રાજતરઙ્ગિની · શ્લોક 967-976

પ્રત્યબ્દં પ્રતિહાર્યાદ્યૈર્ યો વ્યધાત્ પ્રીતિમ્ અર્થિનામ્ ।
સત્યવ્રતો દિવમ્ અગાન્ મહિમશ્રીસ્ સ ઠક્કુરઃ

તદ્ગોત્રજેભ્યસ્ સ કિલાગૂઢં તસ્ય વધં વ્યધાત્ ।
યો દૂત્યચ્છલતો રાજ્ઞા સ્વદેશાન્ નિરવાસ્યત

રાજ્ઞસ્ સૈન્ધવશુલ્કાદિસ્થાને સોન્ધ્યાભિધે પુરે ।
પ્રત્યાગતસ્ સ તીર્થાધ્વખિન્નો વિન્નો દિવં યયૌ

રાજ્ઞો ધર્માધિકારેષુ પ્રત્યવેક્ષાપરસ્ સદા ।
મહાશ્રીશિર્યભટ્ટો ઽપિ તસ્મિન્ કાલે દિવં યયૌ

ગતેષ્વ્ અપ્ય્ એષુ ધર્મો ઽસ્ય રાજ્ઞો નૈવાલ્પતાં ગતઃ ।
ક્ષ્માં દધાનસ્ય શેષસ્ય દિગ્ગજા હિ પરિચ્છદઃ

એકાહ એવ દીન્નારકોટિર્ એકા મહીભુજા ।
બાલેભ્ય એવ દત્તાસીજ્ જય્યભટ્ટમુખેન યત્

અદ્ભૂતાનાં પદાર્થાનાં તદ્રાજ્યે સઙ્ગ્રહો ઽભવત્ ।
નારાયણાવતારો ઽયં જ્ઞાયેત કથમ્ અન્યથા

યેષાં હિમાંશુપીયૂષપ્રવાહા નિત્યભિક્ષવઃ ।
ઇક્ષવસ્ તેન માર્તાણ્ડદેશભૂમિષુ રોપિતાઃ

ત્યજતા યોગમાહાત્મ્યાદ્ વલીપલિતવિક્રિયામ્ ।
શ્રીજૈનોલ્લાભદેનેન વિબુધત્વં પ્રકાશિતમ્

ઉદીપે સસ્યસમ્પત્તેર્ ઉપપ્લવકરીં વ્યધાત્ ।
તૂલમૂલાદ્ અપાકૃષ્ય સિન્ધું ભારોસગામિનીમ્