgirisādhanaṃ japaparair āmnāyapāraṃgatair no cetkleśakaraṃ parākṛtamaho vyarthaṃ bhavenniścitam