Pāśupatasūtra · Chapter 5

asaṅgaḥ //

yogī //

nityātmā //

ajaḥ //

maitraḥ //

abhijāyate //

indriyāṇām abhijayāt //

rudraḥ provāca tāvat //

śūnyāgāraguhāvāsī //

devanityaḥ //

jitendriyaḥ //

ṣaṇmāsān nityayuktasya //

bhūyiṣṭhaṃ saṃpravartate //

bhaikṣyam //

pātrāgatam //

māṃsam aduṣyaṃ lavaṇena vā //

āpo vāpi yathākālam aśnīyād anupūrvaśaḥ //

godharmā mṛgadharmā vā //

adbhir eva śucir bhavet //

siddhayogī na lipyate karmaṇā pātakena vā //

ṛcam iṣṭām adhīyīta gāyatrīm ātmayantritaḥ //

raudrīṃ vā bahurūpīṃ vā //

ato yoga pravartate //

oṃkāram abhidhyāyīta //

hṛdi kurvīta dhāraṇām //

ṛṣir vipro mahān eṣaḥ //

vāgviśuddhaḥ //

maheśvaraḥ //

śmaśānavāsī //

dharmātmā //

yathālabdhopajīvakaḥ //

labhate rudrasāyujyam //

sadā rudram anusmaret //

chittvā doṣāṇāṃ hetujālasya mūlam //

buddhyā //

saṃcittam //

sthāpayitvā ca rudre //

ekaḥ kṣemī san vītaśokaḥ //

apramādī gacched duḥkhānām antam īśaprasādāt //

atredaṃ brahma japet //

īśānaḥ sarvavidyānām //

īśvaraḥ sarvabhūtānām //

brahmaṇo 'dhipatir brahmā //

śivo me astu //

sadā //

śivaḥ //