Rasamañjarī · Chapter 8

Rmañj, 8
atha sampakvadoṣasya proktamañjanamācaret /
hemante śiśire caiva madhyāhne'ñjanamiṣyate

pūrvāhne cāparāhṇe ca grīṣme śaradi ceṣyate /
varṣāsu kuryādatyuṣṇe vā vasante sadaiva hi

śrānte prarudite bhīte pītamadye navajvare /
ajīrṇe vegaghāte ca añjanaṃ na praśasyate

hareṇumātrāṃ kurvīta vartiṃ tīkṣṇāñjane bhiṣak /
pramāṇaṃ madhyamaṃ sārdhaṃ dviguṇaṃ ca mṛdau bhavet

sūtakaṃ gandhakaḥ petaṃ cāṅgerīrasasaṃmūrchitam /
añjanaṃ dṛṣṭidaṃ nṛṇāṃ netrāmayavināśanam

rasendrabhujagau tulyau tābhyāṃ dviguṇamañjanam /
sūtaturyāṃśaṃ karpūramañjanaṃ nayanāmṛtam

kṛṣṇasarpavasā śaṃkhaḥ katakaṃ kaṭphalamañjanam /
rasa eva marīcena andhānāṃ darśanaṃ param

śaṃkhasya bhāgāścatvāras tadardhena manaḥśilā /
manaḥśilārdhaṃ maricaṃ maricārddhena pippalī

vāriṇā timiraṃ hanti arbudaṃ hanti mastunā /
cipiṭaṃ madhunā hanti strīkṣīreṇa ca puṣpakam

apāmārgaśikhāṃ ghṛṣṭvā madhunā saindhavena ca /
tāmrapātre kṛtā netre hanti pīḍāṃ suvistarāt

dantairdantivarāhoṣṭragohayājakharodbhavaiḥ /
śaṅkhamuktāmbhodhiphenayutaiḥ sarvair vicūrṇayet /
hanti vartiḥ kṛtā ślakṣṇaṃ śukrāṇāṃ nāśinī param

tutthamākṣikasindhūtthaśivāśaṃkhamanaḥśilā /
gairikodakaphenaṃ ca maricaṃ ceti cūrṇayet

saṃyojya madhunā kuryādandhānāṃ sā rasakriyā /
vartmarogaṃ ca timiraṃ kācaśukraharaṃ param

śaṅkhanābhivibhītasya majjā pathyā manaḥśilā /
pippalī maricaṃ kuṣṭhaṃ vacā ceti samāṃśakam

chāgīkṣīreṇa saṃpiṣṭvā vartiṃ kṛtvā yathonmitām /
hareṇumātrāṃ saṃghṛṣya jalaiḥ kuryādathāñjanam

timiraṃ māṃsavṛddhiṃ ca kācaṃ paṭalam arbudam /
rājyandhaṃ vārṣikaṃ puṣpaṃ varticandrodayā jayet

śuddhe nāge drute tulyaṃ śuddhasūtaṃ vinikṣipet /
kṛṣṇāñjanaṃ tayostulyaṃ sarvamekatra cūrṇayet

daśamāṃśena karpūramasmiṃścūrṇe pradāpayet /
etat pratyañjanaṃ netragadajinnayanāmṛtam

bhuktvā pāṇitalaṃ ghṛṣṭvā cakṣuṣor yadi dīyate /
jātā rogāḥ praṇaśyanti na bhavanti kadācana

triphalāyāḥ kaṣāyeṇa prātarnayanadhāvanāt /
acireṇaiva tadvāri timirāṇi vyapohati

triphalā lauhacūrṇaṃ tu vāriṇā peṣayet samam /
dvayostulyena tailena pacenmṛdvagninā kṣaṇam

tailatulye bhṛṅgarase tattailaṃ tu vipācayet /
snigdhabhāṇḍagataṃ bhūmau sthitvā māsātsamuddharet

saptāhaṃ lepayedveṣṭya kadalyāśca dalaiḥ śiraḥ /
nirvāte kṣīrabhojī syāt chālayet triphalājalaiḥ

nityameva prakartavyaṃ saptāhaṃ rañjanaṃ bhavet /
yāvajjīvaṃ na sandehaḥ kacāḥ syurbhramaropamāḥ

kākamācī yavā jātī samaṃ kṛṣṇatilaṃ tataḥ /
tattailaṃ grāhayedyantre tena syāt keśarañjanam

lohamalāmalakalkaḥ sajapā kusumairnaraḥ sadā snāyī /
palitānīha nihanyād gaṅgāsnāyīva narakaugham

kāśmaryā mūlamādau sahacarakusumaṃ ketakīnāṃ ca mūlaṃ lauhaṃ cūrṇaṃ sabhṛṅgaṃ triphalajalayutaṃ tailamebhir vipakvam /
kṛtvā vai lohabhāṇḍe kṣititalanihitaṃ māsam ekaṃ nidhāya keśāḥ kāśaprakāśā bhramarakulanibhā lepanād eva kṛṣṇāḥ

vajrīkṣīreṇa saptāhaṃ suśvetān bhāvayettilān /
tailena liptāḥ keśāḥ syuḥ śuklā vai nātra saṃśayaḥ