पाशुपतसूत्र · अध्याय 4

गूढविद्या तप आनन्त्याय प्रकाशते ॥

गूढव्रतः ॥

गूढपवित्रवाणिः ॥

सर्वाणि द्वाराणि पिधाय ॥

बुद्ध्या ॥

उन्मतवद् एको विचरेत लोके ॥

कृतान्नम् उत्सृष्टम् उपाददीत ॥

उन्मत्तो मूढ इत्य् एवं मन्यन्ते इतरे जनाः ॥

असन्मानो हि यन्त्राणां सर्वेषाम् उत्तमः स्मृतः ॥

इन्द्रो वा अग्रे असुरेषु पाशुपतम् अचरत् ॥

स तेषाम् इष्टापूर्तम् आदत्त ॥

मायया सुकृतया समविन्दत ॥

निन्दा ह्य् एषानिन्दा तस्मात् ॥

निन्द्यमानश् चरेत् ॥

अनिन्दितकर्मा ॥

सर्वविशिष्टो ऽयं पन्थाः ॥

सत्पथः ॥

कुपथास् त्व् अन्ये ॥

अनेन विधिना रुद्रसमीपं गत्वा ॥

न कश्चिद् ब्राह्मणः पुनर् आवर्तते ॥

अत्रेदं ब्रह्म जपेत् ॥

तत्पुरुषाय विद्महे ॥

महादेवाय धीमहि ॥

तन् नो रुद्रः प्रचोदयात् ॥