पाशुपतसूत्र · अध्याय 5

असङ्गः ॥

योगी ॥

नित्यात्मा ॥

अजः ॥

मैत्रः ॥

अभिजायते ॥

इन्द्रियाणाम् अभिजयात् ॥

रुद्रः प्रोवाच तावत् ॥

शून्यागारगुहावासी ॥

देवनित्यः ॥

जितेन्द्रियः ॥

षण्मासान् नित्ययुक्तस्य ॥

भूयिष्ठं संप्रवर्तते ॥

भैक्ष्यम् ॥

पात्रागतम् ॥

मांसम् अदुष्यं लवणेन वा ॥

आपो वापि यथाकालम् अश्नीयाद् अनुपूर्वशः ॥

गोधर्मा मृगधर्मा वा ॥

अद्भिर् एव शुचिर् भवेत् ॥

सिद्धयोगी न लिप्यते कर्मणा पातकेन वा ॥

ऋचम् इष्टाम् अधीयीत गायत्रीम् आत्मयन्त्रितः ॥

रौद्रीं वा बहुरूपीं वा ॥

अतो योग प्रवर्तते ॥

ओंकारम् अभिध्यायीत ॥

हृदि कुर्वीत धारणाम् ॥

ऋषिर् विप्रो महान् एषः ॥

वाग्विशुद्धः ॥

महेश्वरः ॥

श्मशानवासी ॥

धर्मात्मा ॥

यथालब्धोपजीवकः ॥

लभते रुद्रसायुज्यम् ॥

सदा रुद्रम् अनुस्मरेत् ॥

छित्त्वा दोषाणां हेतुजालस्य मूलम् ॥

बुद्ध्या ॥

संचित्तम् ॥

स्थापयित्वा च रुद्रे ॥

एकः क्षेमी सन् वीतशोकः ॥

अप्रमादी गच्छेद् दुःखानाम् अन्तम् ईशप्रसादात् ॥

अत्रेदं ब्रह्म जपेत् ॥

ईशानः सर्वविद्यानाम् ॥

ईश्वरः सर्वभूतानाम् ॥

ब्रह्मणो ऽधिपतिर् ब्रह्मा ॥

शिवो मे अस्तु ॥

सदा ॥

शिवः ॥