Rasādhyaya, 1-302+com with Ṭīkā · Verses 136-155xx54x

tasminnaṣṭaguṇe jīrṇe dhmātaṃ śāmyati pāradaḥ
haṭhena vahninādhmātaḥ sthirībhūtasuvarṇavat //

rūpyagadyāṇakayāco hy anenābhyañjya gālite
daśavarṇaṃ bhaveddhema kathitaṃ rasavedibhiḥ //

abhrakasya ca pattrāṇi ślakṣṇacūrṇīkṛtāni ca
karpāsīrasatoyena marditāni dinatrayam //

mātuliṅgakanakasyāpi vārkatoyena mardayet
kṣiptvā ṭaṅkaṇakṣāraṃ ca navasāraṃ tathaiva ca //

khalvamadhye tataḥ kṣiptvā mardayet prativāsaram
rasaiḥ pūrvoditair bhūyo yāvat tad gilate sphuṭam //

yavākhyākadalīśigru ciñcāphalapunarnavā
śatamūlai rasairabhraṃ bhāvitaṃ munisaṃkhyayā //

tadgrāsaṃrasarājo'sau sukhaṃ bhukte vare mukhe
saṃjāte dehasiddhyarthaṃ dhātusiddhyarthameva hi //

svalpamapyabhrakaṃ sūto yadi gṛhṇāti cetsukham
badhyate svagṛhāntastho yathā cauro 'ticañcalaḥ //

kumārī kadalī vajrī jārī hemapādī naṭī
bṛhatī cāgnidamanī lāṅgalī samabhāgataḥ //

pattrābhram abhracūrṇaṃ vā (vanyaṃ) malanīguṇabhāvitam
taptena lohacūrṇena piṣṭiḥ syānmardane rase //

lohakhalve catuṣpāde sūtagrastābhrakaṃ kṣipet
catuḥṣaṣṭyaṃśabhāgena cūrṇaṃ kāntāyasaṃ rasāt //

kāñjikenaiva saṃddāṣṭaṃ bavveraṃ yac ca thūthakam
tattathā vai viḍaṃ proktaṃ candanaṃ rasavedibhiḥ //

thūthāviḍena sampiṣṇan mṛdvagniṃ jvālayedadhaḥ
sūtādaṣṭaguṇaṃ lohaṃ jāraṇīyaṃ sadā budhaiḥ //

aprāptau kāntalohasya cūrṇaṃ tīkṣṇasya saṃkṣipet
catuḥṣaṣṭitamaṃ cāṃśaṃ jīrṇo jīrṇe kṣipen muhuḥ //

sūto'sau jīrṇalohaḥ san godhūmābhaḥ kaṣāyataḥ
pāśito rāgasahano jāto rāgaśca jīryati //

lohakhalve catuṣpāde jīrṇalohaṃ rasaṃ kṣipet
ayaḥ prakāśe rājeśca catuḥṣaṣṭyaṃśacūrṇakam //

thūthāviḍena sampiṣya mṛdvagnir jvālayed adhaḥ
sūtādaṣṭaguṇā jāryā rājiścāyaḥprakāśikā //

ayaḥprakāśarājau ca jīrṇāyāṃ pītatā bhavet
raktatāpādanārthaṃ ca himarājiṃ ca jārayet //

lohakhalvacatuṣpāde saṃjīrṇāyaḥprakāśikam
pāradaṃ hemarājeśca catuḥṣaṣṭyaṃśacūrṇakam //

thūthāviḍena sampiṣya mṛdvagniṃ jvālayedadhaḥ
sūtādaṣṭaguṇā jāryā hemarājiśca kovidaiḥ //