Rājataraṅginī · Verses 967-976

pratyabdaṃ pratihāryādyair yo vyadhāt prītim arthinām /
satyavrato divam agān Mahimaśrīs sa Ṭhakkuraḥ

tadgotrajebhyas sa kilāgūḍhaṃ tasya vadhaṃ vyadhāt /
yo dūtyacchalato rājñā svadeśān niravāsyata

rājñas saindhavaśulkādisthāne Sondhyābhidhe pure /
pratyāgatas sa tīrthādhvakhinno Vinno divaṃ yayau

rājño dharmādhikāreṣu pratyavekṣāparas sadā /
mahāśrīŚiryabhaṭṭo 'pi tasmin kāle divaṃ yayau

gateṣv apy eṣu dharmo 'sya rājño naivālpatāṃ gataḥ /
kṣmāṃ dadhānasya Śeṣasya Diggajā hi paricchadaḥ

ekāha eva dīnnārakoṭir ekā mahībhujā /
bālebhya eva dattāsīj Jayyabhaṭṭamukhena yat

adbhūtānāṃ padārthānāṃ tadrājye saṅgraho 'bhavat /
Nārāyaṇāvatāro 'yaṃ jñāyeta katham anyathā

yeṣāṃ himāṃśupīyūṣapravāhā nityabhikṣavaḥ /
ikṣavas tena Mārtāṇḍadeśabhūmiṣu ropitāḥ

tyajatā yogamāhātmyād valīpalitavikriyām /
śrīJainollābhadenena vibudhatvaṃ prakāśitam

udīpe sasyasampatter upaplavakarīṃ vyadhāt /
Tūlamūlād apākṛṣya Sindhuṃ Bhārosagāminīm