Pāśupatasūtra · Chapter 4

gūḍhavidyā tapa ānantyāya prakāśate //

gūḍhavrataḥ //

gūḍhapavitravāṇiḥ //

sarvāṇi dvārāṇi pidhāya //

buddhyā //

unmatavad eko vicareta loke //

kṛtānnam utsṛṣṭam upādadīta //

unmatto mūḍha ity evaṃ manyante itare janāḥ //

asanmāno hi yantrāṇāṃ sarveṣām uttamaḥ smṛtaḥ //

indro vā agre asureṣu pāśupatam acarat //

sa teṣām iṣṭāpūrtam ādatta //

māyayā sukṛtayā samavindata //

nindā hy eṣānindā tasmāt //

nindyamānaś caret //

aninditakarmā //

sarvaviśiṣṭo 'yaṃ panthāḥ //

satpathaḥ //

kupathās tv anye //

anena vidhinā rudrasamīpaṃ gatvā //

na kaścid brāhmaṇaḥ punar āvartate //

atredaṃ brahma japet //

tatpuruṣāya vidmahe //

mahādevāya dhīmahi //

tan no rudraḥ pracodayāt //