Scripture Library

Rasaratnākara · Chapter 2.7

2.7.1

RRĀ, 2, 7
vīryaṃ sthiraṃ yonimukheṣu yeṣāṃ sthūlaṃ dṛḍhaṃ dīrghatamaṃ ca liṅgam /
teṣāṃ pragalbhāḥ pramadāśca sarvā bhavanti tṛptāḥ surataprasaṅge

2.7.2

nāgavallīdaladrāvaiḥ saptāhaṃ śuddhapāradam /
mardayettaptakhalve tu kṣālayetkāñjikaistataḥ

2.7.3

tatkṣiped viṣakandasya garbhe niṣkacatuṣṭayam /
viṣeṇa tanmukhaṃ ruddhvā sthūlavārāhamāṃsake

2.7.4

piṇḍaṃ garbhe nirudhyātha mukhaṃ sūtreṇa sīvayet /
saṃdhyākāle baliṃ dattvā kukkuṭaṃ madirāyutam

2.7.5

tataś cullyāṃ lohapātre taile dhattūrasambhave /
taṃ viṃśatipale pacyātsapiṇḍaṃ mandavahninā

2.7.6

saṃdhyāmārabhya yatnena yāvatsūryodayaṃ tathā /
haṭhājjāgaraṇaṃ kuryādanyathā tanna sidhyati

2.7.7

prātaruddhṛtya guṭikāṃ kṣīrabhāṇḍe vinikṣipet /
tatkṣīraṃ śuṣyati kṣiprametatpratyayamadbhutam

2.7.8

dṛṣṭvā tāṃ dhārayedvaktre vīryastambhakarīṃ ratau /
kṣīraṃ pītvā ramedrāmāḥ kāmākulakalānvitāḥ

2.7.9

mukhāddhastaṃ yadā prāptā tadā vīryaṃ patatyalam /
brahmāṇḍaguṭikā nāma śoṣayantī mahodadhim

2.7.10

dagdhamaṅkollamūlaṃ tu karpūraṃ kuṅkumaṃ tathā /
rocanā sahadevī ca samaṃ sarvaṃ prapeṣayet

2.7.11

viṣamuṣṭikatailena liptaliṅgo hy anena vai /
naro nārīsahasraikaṃ gacchanvīryaṃ na muñcati

2.7.12

śvetārkatūlajāṃ vartiṃ kṛtvā sūkaramedasā /
yāvajjvalati dīpo'yaṃ tāvadvīryaṃ sthiraṃ nṛṇām

2.7.13

indravāruṇikāmūlaṃ puṣye nagnaḥ samuddharet /
tryūṣaṇaiśca gavāṃ kṣīraiḥ piṣṭvā kuryādvaṭīṃ dṛḍhām

2.7.14

chāyāśuṣkā sthitā vaktre vīryastambhakarī nṛṇām /
varamaṅkolatailena nābhilepo'pi vīryadhṛk

2.7.15

raktāpāmārgāmūlaṃ tu somavāre'bhimantrayet /
bhaume prāptaḥ samuddhṛtya bandhet kaṭyāṃ ca vīryadhṛk

2.7.16

caṭakānaṅkulītailaiḥ pādādhaḥ saṃpralepayet /
na muñcati naro vīryaṃ śayyāṃ pādena na spṛśet

2.7.17

ḍuṇḍubho nāma yaḥ sarpaḥ kṛṣṇavarṇastamāharet /
tasyāsthi dhārayetkaṭyāṃ naro vīryaṃ na muñcati

2.7.18

tanmukte muñcate vīryaṃ siddhayoga udāhṛtaḥ /
sahadevīyamūlaṃ tu tatsamaṃ padmakesaram

2.7.19

piṣṭvā madhvājyasaṃyukto lepo nābhau tu vīryadhṛk /
śvetasya kokilākṣasya bījaṃ mūlaṃ samāharet

2.7.20

piṣṭaṃ taṇḍulasambhūtaṃ badarīṇāṃ phalaṃ samam /
jalaiḥ piṣṭvā vaṭī dhāryā vīryastambhakarī mukhe

2.7.21

nāgavallīpayaḥpiṣṭaṃ lajjāmūlaṃ pralepayet /
tannābhau vīryadhṛk puṃsāṃ mūlaṃ vā tulasībhavam

2.7.22

mūlena śvetaguñjāyā vartiṃ kṛtvā pradīpayet /
dīpaṃ sūkaratailena vīryastambhakaraṃ nṛṇām

2.7.23

bījamīśvaraliṅgyās tu sūtaṃ vṛścikakaṇṭakam /
sarvaṃ pūgaphalasyāntaḥ kṣiptvā veṣṭyaṃ trilohakaiḥ

2.7.24

jihvopari sthite tasminnaro vīryaṃ na muñcati /
śleṣmātasya kuraṇṭasya bījaṃ phañjyāḥ samāharet

2.7.25

ajākṣīreṇa taṃ piṣṭvā karṣaṃ bhuktvā tu vīryadhṛk /
sūraṇaṃ tulasīmūlaṃ tāmbūlaiḥ saha bhakṣayet

2.7.26

na muñcati naro vīryaṃ karṣaikena pṛthakpṛthak /
nakhāsthīni samādāya mārjārasya sitasya vai

2.7.27

śvetāparājitāmūlaṃ nīlīmūlaṃ śmaśānajam /
sarvaṃ baddhvā kaṭau vīryaṃ cirakālaṃ na muñcati

2.7.28

bhūlatā sikthakaṃ tulyaṃ limpettailaiḥ kusumbhajaiḥ /
pādau vīryadharo bhūyātpadbhyāṃ śayyāṃ na saṃspṛśet

2.7.29

navanītena vā lepyaṃ caṭakāṇḍaṃ ca pūrvavat /
indravāruṇīmūlaṃ unmattājasya mūtrataḥ

2.7.30

bhāvayettena lepena naro vīryaṃ na muñcati /
dāḍimasya tvacaścūrṇaṃ phalaṃ bhallātakākṣayoḥ

2.7.31

piṣṭvā tatkaṭutailena lepaḥ syātpūrvavatphalam /
karpūraṃ ṭaṅkaṇaṃ sūtaṃ munipuṣparasaṃ madhu

2.7.32

mardayitvā limpettena liṅgaṃ yāvatsamantataḥ /
jalaiḥ prakṣālayelliṅgaṃ bhajedrāmāṃ yathocitām

2.7.33

vīryaṃ stambhayate puṃsāṃ yāmamātraṃ na saṃśayaḥ /
kṛṣṇadhattūratailena pāradaṃ gharṣayeddinam

2.7.34

trilohairveṣṭitaṃ baddhaṃ tatkaṭyāṃ vīryadhārakam /
svarṇaṃ vyomasattvaṃ tāraṃ tāmraṃ ca rocanam

2.7.35

bījaṃ vai śarapuṅkhāyāḥ kṛṣṇadhattūrabījakam /
sarvaṃ mardyaṃ vaṭakṣīraiḥ kuberākṣasya bījake

2.7.36

tatkṣiptvā dhārayedvaktre vīryastambhakaraṃ ciram /
kṛkalāsasya pucchāgraṃ mudrikākāratāṃ kṛtam

2.7.37

ūrṇanābhasya jālena veṣṭayitvātha dhārayet /
vāmahaste kaniṣṭhāyāṃ naro vīryaṃ na muñcati

2.7.38

sthalamīnaṃ samādāya śuṣkaṃ cūrṇena lepayet /
ulliptaṃ rakṣayetkiṃcidvaktre dhāryaśca vīryadhṛk

2.7.39

paścimasamudrasya taṭe amaracaṇḍeśvaro nāma devatāyatanaṃ tasyāgre vālukāmadhye sthalamīnāstiṣṭhanti te ca vālukāmīnāḥ kathyante /
śuddhasūte vinikṣipya svarṇaṃ vā nāgameva vā /
aṣṭamāṃśena tatsarvaṃ mardayettaptakhalvake

2.7.40

śālmalyāścaiva pañcāṅgarasaṃ tatra vinikṣipet /
śleṣmāntasya phalaṃ pakvaṃ kokilākṣasya bījakam

2.7.41

tilapiṇyākacūrṇaṃ tu dattvā tāvadvimardayet /
jalaukā jāyate yāvattataḥ karpūraṭaṅkaṇam

2.7.42

kapikacchukaromāṇi vākucītailakaṃ paṭu /
māgadhīṃ ca jalaiḥ piṣṭvā tatsarvaṃ taptakhalvake

2.7.43

kṣipetpūrvajalaukāṃ ca trisaptāhaṃ vimardayet /
sā yojyā kāmakāle tu nārīṇāṃ yonigahvare

2.7.44

madadarpaharā tāsāṃ madavihvalakārakā /
bālye ṣaḍaṅgulā yojyā yauvane sā navāṅgulā

2.7.45

dvādaśāṅgulikā yojyā pragalbhānāṃ jalaukikā /
yo vā tāṃ dhārayenmūrdhni vīryaṃ tasya sthiraṃ bhavet

2.7.46

pāradādaṣṭamāṃśena suvarṇaṃ nāgameva vā /
yojayettaptakhalve tu śālmalītvaṅnijadravaiḥ

2.7.47

munipattrarasairnīlīmūladrāvaiśca mardayet /
śleṣmātakaphalaṃ pakvaṃ kokilākṣasya bījakam

2.7.48

majjā supakvā bilvasya kṣipettatraiva mardayet /
jalaukā jāyate yāvattatastasmātsamuddharet

2.7.49

trisaptāhaṃ taptakhalve karpūrādyaiśca pūrvavat /
mardayecca phalaṃ tadvajjāyate nātra saṃśayaḥ

2.7.50

rasādaṣṭamabhāgaṃ tu suvarṇaṃ nāgameva vā /
yojyaṃ ca triphalā bhṛṅgī śuṇṭhī chāgapayo ghṛtam

2.7.51

kṣaudraṃ gomūtrakaṃ caiva sarvaṃ saptadināvadhi /
mardayettadavacchinnaṃ jalaukā yāvatā bhavet

2.7.52

karpūrādyaiḥ punarmardyaṃ taptakhalve tu pūrvavat /
pūrvavajjāyate siddhistadvadyoge na saṃśayaḥ

2.7.53

tridinaṃ mardayetkhalve sūtaṃ niṣkacatuṣṭayam /
triphalāyāstu niryāsaṃ stokaṃ stokaṃ vinikṣipet

2.7.54

payaścaiva mahāśṛṅgyā dātavyaṃ mardanakṣamam /
jalaukā mardanākhyeyaṃ jāyate sukhadā nṛṇām

2.7.55

rāmāṇāṃ madamattānāṃ drāvikāgnau ghṛtaṃ yathā /
pūrvavatkramayogena vīryastambhakarī bhavet

2.7.56

pāradaṃ maricaṃ kuṣṭhaṃ tagaraṃ kaṇṭakārikā /
aśvagandhātilakṣaudrasaindhavaśvetasarṣapāḥ

2.7.57

apāmārgo yavā māṣāḥ pippalī ca samaṃ jalaiḥ /
piṣṭvā vimardayettena liṅgaṃ māsamaharniśam

2.7.58

vardhate hastamātraṃ tatsthaulyena musalopamam /
varāhavasayā kṣaudrairliṅgaṃ māsaṃ vilepayet

2.7.59

atidīrghaṃ dṛḍhaṃ sthūlaṃ jāyate nātra saṃśayaḥ /
aśvagandhā vacā kuṣṭhaṃ bṛhatī ca śatāvarī

2.7.60

pācayettilatailena mardayettena pūrvavat /
liṅgaṃ sthūlaṃ dṛḍhaṃ dīrghaṃ māsamātrātprajāyate

2.7.61

jambūsūkarajaṃ tailaṃ mahārāṣṭrī ca ṭaṅkaṇam /
madhunā saha lepo'yaṃ māsālliṅgasya vṛddhikṛt

2.7.62

miśritaṃ musalīcūrṇaṃ māhiṣairnavanītakaiḥ /
tadbhāṇḍaṃ dhānyarāśau ca sthitaṃ saptadinairharet

2.7.63

tena pralepayelliṅgaṃ vardhate māsamātrataḥ /
pippalī maricaṃ kṣīraṃ sitā tulyaṃ vimardayet

2.7.64

māsaikaṃ vṛddhikṛlliṅge nātra kāryā vicāraṇā /
māhiṣaṃ goghṛtaṃ tulyaṃ saindhavaṃ ca samaṃ samam

2.7.65

anena lepayelliṅgaṃ sthūlaṃ syānmāsamātrataḥ /
aśvagandhāpamārgau ca sārivākṣaphalaṃ tilāḥ

2.7.66

sarṣapendrayavaṃ tulyamajākṣīreṇa peṣayet /
tena liṅgaṃ tu māsaikaṃ mardanādvṛddhimāpnuyāt

2.7.67

māṃsīmakṣaphalaṃ kuṣṭhamaśvagandhāṃ śatāvarīm /
taile paktvā pralepo'yaṃ māsālliṅgasya vṛddhikṛt

2.7.68

rohītamatsyajaṃ pittaṃ jalaukā lāṅgalī samam /
anena lepayelliṅgaṃ syānmāsānmusalopamam /
niśā sitāśvagandhā ca pāradaṃ mardayetsamam /
anena mardayelliṅgaṃ yonikarṇastanāṃstathā /
vardhante māsamātreṇa nātra kāryā vicāraṇā

2.7.69

oṃ namo bhagavate uḍḍāmareśvarāya sara prasara 2 kuru ṭha ṭhaḥ /
anena mantreṇa sarve vardhanayogāḥ saptābhimantritāḥ siddhā bhavanti /
jāmbūmārjārayoḥ pittaṃ yavāgūmarditaṃ dihet /
māsaikādvardhate liṅgaṃ stanau karṇau ca mardanāt

2.7.70

oṃ namo bhagavate uḍḍāmareśvarāya sara prasara prasara nikala nikala nikālaya nikālaya svāhā ṭhaḥ ṭhaḥ

2.7.71

gṛhagodhā śuno jihvā strījarāyuḥ samaṃ samam /
piṣṭvā dhāryaṃ tāmrapātre saptāhāttaṃ punaḥ pacet

2.7.72

tilatailena tattailamardanādvardhate khalu /
liṅgaṃ stanau ca karṇau ca hastau pādau na saṃśayaḥ /
oṃ namo bhagavate uḍḍāmareśvarāya sara sara hili hili svāhā ṭhaḥ ṭhaḥ /
atitarasukhasādhyair yogarājaiḥ prasiddhaiḥ satatasuratayogyaṃ stambhanaṃ vardhanaṃ ca /
nipuṇarasikarāmārañjakaṃ mohakaṃ syād gaditamiha samastaṃ bhogināṃ saukhyahetuḥ

Original text: Rasaratnākara · Edition: Vaidya Jadavji Tricumji Acarya Benares : Caukhamba Sanskrit Office, 1939 · Data entry Oliver Hellwig · GRETIL (Göttingen) · CC BY-NC-SA 4.0