Rasamañjarī · Chapter 3

Rmañj, 3
<uparasāḥ>
gandhakaṃ vajravaikrāntaṃ gaganaṃ tālakaṃ śilām /
kharparaṃ śikhitutthaṃ ca vimalā hemamākṣikam

kāsīsaṃ kāntapāṣāṇaṃ varāṭāñjanahiṅgulam /
kaṅkuṣṭhaṃ śaṃkhabhūnāgaṃ ṭaṅkaṇaṃ tu śilājatu

ete uparasāḥ proktāḥ śodhyā drāvyāśca mārayet /
<gandhaka>
tatrādau gandhakotpattiṃ śodhanaṃ tvatha kathyate

śvetadvīpe purā devyāḥ krīḍantyāḥ prasṛtaṃ rajaḥ /
kṣīrārṇave tu snātāyā dukūlaṃ rajasānvitam

dhautaṃ yat salile tasmin gandhavadgandhakaṃ smṛtam /
caturdhā gandhakaḥ prokto raktapītasitāsitaiḥ

rakto hemakriyāsūktaḥ pītaścaiva rasāyane /
vraṇādilepane śvetaḥ śreṣṭhaḥ kṛṣṇastu durlabhaḥ

aśuddhagandhaḥ kurute'tikuṣṭhaṃ tāpaṃ bhramaṃ pittarujaṃ karoti /
rūpaṃ sukhaṃ vīryabalaṃ nihanti tasmāt suśuddhaṃ viniyojanīyam

<gandhakaśodhanam (1)>
sājyabhāṇḍe payaḥ kṣiptvā mukhaṃ vastreṇa bandhayet /
tatpṛṣṭhe gandhakaṃ kṣiptvā śarāveṇāvarodhayet

bhāṇḍaṃ nikṣipya bhūmyāṃ tadūrdhvaṃ deyaṃ puṭaṃ laghu /
tataḥ kṣīreṇa gandhaṃ ca śuddhaṃ yogeṣu yojayet

<gandhakaśodhanam (2)>
gandhakaṃ śodhayed dugdhe dolāyantreṇa tattvavit /
tena śuddho bhavatyeṣa dhātūṇāṃ prāṇamūrchakaḥ

<gandhakaśodhanam (3)>
ghṛtayuktam ayodarvyā gandhaṃ vahṇau pragālayet /
ekībhūtaṃ tato gandhaṃ dugdhamadhye parikṣipet

tena śuddho bhavedgandhaḥ sarvayogeṣu yojayet /
śodhito rasarājaḥ syājjarāmṛtyurujāpahaḥ /
agnisaṃdīpanaṃ śreṣṭhaṃ vīryavṛddhiṃ karoti ca

<gandhakataila>
arkakṣīraiḥ snuhīkṣīrairvastraṃ lepyaṃ tu saptadhā /
gandhakaṃ navanītena piṣṭvā vastraṃ lipettu tat

tadvartirjvalitā vaṃśairdhṛtā dhāryā tvadhomukhī

tailaṃ patatyadho bhāṇḍe grāhyaṃ yogeṣu yojayet /
agnisaṃdīpanaṃ śreṣṭhaṃ vīryavṛddhiṃ karoti ca

<hīraka>
śvetapītā raktakṛṣṇā dvijādyā vajrajātayaḥ /
puṃstrīnapuṃsakaṃ ceti lakṣaṇena tu lakṣayet

vṛttāḥ phalakasampūrṇās tejovanto bṛhattarāḥ /
puruṣāste samākhyātā rekhābinduvivarjitāḥ

rekhābindusamāyuktāḥ ṣaṭkoṇāstāḥ striyaḥ smṛtāḥ /
trikoṇāḥ patravaddīrghā vijñeyāste napuṃsakāḥ

sarveṣāṃ puruṣāḥ śreṣṭhā vedhakā rasabandhakāḥ /
strīvajraṃ dehasiddhyarthaṃ krāmaṇaṃ syānnapuṃsakam

vipro rasāyane proktaḥ kṣatriyo roganāśane /
vādādau vaiśyajātīyo vayaḥstambhe turīyakaḥ

strī tu striye pradātavyā klībe klībaṃ tathaiva ca /
sarveṣāṃ sarvadā yojyāḥ puruṣā balavattarāḥ

pāṇḍurogaṃ pārśvapīḍāṃ kilāsaṃ dāhasantatim /
rogānīkaṃ gurutvaṃ ca dhatte vajram aśodhitam

<vajraśodhanam (1)>
vyāghrīkandagataṃ vajraṃ dolāyantre vipācitam /
saptāhaṃ kodravakvāthe kaulatthe vimalaṃ bhavet

<vajraśodhanam (2)>
vyāghrīkandagataṃ vajraṃ mṛdā liptaṃ puṭe pacet /
ahorātrātsamuddhṛtya hayamūtreṇa secayet /
vajrīkṣīreṇa vā siñcet kuliśaṃ vimalaṃ bhavet

<vajramāraṇaṃ (1)>
trivarṣārūḍhakārpāsamūlam ādāya peṣayet /
trivarṣanāgavallyāśca drāveṇa taṃ prapeṣayet

tadgolake kṣipedvajraṃ ruddhvā gajapuṭe pacet /
evaṃ saptapuṭaṃ kṛtvā kuliśaṃ mriyate dhruvam

<vajramāraṇa (2)>
kāṃsyapātre tu bhekasya mūtre vajraṃ subhāvayet /
triḥ saptakṛtvaḥ saṃtaptaṃ vajrameva mṛtaṃ bhavet

<vajramāraṇa (3)>
triḥ saptakṛtvaḥ saṃtaptaṃ kharamūtreṇa secayet /
matkuṇaistālakaṃ piṣṭvā tadgole kuliśaṃ kṣipet

pradhmātaṃ vājimūtreṇa siktaṃ pūrvakrameṇa vai /
bhasmībhavati tadbhuktaṃ vajravatkurute tanum

āyuṣyaṃ saukhyajanakaṃ baladaṃ rūpadaṃ tathā /
rogaghnaṃ mṛtyuharaṇaṃ vajrabhasma bhavatyalam

<vaikrānta>
aṣṭāsraś cāṣṭaphalakaḥ ṣaṭkoṇo masṛṇo guruḥ /
śuddhamiśritavarṇaiśca yukto vaikrānta ucyate

śveto raktaśca pītaśca nīlaḥ pārāvatacchaviḥ /
śyāmalaḥ kṛṣṇavarṇaśca karburaścāṣṭadhā hi saḥ

<vaikrāntaśodhanam>
vaikrāntaṃ vajravacchuddhaṃ dhmātaṃ taṃ hayamūtrake /
hitaṃ tadbhasma saṃyojyaṃ vajrasthāne vicakṣaṇaiḥ

āyuḥpradaḥ sakalabandhakaro 'tivṛṣyaḥ prajñāpradaḥ sakalarogasamūlahārī /
dīptāgnikṛt pavisamānaguṇas tarasvī vaikrāntakaḥ khalu vapurbalalohakārī

<vaikrāntasattvapātanam>
vaikrāntaṃ vajrakande ca peṣayed vajravāriṇā /
māhiṣaṃ navanītaṃ ca sakṣaudraṃ piṇḍitaṃ tataḥ

śoṣayitvā dhamet sattvaṃ indragopasamaṃ bhavet /
<abhraka>
pinākaṃ darduraṃ nāgaṃ vajramabhraṃ caturvidham /
dhmātaṃ vahṇau dalacayaṃ pinākaṃ visṛjatyalam

phūtkāraṃ nāgavat kuryāt darduraṃ bhekaśabdavat /
caturthaṃ ca varaṃ jñeyaṃ na cāgnau vikṛtiṃ vrajet

tasmādvajrābhrakaṃ grāhyaṃ vyādhivārdhakyamṛtyujit /
aśuddhābhraṃ nihantyāyurvardhayenmārutaṃ kapham

ahataṃ chedayedgātraṃ mandāgnikṛmivardhanam /
ataḥ śuddhābhrakaṃ grāhyaṃ mandāgnikṛmināśanam

<dhānyābhraka>
pādāṃśaśālisaṃyuktam abhraṃ baddhvātha kambale /
trirātraṃ sthāpayennīre tat klinnaṃ mardayed dṛḍham

kambalādgalitaṃ ślakṣṇaṃ vālukārahitaṃ ca yat /
taddhānyābhramiti proktaṃ sadbhirdehasya siddhaye

<dhānyābhrakakaraṇa>
dhamedvajrābhrakaṃ vahṇau tataḥ kṣīreṇa secayet /
bhinnapatraṃ tu tatkṛtvā meghanādāmlayordravaiḥ /
bhāvayedaṣṭayāmaṃ taddhānyābhraṃ kārayet sudhīḥ

<dhānyābhra (3)>
athavā badarīkvāthe dhmātamabhraṃ vinikṣipet /
marditaṃ pāṇinā śuṣkaṃ dhānyābhrād atiricyate

<abhrakabhasma>
dhānyābhrakasya bhāgaikaṃ dvau bhāgau ṭaṃkaṇasya ca

piṣṭvā tadandhamūṣāyāṃ ruddhvā tīvrāgninā pacet /
svabhāvaśītalaṃ cūrṇaṃ sarvarogeṣu yojayet

<abhramāraṇa (1)>
dhānyābhrakaṃ dṛḍhaṃ mardyam arkakṣīre dināvadhi /
veṣṭayed bhānupatraiśca cakrākāraṃ tu kārayet

kuñjarākhye puṭe pācyaṃ saptavāraṃ punaḥ punaḥ /
tato vaṭajaṭākvāthaistadvaddeyaṃ puṭatrayam

mriyate nāma sandehaḥ sarvarogeṣu yojayet /
<abhramāraṇa (2)>
dhānyābhrakaṃ samādāya mustakvāthaiḥ puṭatraye

tadvatpunarnavānīraiḥ kāsamardarasais tathā /
nāgavallīrasairyuktaṃ sūryakṣīraiḥ pṛthakpṛthak

dine dine mardayitvā kvāthairvaṭajaṭodbhavaiḥ /
dattvā puṭatrayaṃ paścāt tripuṭaṃ muśalījalaiḥ

trir gokṣurakaṣāyeṇa triḥ puṭedvānarīrasaiḥ /
mocākandarasaiḥ pācyaṃ trivāraṃ kokilākṣakaiḥ

rasaiḥ puṭettato dhenuḥ kṣārodakaṃ puṭaṃ muhuḥ /
dadhnā ghṛtena madhunā svacchayā sitayā tathā

ekamekaṃ puṭaṃ dadyād abhrasyaivaṃ mṛtirbhavet /
sarvarogaharaṃ vyoma jāyate yogavāhakam

kāminīmadadarpaghnaṃ śastaṃ puṃstvopavāhinām /
vṛṣyamāyuṣkaraṃ śukravṛddhisantānakārakam

<abhramāraṇa (3)>
dugdhatrayaṃ kumāryambu gaṃgāpatraṃ nṛmūtrakam /
vaṭāṅkuram ajāraktam ebhirabhraṃ sumarditam

śatadhā puṭitaṃ bhasma jāyate padmarāgavat /
niścandrakaṃ bhaved vyoma śuddhadeho rasāyanam

niścandramāritaṃ vyoma rūpaṃ vīryaṃ dṛḍhāṃ tanum /
kurute nāśayenmṛtyuṃ jarārogakadambakam

<abhrakasattvapātanam>
bhāvitaṃ cūrṇitaṃ tvabhraṃ dinaikaṃ kāñjikena ca /
rambhāsūraṇajair nīrair mūlakotthaiśca melayet

turyāṃśaṃ ṭaṃkaṇenedaṃ kṣudramatsyaiḥ samaṃ punaḥ /
mahiṣīmalasammiśraṃ vidhāyāsyātha golakam

kharāgninā dhamedgāḍhaṃ sattvaṃ muñcanti kāntimat /
sattvasevī vayaḥstambhaṃ kṛtaśuddhirlabhetsudhīḥ

<abhrakadrāvaṇa>
agastipuṣpaniryāsamarditaṃ sūraṇodare /
goṣṭhabhūsthaṃ nabhobhāsaṃ jāyate jalasannibham

<sattvapātana (allgem.)>
guḍapurastathā lākṣā piṇyākaṃ ṭaṃkaṇaṃ tathā /
ūrṇā sarjarasaṃ caiva kṣudramīnasamanvitam

etat sarvaṃ tu saṃcūrṇaṃ chāgīdugdhena piṇḍikām /
kṛtvā dhmātā kharāṅgāraiḥ sarvasattvāni pātayet

pāṣāṇamṛttikādīni sarvalohagatāni ca /
anyāni yānyasādhyāni vyomasattvasya kā kathā

yadoparasabhāvo'sti rase tatsattvayojanam /
kartavyaṃ tadguṇādhikyaṃ rasajñatvaṃ yadīcchasi

<bhūnāgasattvapātana>
sadyo bhūnāgamādāya cārayecchikhinaṃ budhaḥ /
athavā kukkuṭaṃ vīraṃ kṛtvā mandiramāśritam

malaṃ mūtraṃ gṛhītvā ca saṃtyajya prathamāṃśakam /
āloḍya kṣīramadhvājyaṃ dhametsattvārthamādarāt

muñcanti tāmravat sattvaṃ tanmudrājalapānajaḥ /
naśyanti jaṅgamaviṣāṇyaśeṣāṇi na saṃśayaḥ

<aśuddhaharitāladoṣāḥ>
aśuddhaṃ tālamāyurghnaṃ kaphamārutamehakṛt /
vāntisphoṭāṅgasaṃkocaṃ kurute tena śodhayet

<haritāla>
śuddhaḥsyāttālakaḥ svinnaḥ kūṣmāṇḍasalile tataḥ /
cūrṇodake pṛthaktaile bhasmībhūto na doṣakṛt

tālako harate rogānkuṣṭhaṃ mṛtyurujādikān /
saṃśuddhaḥ kāntivīryaṃ ca kurute hyāyurvardhanam

<haritālamāraṇaṃ>
palamekaṃ śuddhatālaṃ kaumārīrasamarditam /
śarāvasampuṭe kṣiptvā yāmāndvādaśakaṃ pacet

svāṅgaśītaṃ samādāya tālakaṃ tu mṛtaṃ bhavet /
galatkuṣṭhaṃ hareccaiva tālakaṃ ca na saṃśayaḥ

<manaḥśilāśodhana>
agastipatratoyena bhāvitā saptavārakam /
śṛṅgaverarasair vāpi viśudhyati manaḥśilā

<manaḥśilāguṇāḥ>
kaṭuḥ snigdhā śilā tiktā kaphaghnī lekhanī parā /
bhūtāveśāmayaṃ hanti kāsaśvāsaharā śubhā

<rasakaśodhanam>
nṛmūtraiḥ kharamūtraiśca saptāhaṃ rasakaṃ pacet /
dolāyantrena saṃśodhya tataḥ kāryeṣu yojayet

<tutthaśodhana>
otorviṣṭhāsamaṃ tutthaṃ sakṣaudraṃ ṭaṃkaṇādbhiṣak /
trividhaṃ puṭitaṃ śuddhaṃ vāntibhrāntivivarjitam

<tutthaguṇāḥ>
tutthakaṃ kaṭu sakṣāraṃ kaṣāyaṃ viśadaṃ laghu /
lekhanaṃ bhedī cakṣuṣyaṃ kaṇḍūkṛmiviṣāpaham

<vimala>
jambīrasya rase svinnā meṣaśṛṅgīrase'thavā /
rambhātoyena vā pācyaṃ ghasraṃ vimalaśuddhaye

<mākṣikaśodhana (?)>
sindhūdbhavasya bhāgaikaṃ tribhāgaṃ mākṣikasya ca /
kṛtvā tadāyase pātre lohadarvyātha cālayet

sindūrābhaṃ bhaved yāvat tāvanmṛdvagninā pacet /
subhadraṃ mākṣikaṃ vidyāt sarvayogeṣu yojayet

<mākṣikamāraṇam>
mākṣikasya caturthāṃśaṃ dattvā gandhaṃ vimardayet /
ūrubūkasya tailena tataḥ kāryā sucakrikā

śarāvasampuṭe kṛtvā puṭed gajapuṭena ca /
sindūrābhaṃ bhaved bhasma mākṣikasya na saṃśayaḥ

<mākṣikaguṇāḥ>
mākṣikaṃ tiktamadhuraṃ mehārśaḥkṣayakuṣṭhanut /
kaphapittaharaṃ balyaṃ yogavāhi rasāyanam

<kāsīsaśodhanam>
sakṛd bhṛṅgāmbunā svinnaṃ kāsīsaṃ nirmalaṃ bhavet

<kāsīsaguṇāḥ>
kāsīsaṃ śītalaṃ snigdhaṃ svinnaṃ netrarujāpaham /
pittāpasmāraśamanaṃ rasavad guṇakārakam

<kāntapāṣāṇa>
lavaṇāni tathā kṣārau śobhāñjanarase kṣipet /
amlavargayute cādau dinam ardhaṃ vibhāvayet

taddravair dolakāyantre divasaṃ pācayet sudhīḥ /
kāntapāṣāṇaśuddhau tu rasakarma samācaret

<varāṭikāḥ>
pītābhā granthilāḥ pṛṣṭhe dīrghavṛttā varāṭikāḥ /
sārdhaniṣkabharāḥ śreṣṭhā niṣkabhārāśca madhyamāḥ

pādonaniṣkabhārāśca kaniṣṭhāḥ parikīrtitāḥ /
rasavaidyavinirdiṣṭās tāś carācarasaṃjñakāḥ

<varāṭāśodhanam>
varāṭā kāñjike svinnā yāmācchuddhim avāpnuyāt /
<varāṭaguṇāḥ>
pariṇāmādiśūlaghnī grahaṇīkṣayanāśinī

kaṭūṣṇā dīpanī vṛṣyā netryā vātakaphāpahā /
rasendrajāraṇe proktā viḍadravyeṣu śasyate

<hiṅgulaśodhana>
meṣīkṣīreṇa daradamamlavargaiśca bhāvitam /
saptavāraṃ prayatnena śuddhimāyāti niścitam

<hiṅgulaguṇāḥ>
tiktoṣṇaṃ hiṅgulaṃ divyaṃ rasagandhakasambhavam /
mehakuṣṭhaharaṃ rucyaṃ balyaṃ medhāgnidīpanam

<śilājatuśodhana>
godugdhatriphalābhṛṅgadravaiḥ piṣṭaṃ śilājatu /
dinaikaṃ lohaje pātre śuddhimāyātyasaṃśayaḥ

<śilājatuguṇāḥ>
śilājatu bhavettiktaṃ kaṭūṣṇaṃ ca rasāyanam /
kṣayaśoṣodarārśāṃsi hanti bastirujo jayet

sauvīraṃ ṭaṃkaṇaṃ śaṃkhaṃ kaṅkuṣṭhaṃ gairikaṃ tathā /
ete varāṭavacchodhyā bhaveyurdoṣavarjitāḥ

<ratnaśodhanam>
śudhyatyamlena māṇikyaṃ jayantyā mauktikaṃ tathā /
vidrumaṃ kṣāravargeṇa tārkṣyaṃ godugdhakaistathā

puṣparāgaṃ ca sandhānaiḥ kulatthakvāthasaṃyutaiḥ /
taṇḍulīyajalair vajraṃ nīlaṃ nīlīrasena ca

rocanābhiśca gomedaṃ vaidūryaṃ triphalājalaiḥ /
lakucadrāvasampiṣṭaiḥ śilāgandhakatālakaiḥ /
<ratnamāraṇa>
vajraṃ vinānyaratnāni mriyante 'ṣṭapuṭaiḥ khalu

<maṇiguṇāḥ>
muktāvidrumavajrendravaidūryasphaṭikādikam

maṇiratnaṃ kharaṃ śītaṃ kaṣāyaṃ svādu lekhanam /
cakṣuṣyaṃ dhāraṇāttaṃ tu pāpālakṣmīviṣāpaham