Rasādhyaya, 1-302+com with Ṭīkā · Verses 116x-135

bhūkhagaṭaṅkaṇamanaḥśilalavaṇāsuriśigrukāñcikais tridinam /
svedena dīnadīpto'sau grāsārthī jāyate sūtaḥ //

vyāptāsya kācakumpyataḥ sal lūṇaṃ naimbukaṃ rasam
palaṃ dhānyābhrakaṃ kṣiptvā limped vastramṛdā mukham //

mukhe koḍīyakaṃ dadyāt kuḍīkāvālukābhṛtā
kumpikāṃ vālukāmadhye kṣiptvā copari vālukām //

pradāyādho'ṣṭayāmaṃ ca haṭhāgniṃ jvālayet sudhīḥ
palaṃ dhānyābhrakaṃ caikaṃ jāraṇīyam aharniśam //

sūtādaṣṭaguṇaṃ jāryaṃ dhānyābhraṃ rasavedinā
nāmnāsau gaganagrāsaḥ pāradaḥ parikīrtitaḥ //

ekapattrīkṛtaṃ sarvam abhrakaṃ tadanantaram
taptakharparavinyastaṃ pradahettīvravahninā //

agastipuṣpatoye ca kumudānāṃ rasena ca
varṣābhūtundalīyena maricaiḥ sumukhena ca //

māhiṣeṇaiva dugdhena sārayitvābhrakaṃ tataḥ
yavaviccikatoyena plāvayitvā puṭe pacet //

maricāsurīsiddhārtha viṣacūrṇaiśca sūtakam
svedayet kāñjike baddhaṃ dolāyāṃ divasatrayam //

evaṃ svinno rasaḥ paścāt kāñjike yavaviccikām
samūlapattrāṃ saṃkuṭya saṃdhayitvā vicakṣaṇaḥ //

kāñjike jāyate devya rasabandhe tu nityaśaḥ
hemā kriyā hemamukhe tāre tāramukhaṃ kṛtam //

yavaviccikatoyena svedayan svedayed budhaḥ
lohāgre bhramatho śāla sudagdhaṃ varṣayet tathā //

jīrṇasya lakṣaṇaṃ jñeyaṃ jalaukādaṇḍadhāriṇaḥ
dvitīye kākaviṣṭābhaṃ tṛtīye tailako bhavet //

kapilo 'tha nihṛdgāro vipruṣo naiva muñcati
agnau hi ghrātanikvastho vyomajīrṇasya lakṣaṇam //

atha vaikṛtakasparśād divyauṣadhimukhaṃ prati
atha ha carati kṣipraṃ kṣaṇādeva nibadhyate //

tato lohakapālasthaṃ svedayenmṛduvahninā
sukhoṣṇenāranālena prakṣālitarasaṃ budhaḥ //

evam abhrakajīrṇasya rasasyāṣṭamabhāgataḥ
viḍaṃ dadyāc ca vidhivaj jārayet taṃ vicakṣaṇaḥ //

evaṃ ṣaḍguṇajīrṇaṃ tu sūtakaṃ jārayet budhaḥ
bhūmau lagati yatkṣipraṃ taddhānyābhrakam ucyate
abhrake dviguṇe jīrṇe dhūmavyājena gacchati //

jīrṇe caturguṇe tasmin gatiśaktirvihanyate
utplutyotplutya bāhye ca mūṣāyāḥ patati dhruvam //

jīrṇe ca ṣaḍguṇe sūtaṃ kampate 'sau muhurmuhuḥ
bāhye coḍḍīya no yāti sthitaḥ sthāne sthirāyate //