Rasamañjarī · Chapter 5

Rmañj, 5
hemādilohakiṭṭāntaṃ śodhanaṃ māraṇaṃ guṇam /
vakṣye sapratyayaṃ yogaṃ yathāgurumukhoditam

<metals:: śodhana>
taile takre gavāṃ mūtre kvāthe kaulatthakāñjike /
taptaṃ taptaṃ niṣecettu tattaddrāve tu saptadhā

svarṇādilohaparyantaṃ śuddhirbhavati niścitam /
śodhanaṃ māraṇaṃ caiva kathyate ca mayādhunā

<gold:: śodhana>
mṛttikāmātuluṅgāmlaiḥ pañcavāsarabhāvitā /
sabhasmalavaṇaṃ hema śodhayet puṭapākataḥ

<svarṇabhasma>
śuddhasūtasamaṃ hema khalve kuryācca golakam /
adhordhvaṃ gandhakaṃ dattvā sarvaṃ tulyaṃ nirudhya ca

triṃśadvanopalairdeyaṃ puṭānyevaṃ caturdaśa /
nirutthaṃ jāyate bhasma gandho deyaḥ punaḥ punaḥ

<svarṇabhasma>
kṛtvā kaṇṭakavedhyāni svarṇapatrāṇi lepayet /
luṅgāmbubhasmasūtena mriyate daśabhiḥ puṭaiḥ

<svarṇabhasma>
rasasya bhasmanā vātha rasairvā lepayeddalam /
hiṅguhiṅgulasindūraiḥ śilāsāmyena lepayet

saṃmardya kāñcanadrāvairdinaṃ kṛtvātha golakam /
taṃ bhāṇḍasya tale dhṛtvā bhasmanā pūrayeddṛḍham

agniṃ prajvālayedgāḍhaṃ dviniśaṃ svāṅgaśītalam /
uddhṛtya sāvaśeṣaṃ ca punardeyaṃ puṭatrayam

anena vidhinā svarṇaṃ nirutthaṃ jāyate'mitam /
etadrasāyanaṃ balyaṃ vṛṣyaṃ śītaṃ kṣayādihṛt

<svarṇabhasma>
galitasya suvarṇasya ṣoḍaśāṃśena sīsakam /
yojayitvā samuddhṛtya nimbunīreṇa mardayet

tadgolakasamaṃ gandhaṃ cūrṇaṃ dadyādadhopari /
śarāvasampuṭe dhṛtvā puṭedviṃśadvanopalaiḥ

evaṃ munipuṭairhema notthānaṃ labhate punaḥ /
<svarṇabhasma>
mākṣikaṃ nāgacūrṇaṃ ca piṣṭamarkarase punaḥ

hemapatraṃ ca tenaiva mriyate kṣaṇamātrataḥ /
<gold:: med. properties>
kaṣāyatiktamadhuraṃ suvarṇaṃ guru lekhanam

vṛṣyaṃ rasāyanaṃ balyaṃ cakṣuṣyaṃ kāntidaṃ śuci /
āyurmedovayaḥsthairyavāgviśuddhismṛtipradam

kṣayonmādagadārtānāṃ śamanaṃ paramucyate /
<rajataśodhanam>
bhāgena kṣārarājena drāvitaṃ śuddhimicchatā

<rajatabhasma>
tārapatraṃ caturbhāgaṃ bhāgaikaṃ śuddhatālakam /
mardyaṃ jambīrajairdrāvaistārapatrāṇi lepayet

ruddhvā tribhiḥ puṭaiḥ pācyaṃ pañcaviṃśadvanopalaiḥ /
mriyate nātra sandeho gandho deyaḥ punaḥ punaḥ

<rajatabhasma>
svarṇamākṣikagandhasya samaṃ bhāgaṃ tu kārayet /
arkakṣīreṇa sampiṣṭaṃ tārapatraṃ pralipya ca

puṭena jārayettāraṃ mṛtaṃ bhavati niścitam /
<silver:: māraṇa (3)>
vidhāya piṣṭiṃ sūtena rajatasyātha melayet

tālaṃ gandhaṃ samaṃ paścānmardayennimbukadravaiḥ /
dvitraiḥ puṭaiḥ bhavedbhasma yojyameva rasādiṣu

<silver:: med. properties>
śītaṃ kaṣāyaṃ madhuramamlaṃ vātaprakopajit /
dīpanaṃ balakṛt snigdhaṃ gāḍhājīrṇavināśanam /
āyuṣyaṃ dīrgharogaghnaṃ rajataṃ lekhanaṃ param

<tāmra>
na viṣaṃ viṣamityāhustāmraṃ tu viṣamucyate /
<copper:: 8 doṣas>
eko doṣo viṣe tāmre tvaṣṭau doṣāḥ prakīrtitāḥ

bhramo mūrcchā vidāhaśca svedakledanavāntayaḥ /
aruciścittasantāpa ete doṣā viṣopamāḥ

tasmādviśuddhaṃ saṃgrāhyaṃ tāmraṃ rogapraśāntaye /
<copper:: śodhana>
lavaṇair vajradugdhena tāmrapatraṃ vilepayet

agnau saṃtāpya nirguṇḍīrasaiḥ siktaṃ ca saptadhā /
snuhyarkasvarase'pyevaṃ śulbaśuddhirbhaviṣyati

<copper:: śodhana>
gomūtreṇa pacedyāmaṃ tāmrapatraṃ dṛḍhāgninā /
śudhyate nātra sandeho māraṇaṃ vāpyathocyate

<tāmrabhasma>
sūtamekaṃ dvidhā gandhaṃ yāmaṃ kanyāṃ vimardayet /
dvayostulyaṃ tāmrapatraṃ sthālyā garbhaṃ nirodhayet

samyaṅ mṛllavaṇaiḥ sārddhaṃ pārśve bhasma nidhāya ca /
caturyāmaṃ paceccullyāṃ pātrapṛṣṭhe sagomaye

jalaṃ punaḥ punardeyaṃ svāṅgaśītaṃ vicūrṇayet /
mriyate nātra sandehaḥ sarvayogeṣu yojayet

<tāmrabhasma>
caturthāṃśena sūtena tāmrapatrāṇi lepayet /
amlapiṣṭaṃ dviguṇitamadhordhvaṃ dāpayed balim

cāṅgerīkalkagarbhe tadbhāṇḍe yāmaṃ paceddṛḍham /
bhasmībhūtaṃ tāmrapatraṃ sarvayogeṣu yojayet

<tāmrabhasma>
jambīrarasasampiṣṭaṃ rasagandhakalepitam /
śulbapatraṃ śarāvasthaṃ tripuṭairyāti pañcatām

<tāmrabhasmaguṇāḥ>
tāmraṃ tiktāmlamadhuraṃ kaṣāyaṃ śītalaṃ param

kaphapittakṣayaṃ dhātukuṣṭhaghnaṃ ca rasāyanam /
nāśayecchūlam arśāṃsi vṛkṣamindrāśaniryathā

<rājarīti-, ghoṣaśodhana, -māraṇa>
rājarītistathā ghoṣaṃ tāmravanmārayet pṛthak /
tāmravacchodhanaṃ teṣāṃ tāmravad guṇakārakam

<nāgavaṅgaśodhanam>
nāgavaṅgau ca galitau ravidugdhena secayet /
trivāraṃ śuddhimāyāti sacchidre haṇḍikāntare

<lead:: māraṇa (1)>
tribhiḥ kumbhapuṭairnāgo vāsāsvarasamarditaḥ /
sā śilā bhasmatāmeti tadrajaḥ sarvamehahṛt

<nāgabhasma>
bhūbhujaṅgam agastiṃ ca piṣṭvā pātraṃ vilepayet /
tadrasaṃ vidrute nāge vāsāpāmārgasambhavam

kṣāraṃ vimiśrayettatra caturthāṃśaṃ gurūktitaḥ /
praharaṃ pācayeccullyāṃ vāsādarvyā ca ghaṭṭitā

tata uddhṛtya taccūrṇaṃ vāsānīre vimardayet /
puṭet punaḥ samuddhṛtya tenaiva parimardayet

evaṃ sapta puṭaṃ nāgaṃ sindūraṃ jāyate dhruvam /
<nāgabhasmaguṇāḥ>
tārastho rañjano nāgo vātapittakaphāpahaḥ

grahaṇīkuṣṭhamehārśaḥprāṇaśoṣaviṣāpahaḥ /
<tin:: māraṇa (1)>
ābhīraṃ śodhayedādau drāvayeddhaṇḍikāntare

apāmārgacaturthāṃśaṃ cūrṇitaṃ melayettataḥ /
sthūlāgrayā lohadarvyā śanaistad avacālayet

yāvadbhasmatvamāyāti tāvanmardyaṃ ca pūrvavat /
tata ekīkṛtaṃ sarvaṃ bhavedaṅgāravarṇakam

nūtanena śarāveṇa rodhayedantare bhiṣak /
paścāttīvrāgninā pakvaṃ vaṅgabhasma bhaveddhruvam

<tin:: māraṇa (2)>
vaṅgaṃ satālamarkasya piṣṭvā dugdhena taṃ puṭet /
śuṣkāśvatthabhavairvalkaiḥ saptadhā bhasmatāṃ vrajet

<vaṅgabhasmaguṇāḥ>
vaṅgaṃ tiktoṣṇakaṃ rūkṣamīṣadvātaprakopanam /
mehaśleṣmāmayaghnaṃ ca kṛmighnaṃ mohanāśanam

<iron:: śodhana:: adri>
triphalādaṣṭaguṇe toye triphalā ṣoḍaśaṃ palam /
tatkvāthe pādaśeṣe tu lohasya palapañcakam

kṛtvā patrāṇi taptāni saptavāraṃ niṣecayet /
evaṃ pralīyate doṣo girijo lohasambhavaḥ

<lohabhasma>
śuddhasya sūtarājasya bhāgo bhāgadvayaṃ baleḥ /
dvayoḥ samaṃ sāracūrṇaṃ mardayet kanyakāmbunā

yāmadvayaṃ tato golaṃ sthāpayettāmrabhājane /
ācchādyairaṇḍajaiḥ patrairuṣṇo yāmadvayaṃ bhavet

tridinaṃ dhānyarāśisthaṃ taṃ tato mardayed dṛḍham /
rajastadvastragalitaṃ nīre tarati haṃsavat

tīkṣṇaṃ muṇḍaṃ kāntalohaṃ nirutthaṃ jāyate mṛtam /
triphalāmadhusaṃyuktam etatsevyaṃ rasāyanam

<lohabhasma>
dvādaśāṃśena daradaṃ tīkṣṇacūrṇasya melayet /
kanyānīreṇa saṃmardya yāmayugmaṃ tu tatpuṭet /
puṭedevaṃ lohacūrṇaṃ saptadhā maraṇaṃ vrajet

<lohabhasma>
kākodumbarikānīre lohapatrāṇi secayet /
taptataptāni ṣaḍvāraṃ kuṭṭayettad udūkhale

tatpañcamāṃśaṃ daradaṃ kṣiptvā sarvaṃ vimardayet /
kumārīnīratas tīkṣṇaṃ puṭe gajapuṭe tathā

trivāraṃ triphalākvāthaistatsaṃkhyākairatandritaḥ /
evaṃ caturdaśapuṭairlohaṃ vāritaraṃ bhavet

<lohabhasma>
tindūphalasya majjāyāṃ khaḍgaṃ liptvātape khare /
dhārayet kāṃsyapātreṇa dinaikena puṭatyalam

lepaṃ punaḥ punaḥ kuryād dinānte tatprapeṣayet /
triphalākvāthasaṃyuktaṃ dinaikena mṛtirbhavet

<lohabhasma>
lohaṃ patramatīva taptamasakṛtkvāthe kṣipettraiphale cūrṇībhūtamato bhavet triphalaje kvāthe pacet gojale /
matsyākṣītriphalārasena puṭayedyāvannirutthaṃ bhavet paścādājyamadhuplutaṃ supuṭitaṃ bhasma bhaved āyasam

<iron:: checking the vāritara state>
sarvametanmṛtaṃ lohaṃ dhmātavyaṃ mṛtapañcake /
yadyeva syānnirutthānaṃ satyaṃ vāritaraṃ bhavet

<lohanirutthabhasma>
gandhakaṃ tutthakaṃ lohaṃ tulyaṃ khalve vimardayet /
dinaikaṃ kanyakādrāvai ruddhvā gajapuṭe pacet /
ityevaṃ sarvalohānāṃ kartavyetthaṃ nirutthitiḥ

<lohabhasmaguṇāḥ>
kṛṣṇāyaso'tha śūlārśaḥkuṣṭhapāṇḍutvamehanut /
vayaḥsthaṃ guru cakṣuṣyaṃ saraṃ medogadāpaham

āyuḥpradātā balavīryakartā rogasya hartā madanasya kartā /
ayaḥsamānaṃ nahi kiṃcid anyad rasāyanaṃ śreṣṭhatamaṃ hi janto

kūṣmāṇḍaṃ tilatailaṃ ca māṣānnaṃ rājakaṃ tathā /
madyamamlarasaṃ caiva tyajellohasya sevakaḥ

<muṇḍa>
ye guṇā mārite muṇḍe te guṇā muṇḍakiṭṭake /
tasmāt sarvatra maṇḍūraṃ rogaśāntyai niyojayet

śatotthamuttamaṃ kiṭṭaṃ madhyamāśītivārṣikam /
adhamaṃ ṣaṣṭivarṣīyaṃ tato hīnaṃ viṣopamam

dagdhākṣakāṣṭhair malam āyasaṃ tu gomūtranirvāpitamaṣṭavārān /
vicūrṇya līḍhaṃ madhunācireṇa nṛṇāṃ kṣayaṃ pāṇḍugadaṃ nihanti

kiṭṭāddaśaguṇaṃ muṇḍaṃ muṇḍāttīkṣṇaṃ śatādhikam /
tīkṣṇāllakṣaguṇaṃ kāntaṃ bhakṣaṇāt kurute guṇam