Prajñāpāramitāpiṇḍārtha · Verses 1-20

Ācāryadignāgaviracitaḥ
Prajñāpāramitāpiṇḍārthaḥ (Pppa)
/ namaḥ prajñāpāramitāyai //
prajñāparamitā jñānamadvayaṃ sā tathāgataḥ /
sādhyā tādarthyayogena tācchabdyaṃ granthamārgayoḥ

āśrayaścādhikāraśca karma bhāvanayā saha /
prabhedo liṅgamāpacca sānuśaṃsamudāhṛtam

śradvāvatāṃ pravṛtyaṅgaṃ śāstā parṣacca sākṣiṇī /
deśakālau ca nirdiṣṭau svaprāmāṇyaprasiddhaye

saṅgītikartā loke hi deśakālopalakṣitam /
sasākṣikaṃ vadan vaktā prāmāṇyamadhigacchati

sarvaṃ caitannipātātmaśravaṇādeḥ prakīrtanam /
prāsaṅgikaṃ tu evārthā mukhyā dvātriṃśadeva hi

prabhedaḥ ṣoḍaśākāraḥ śūnyatāyā yathākramam /
nirdiṣṭo 'ṣṭāsahastrayā sa vijñeyo 'nyāpadeśataḥ

itthamaṣṭasahasrīyamanyūnārthairyathoditaiḥ /
granthasaṅkṣepa iṣṭo 'tra ta evārthā yathoditāḥ

bodhisattvaṃ na paśyāmītyuktavāṃstattvato muniḥ /
bhoktādhyātmikavastūnāṃ kathitā tena śūnyatā

rūpaṃ rūpasvabhāvena śūnyamityuktitaḥ punaḥ /
bāhyānyāyatanānīha bhojyāni pratiṣiddhavān

rūpādyabhāve taddehapratiṣṭhālakṣaṇakṣatiḥ /
gatārthā yena taddṛṣṭaṃ tadādhyātmikamityasat

ādhyātmikānāṃ śūnyatve prakṛterapi śūnyatā /
vijñānarūpaṃ gotraṃ hi kṛpāprajñātmakaṃ matam

notpanno na niruddho vā sattva ityādinā sphuṭam /
sattvasaṃsārayoḥ kāmaṃ darśitā tena śūnyatā

buddhadharmāṃstathā bodhisattvadharmānna paśyati /
ityādinā vinirdiṣṭā śūnyā daśabalādayaḥ

prati prati yato dharmāḥ kalpitā iti kīrtitam /
tato na paramārtho 'sti dharmāṇāmiti coktavān

ātmādidṛṣṭerucchedaṃ mahatyā prakaroti yat /
tataḥ pudgalanairātmyaṃ bhagavān sarvathā jagau

sarvadharmā anutpannā iti kīrtayatā tathā /
kathitaṃ dharmanairātmyaṃ sarvathā tattvavedinā

sāvadyaniravadyānāmavṛddhiparihāṇitaḥ /
saṃskṛtāsaṃskṛtānāṃ ca kuśalānāṃ nirākṛtiḥ

kuśalānāṃ ca śūnyatve tadgatā akṣatā tathā /
kalpitaiveti bhedānāṃ śūnyatāyāḥ sa saṅgrahaḥ

daśabhiścittavikṣepaiścittaṃ vikṣiptamanyataḥ /
yogyaṃ bhavati bālānāṃ nādvayajñānasādhane

tānapākartumanyonyaṃ vipakṣapratipakṣataḥ /
prajñāpāramitāgranthaste ca sampiṇḍaya darśitāḥ