Rājataraṅginī · Verses 927-946

[Ps-JRT 120]
tadāstike kumbhakāre gate tasmāt purād drutam /
nāgendro jalapūreṇa sarvam avroḍayat puram // JRt_B.1213 //
yāvat paurāḫ purāc celus te sarve hariṇā iva /
tāvad evāgram ākrāmad dāvāgnir iva tajjalam // JRt_B.1214 //
phaṇāśatollasadvāridhārāśabdabhayaṅkaraḥ /
nāgarājo 'tha nagarīṃ vairīvāveṣṭayaj jalaiḥ

mantrān paṭhatsu vipreṣu 10janeṣu praṇamatsv atha /
rudatsv api ca bāleṣu nāsyābhūd Yamavad dayā

bhayād bāleṣu putreṣu kaṇṭhalagneṣu yoṣitaḥ /
vāṣpamuktāphalaiś cakruḫ pūjāṃ phaṇipater iva

pādād aṅkaṃ tataẖ kaṇṭhaṃ tatas skandhaṃ tataś śiraḥ /
prāṇā iva sutā jagmur mātṝṇāṃ bhayavihvalāḥ

sarvāṇy aṅgāni nārīṇāṃ śṛṅgārīvānurāgavān /
kampamānāni lolas sa jalapūras samaspṛśat

hrasvaṃ dīrghaṃ ca sūkṣmaṃ ca sthūlaṃ cāṇu mahat tathā /
andhakāra ivācchādya jalapūro vyajṛmbhata

agādhe salile tasmin khalasparśāsahas tataḥ /
phaṇirājas sthitiṃ cakre vipine sajjano yathā

Kāliyas sa hi nāgendraḫ padākrānto Muradviṣā /
śirasy utpannapadmatvān Mahāpadmābhidhāṃ gataḥ

naṣṭān yojayituṃ bhūyaẖ Kaśmīrān icchato Hareḥ /
avatāras tvam etat te sidhyaty eva cikīrṣitam"

rājā śrutveti sa svapne kṣaṇam evam acintayat /
"evaṃvidhāni kāryāṇi sidhyeyuẖ katham anyathā

prajācāraviparyāsān nākṣamiṣṭa puraṃ phaṇī /
nāniṣṭaṃ sahate 'lpo 'pi tādṛśas tu mahān katham

nāgarājocitaṃ chattrasagotram aham atra tu /
sthalamātraṃ yaśoratnaghaṭikārabhyam ārabhe

Ullolasaraso madhye vartamāne mahāsthale /
pavitre vijane cātra siddhiṃ yāsyanti sādhakāḥ"

cintayitveti bhūpālaś śilāpravahaṇair dṛḍhaiḥ /
Ullolasaraso madhyam apy agādham apūrayat

sarasas tu tatas tasya sthalībhūte 'tha bhūpatiḥ /
madhyadeśe mahārājo Jainalaṅkāṃ vinirmame

ante tasyaiva saraso rākṣasendraprasādataḥ /
Jayāpīḍamahīpālas sthalabhāvam adāpayat

hemante bisaśṛṅgāṭakavukoddharaṇādinā /
śrīJayāpīḍakoṭṭasya jñāyate 'gādhavartitā

Ullolasyāntabhāgeṣu Suyyākuṇḍalakādayaḥ /
dṛśyante bahavo grāmā viśālasadanāṅkitāḥ

girayo 'pi nimajjanti yatra tatra tu sa vyadhāt /
Jainalaṅkāṃ mahāṭaṅkāṃ taṃ nidhāyādhikāriṇam

Ruyyabhāṇḍapatiṃ śilpakauśalābhyullasanmatim /
rājadhānīmahādvāraṃ naṣṭaṃ yo 'yojayat punaḥ