Prajñāpāramitāpiṇḍārtha · Verses 41-58

ityekatvavikalpasya bāddhā(dhyā?)nānātvakalpanam(nā?) /
ruṇāddhi nānyattadrūpaṃ śūnyatāyāṃ kathañcana

asadeva yataḥ khyāti tadavidyāvinirmitam /
asatkhyāpanaśaktyaiva sāvidyeti nigadyate

idamevocyate rūpaṃ prajñāpāramiteti ca /
advayaṃ dvayamevaitadvikalpadvayabādhanam

yuktiṃ cāha viśuddhatvāttathā cānupalambhataḥ /
bhāvābhāvavirodhācca nānātvamapi paśyati

nāmamātramidaṃ rūpaṃ tattvato hyasvabhāvakam /
tatsvabhāvavikalpānāmavakāśaṃ nirasyati

rūpaṃ rūpasvabhāvena śūnyaṃ yatprathamoditam /
tatsvabhāvasamāropasaṅkalpapratiṣedhanam

notpādaṃ na nirodhaṃ ca dharmāṇāṃ paśyatīti yat /
bhagavānāha, tadvayastā tadviśeṣasya kalpanā

kṛtrimaṃ nāma vācyāśca dharmāste kalpitā yataḥ /
śabdārthayorna sambandhastena svābhāviko mataḥ

bāhyārthābhiniveśastu bhrāntyā bālasya jṛmbhate /
tathaiva vyavahāro 'yaṃ tvatrārtho 'sti kaścana

atra tena yathā nāma kalpyate na tathāsti tat /
vācyaṃ vastu tato niṣṭhā yathānāmārthakalpanā

prajñāpāramitā buddho bodhisattvo 'pi vā tathā /
nāmamātramiti prāha vyasan satyārthakalpanam

śabdārthapratiṣedho 'yaṃ na vastu vinivāryate /
evamanyeṣvapi jñeyo vākyeṣvarthaviniścayaḥ

naivopalabhate samyak sarvanāmāni tattvavit /
yathārthatvena tenedaṃ na dhvanervinivāraṇam

subhūtistu dvayaṃ vyasan śabdaṃ śabdārthameva ca /
bodhisattvasya no nāma paśyāmīti sa uktavān

prajñāpāramitāvākyaṃ nāsti yanneyatā gatam /
ūhyāstu kevalaṃ te 'rthā[stadevaṃ]sūkṣmayā dhiyā

prakrāntārthatiraskāro yā cārthāntarakalpanā /
prajñāpāramitāyāṃ hi proktā sā prativarṇikā

etāvānarthasaṅkṣepaḥ prajñāpāramitāśrayaḥ /
āvartya(rta?)te sa evārthaḥ punararthāntarāśritaḥ

prajñāpāramitāṃ samyak saṅgṛhyāṣṭasahasrikām /
yatpuṇyamāptaṃ tenāstu prajñāpāramito janaḥ