Rasamañjarī · Chapter 7

Rmañj, 7
praṇamya nirbhayaṃ nāthaṃ khendradevaṃ jagatpatim /
digambaraṃ trinetraṃ ca jarāmṛtyuvināśanam

amṛtaṃ ca viṣaṃ caiva śivenoktaṃ rasāyanam /
amṛtaṃ vidhisaṃyuktaṃ vidhihīnaṃ tu tadviṣam

recanānte idaṃ sevyaṃ sarvadoṣāpanuttaye /
mṛtābhraṃ bhakṣayedādau māsamekaṃ vicakṣaṇaḥ

paścāttu yojayed dehe kṣetrīkaraṇamicchataḥ /
yatkṣetrīkaraṇe sūtastvamṛto'pi viṣaṃ bhavet

phalasiddhiḥ kutastasya subījasyoṣare yathā /
na kṣetrakaraṇāddevi kiṃcit kuryādrasāyanam /
kartavyaṃ kṣetrakaraṇaṃ sarvasmiṃśca rasāyane

bhasmasūtaṃ dvidhā gandhaṃ kṣaṇaṃ kanyāvimarditam /
ruddhvā laghupuṭe pacyād uddhṛtya madhusarpiṣā

niṣkaṃ khādejjarāmṛtyuṃ hanti gandhāmṛto rasaḥ /
samūlaṃ bhṛṅgarājaṃ tu chāyāśuṣkaṃ vicūrṇayet

tatsamaṃ triphalācūrṇaṃ sarvatulyā sitā bhavet /
palaikaṃ bhakṣayeccānu tacca mṛtyurujāpaham

<hemasundararasaḥ>
mṛtasūtasya pādāṃśaṃ hemabhasma prakalpayet

kṣīrājyaṃ madhunā yuktaṃ māṣaikaṃ kāṃsyapātrake /
lehayenmāsaṣaṭkaṃ tu jarāmṛtyuvināśanam

vākucīcūrṇakarṣaikaṃ dhātrīrasapariplutam /
anupānaṃ lihennityaṃ syādraso hemasundaraḥ

<mṛtasaṃjīvanī guṭīkā>
śuddhasūtaṃ vajrabhasma sattvamabhrakatāpyayoḥ /
kāntalohasamaṃ hema jambīre mardayed dṛḍham

saptāhaṃ sarvatulyāṃśaṃ golaṃ kṛtvā samuddharet /
gojihvāvāyasīvandhyānirguṇḍīmadhusaindhavaiḥ

lepayedvajramūṣānte golakaṃ tatra nikṣipet /
tatkalkaiśchāditaṃ kṛtvā pakṣaikaṃ bhūdhare pacet

yāmaṃ yāmaṃ samuddhṛtya liptvāmūṣāṃ punaḥ punaḥ /
ruddhvātha pūrvavatpācyamenaṃ pakṣātsamuddharet

yavaciñcāpalāśākhyarājīkārpāsataṇḍulaiḥ /
etaiḥ pralepayenmūṣāṃ guṭikāṃ tatra nikṣipet

ṭaṅkaṇaṃ śvetakācaṃ ca dattvā yāme dṛḍhaṃ dṛḍham /
khadirāṅgārayogena druto 'yaṃ jāyate rasaḥ

mūṣāyāṃ biḍayogena samaṃ hema ca jārayet /
tatastriyāmakairmardyaṃ sagomūtraṃ dinaikataḥ

andhamūṣāgato dhmāto baddho bhavati vajravat /
mṛtasaṃjīvanī nāma guṭikā vakramadhyagā

karṣamātrā jarāṃ mṛtyuṃ hanti satyaṃ śivoditam /
śastrastambhaṃ ca kurute brahmāyurbhavate naraḥ

<vīryarodhinīguṭikā>
nāgavallīdaladrāvaiḥ saptāhaṃ śuddhasūtakam /
mardayet kṣālayed amlaiścaturniṣkapramāṇakam

viṣakandagataṃ kṛtvā viṣeṇaiva nirodhayet /
tataḥ śūkaramāṃsasya garbhe kṛtvātha siñcayet

saṃdhyākāle baliṃ dattvā kukkuṭīvāruṇīyutam /
tataścullyāṃ lohapātre taile dhattūrasaṃyute

kṣiptvā triṃśatpale pācyaṃ tadrasaṃ māṃsapiṇḍakam /
saṃdhyām ārabhya mandāgnau yāvatsūryodayaṃ pacet

haṭhājjāgaraṇaṃ kuryādanyathā tannasiddhibhāk /
prātaruddhṛtya guṭikāṃ kṣīrabhāṇḍe vinikṣipet

tatkṣīraṃ śuṣyati kṣiprametatpratyayakārakam /
ratikāle mukhe dhāryā guṭikā vīryarodhinī

kṣīraṃ pītvā ramedrāmāṃ kāmākulakulānvitām /
svamukhāddhārayeddhaste tadā vīryaṃ vimuñcati