Rāmāyaṇa-southern-2 (southern recension) · Chapter 2.63

Rāmāyaṇa, Ayodhyākāṇḍa, 63
yām eva rātriṃ te dūtāḥ praviśanti sma tāṃ purīm /
bharatenāpi tāṃ rātriṃ svapno dṛṣṭo 'yam apriyaḥ

vyuṣṭām eva tu tāṃ rātriṃ dṛṣṭvā taṃ svapnam apriyam /
putro rājādhirājasya subhṛśaṃ paryatapyata

tapyamānaṃ samājñāya vayasyāḥ priyavādinaḥ /
āyāsaṃ hi vineṣyantaḥ sabhāyāṃ cakrire kathāḥ

vādayanti tathā śāntiṃ lāsayanty api cāpare /
nāṭakāny apare prāhur hāsyāni vividhāni ca

sa tair mahātmā bharataḥ sakhibhiḥ priyavādibhiḥ /
goṣṭhīhāsyāni kurvadbhir na prāhṛṣyata rāghavaḥ

tam abravīt priyasakho bharataṃ sakhibhir vṛtam /
suhṛdbhiḥ paryupāsīnaḥ kiṃ sakhe nānumodase

evaṃ bruvāṇaṃ suhṛdaṃ bharataḥ pratyuvāca ha /
śṛṇu tvaṃ yannimittaṃ me dainyam etad upāgatam

svapne pitaram adrākṣaṃ malinaṃ muktamūrdhajam /
patantam adriśikharāt kaluṣe gomayahrade

plavamānaś ca me dṛṣṭaḥ sa tasmin gomayahrade /
pibann añjalinā tailaṃ hasann iva muhur muhuḥ

tatas tilodanaṃ bhuktvā punaḥ punar adhaḥśirāḥ /
tailenābhyaktasarvāṅgas tailam evāvagāhata

svapne 'pi sāgaraṃ śuṣkaṃ candraṃ ca patitaṃ bhuvi /
sahasā cāpi saṃśāntaṃ jvalitaṃ jātavedasam

avadīrṇāṃ ca pṛthivīṃ śuṣkāṃś ca vividhān drumān /
ahaṃ paśyāmi vidhvastān sadhūmāṃś caiva parvatān

pīṭhe kārṣṇāyase cainaṃ niṣaṇṇaṃ kṛṣṇavāsasam /
prahasanti sma rājānaṃ pramadāḥ kṛṣṇapiṅgalāḥ

tvaramāṇaś ca dharmātmā raktamālyānulepanaḥ /
rathena kharayuktena prayāto dakṣiṇāmukhaḥ

evam etan mayā dṛṣṭam imāṃ rātriṃ bhayāvahām /
ahaṃ rāmo 'tha vā rājā lakṣmaṇo vā mariṣyati

naro yānena yaḥ svapne kharayuktena yāti hi /
acirāt tasya dhūmāgraṃ citāyāṃ sampradṛśyate /
etannimittaṃ dīno 'haṃ tan na vaḥ pratipūjaye // RamS_2,63.16* //
śuṣyatīva ca me kaṇṭho na svastham iva me manaḥ /
jugupsann iva cātmānaṃ na ca paśyāmi kāraṇam

imāṃ hi duḥsvapnagatiṃ niśāmya tām anekarūpām avitarkitāṃ purā /
bhayaṃ mahat taddhṛdayān na yāti me vicintya rājānam acintyadarśanam