રાધાકૃષ્ણાષ્ટકાલીયલીલાસ્મરણક્રમપદ્ધતિ · શ્લોક 161-171

દ્વાત્રિંશદ્-અક્ષરાદીનાં મન્ત્રાણાં ક્રમેણ ફલં યથા પાદ્મે--
દ્વાત્રિંશદ્-અક્ષરં મન્ત્રં નામ-ષોડશકાન્વિતમ્ ।
પ્રજપન્ વૈષ્ણવો નિત્યં રાધા-કૃષ્ણ-સ્થલં લભેત્

ગૌતમીય-તન્ત્રે ચ--
અહર્-નિશં જપેન્ મન્ત્રં મન્ત્રી નિયત-માનસઃ ।
સ પશ્યતિ ન સન્દેહો ગોપ-રૂપિણમ્ ઈશ્વરમ્

ગૌરી-તન્ત્રે ચ--
શ્રીમદ્-અષ્ટાક્ષરં મન્ત્રં રાધાયાઃ પ્રેમ-સિદ્ધિ-દમ્ ।
પ્રજપેત્ સાધકો યસ્ તુ સ રાધાન્તિકમ્ આપ્નુયાત્

સનત્-કુમાર-સંહિતાયામ્--
જપેદ્ યઃ કામ-ગાયત્રીં કામ-બીજ-સમન્વિતામ્ ।
તસ્ય સિદ્ધિર્ ભવેત્ પ્રેમ રાધા-કૃષ્ણ-સ્થલં વ્રજેત્

એતાં પઞ્ચ-પદીં જપ્ત્વા શ્રદ્ધયા ઽશ્રદ્ધયાસકૃત્ ।
વૃન્દાવને તયોર્ દાસ્યં ગચ્છત્ય્ એવ ન સંશયઃ

કિશોરી-તન્ત્રે ચ--
એતાન્ સખીનામ્ અષ્ટાનાં મન્ત્રાન્ યઃ સાધકો જપેત્ ।
શ્રી-રાધા-કૃષ્ણયોઃ ક્ષિપ્રં વિહાર-સ્થલમ્ આપ્નુયાત્

તત્રૈવ--
મન્ત્રાન્ એતાન્ મઞ્જરીણામ્ અષ્ટાનાં યો જપેત્ સદા ।
પ્રેમ-સિદ્ધિર્ ભવેત્ તસ્ય શ્રી-વૃન્દાવનમ્ આપ્નુયાત્

સ્મરણાનન્તરં સિદ્ધ-દેહસ્યૈવ ચ સાધકઃ ।
અષ્ટ-કાલોદિતાં લીલાં સંસ્મરેત્ સાધકાઙ્ગકઃ

કાલૌ નિશાન્ત-પૂર્વાહ્નાવ્ અપરાહ્ન-પ્રદોષકૌ ।
વિજ્ઞેયૌ ત્રિ-ત્રિ-ઘટિકૌ પ્રાતઃ સાયં દ્વયં દ્વયમ્

દ્વિ-દ્વિ-પ્રઘટિકૌ જ્ઞેયૌ મધ્યાહ્ન-રાત્રિકાવ્ ઇતિ

એતેષુ સમયેષ્વ્ એવં યા યા લીલા પુરોદિતા ।
તાં તામ્ એવ યથા-કાલં સંસ્મરેત્ સાધકો જનઃ