Paraśurāmakalpasūtra · Chapter 3

3. Khaṇḍa: Śrī-krama
evaṃ gaṇapatim iṣṭvā vidhūta-samasta-vighna-vyatikaraḥ śakti-cakraika-nāyikāyāḥ śrī-lalitāyāḥ kramam ārabheta

brāhme muhūrte brāhmaṇo mukta-svāpaḥ pāpa-vilāpāya parama-śiva-rūpaṃ gurum abhimṛśya

mūlâdi-vidhi-bila-paryantaṃ taḍit-koṭi-kaḍārāṃ taruṇa-divākara-piñjarāṃ jvalantīṃ mūla-saṃvidaṃ dhyātvā tad-raśmi-nihata-kaśmala-jālaḥ kâdiṃ hâdiṃ vā mūla-vidyāṃ manasā daśavāram āvartya

snāna-karmaṇi prāpte mūlena datvā triḥ salilâñjalīn tris tad-abhimantritāḥ pītvā 'pas tris santarpya triḥ prokṣyâtmānaṃ paridhāya vāsasī hrāṃ hrīṃ hrūṃ saḥ ity uktvā mārtâṇḍa-bhairavāya prakāśa-śakti-sahitāya svāheti tris savitre dattârghyaḥ

tan-maṇḍala-madhye nava-yoni-cakram anucintya vācam uccārya tripura-sundari vidmahe kāmam uccārya pīṭha-kāmini dhīmahi - śaktim uccārya, tan naḥ klinnā pracodayād iti - trir maheśyai dattârghyaḥ śatam aṣṭottaram āmṛśya manuṃ maunam ālambya

yāga-mandiraṃ gatvā kḷptâkalpas saṅkalpâkalpo vā pīṭha-manunā āsane samupaviṣṭaḥ

tritārīm uccārya rakta-dvādaśa-śakti-yuktāya dīpa-nāthāya nama iti bhūmau muñcet puṣpâñjalim

sarveṣāṃ mantrāṇām ādau tritārī-saṃyogaḥ | tritārī vāṅ-māyā-kamalāḥ

purataḥ pañca-śakti-catuḥ-śrīkaṇṭha-melana-rūpaṃ bhū-sadana-traya-vali-traya-bhūpa-patra-dik-patra-bhuvanâra-druhiṇâra-vidhi-koṇa-dik-koṇa-trikoṇa-bindu-cakra-mayaṃ mahā-cakra-rājaṃ sindūra-kuṅkuma-likhitaṃ cāmīkara-kala-dhauta-pañca-loha-ratna-sphaṭikâdy-utkīrṇaṃ vā niveśya

tatra mahā-cakre amṛtâmbhonidhaye ratna-dvīpāya nānā-vṛkṣa-mahodyānāya kalpa-vṛkṣa-vāṭikāyai santāna-vāṭikāyai hari-candana-vāṭikāyai mandāra-vāṭikāyai pārijāta-vāṭikāyai kadamba-vāṭikāyai puṣpa-rāga-ratna-prākārāya padma-rāga-ratna-prākārāya go-medha-ratna-prākārāya vajra-ratna-prākārāya vaiḍūrya-ratna-prākārāya indra-nīla-ratna-prākārāya muktā-ratna-prākārāya marakata-ratna-prākārāya vidruma-ratna-prākārāya māṇikya-maṇḍapāya sahasra-stambha-maṇḍapāya amṛta-vāpikāyai ānanda-vāpikāyai vimarśa-vāpikāyai bālâtapodgārāya candrikodgārāya mahā-śṛṅgāra-parighāyai mahā-padmâṭavyai cintā-maṇi-gṛha-rājāya pūrvâmnāya-maya-pūrva-dvārāya dakṣiṇâmnāya-maya-dakṣiṇa-dvārāya paścimâmnāya-maya-paścima-dvārāyottarâmnāya-mayottara-dvārāya ratna-pradīpa-valayāya maṇi-maya-mahā-siṃhâsanāya brahma-mayaika-mañca-pādāya viṣṇu-mayaika-mañca-pādāya rudra-mayaika-mañca-pādāya īśvara-mayaika-mañca-pādāya sadāśiva-mayaika-mañca-phalakāya haṃsa-tūla-talpāya haṃsa-tūla-mahopadhānāya kausumbhâstaraṇāya mahā-vitānakāya mahā-javanikāyai namaḥ - iti catuścatvāriṃśan-mantrais tat-tad akhilaṃ bhāvayitvā arcayitvā

gandha-puṣpâkṣatâdīṃś ca dakṣiṇa-bhāge dīpān abhito dattvā mūlena cakram abhyarcya mūla-tri-khaṇḍaiḥ prathama-try-asre

vāyv-agni-salila-varṇa-yuk-prāṇâyāmaiḥ śoṣaṇaṃ saṃdahanam āplāvanaṃ ca vidhāya

triḥ prāṇān āyamya

apasarpantu te bhūtā ye bhūtā bhuvi saṃsthitāḥ |
ye bhūtā vighna-kartāras te naśyantu śivâjñayā |
iti vāma-pāda-pārṣṇi-ghāta-karâsphoṭa-samudañcita-vaktras tāla-trayaṃ datvā devy-aham-bhāva-yuktaḥ sva-śarīre vajra-kavaca-nyāsa-jālaṃ vidadhīta

bindu-yuk-śrīkaṇṭhânanta-tārtīyaiḥ madhyamâdi-tala-paryantaṃ kṛta-kara-śuddhiḥ

kumārīm uccārya mahā-tripurasundarī-padam ātmānaṃ rakṣa rakṣeti hṛdaye añjaliṃ dattvā

māyā-kāma-śaktīr uccārya devy-ātmâsanāya namaḥ - iti svasyâsanaṃ dattvā

śiva-yug-bālām uccārya śrī-cakrâsanāya namaḥ - śiva-bhṛgu-yug-bālām uccārya sarva-mantrâsanāya - namo bhuvanā-madanau blem uccārya sādhya-siddhâsanāya namaḥ - iti cakra-mantra-devatā-''sanaṃ tribhir mantraiś cakre kṛtvā

bālā-dvir-āvṛttyā tri-dvy-eka-daśa-tri-dvi-saṅkhyā-'ṅguli-vinyāsaiḥ kḷpta-ṣaḍ-aṅgaḥ

sa-bindūn aco blūm uccārya vaśinī-vāg-devatāyai namaḥ - iti śirasi | sarvatra vargāṇāṃ bindu-yogaḥ | ka-vargaṃ ka-la-hrīṃ ca nigadya kāmeśvarī-vāg-devatāyai namaḥ - iti lalāṭe | cuṃ gaditvā nvlīṃ modinī-vāg-devatāyai namaḥ - iti bhrū-madhye | ṭuṃ bhaṇitvā ylūṃ vimalā-vāg-devatāyai namaḥ - iti kaṇṭhe | tuṃ ca procya jmrīṃ aruṇā-vāg-devatāyai namaḥ - iti hṛdi | puṃ ca hslvyūṃ uccārya jayinī-vāg-devatāyai namaḥ - iti nābhau | yâdi-catuṣkaṃ jhmryūṃ uccārya sarveśvarī-vāg-devatāyai namaḥ - iti liṅge | śâdi-ṣaṭkaṃ kṣmrīṃ ākhyāya kaulinī-vāg-devatāyai namaḥ - iti mūle

mūla-vidyā-pañcadaśa-varṇān mūrdhni mūle hṛdi cakṣus-tritaye śruti-dvaya-mukha-bhuja-yugala-pṛṣṭha-jānu-yugala-nābhiṣu vinyasya ṣoḍhā cakre nyasyânyasya vā

śuddhâmbhasā vāma-bhāge tri-koṇa-ṣaṭ-koṇa-vṛtta-catur-aśra-maṇḍalaṃ kṛtvā puṣpair abhyarcya sâdhāraṃ śaṅkhaṃ pratiṣṭhāpya śuddha-jalam āpūrya ādima-binduṃ dattvā ṣaḍ-aṅgenâbhyarcya vidyayā abhimantrya taj-jala-vipruḍbhiḥ ātmānaṃ pūjopakaraṇāni ca saṃprokṣya

taj-jalena tri-koṇa-ṣaṭ-koṇa-vṛtta-catur-asra-maṇḍalaṃ kṛtvā madhyaṃ vidyayā vidyā-khaṇḍais tri-koṇaṃ bījâvṛttyā ṣaḍ-aśraṃ saṃpūjya vācam uccārya agni-maṇḍa- [107] lāya daśa-kalā-''tmane arghya-pātrâdhārāya namaḥ - iti pratiṣṭhāpya ādhāraṃ prapūjya pāvakīḥ kalāḥ

madanād upari sūrya-maṇḍalāya dvādaśa-kalā-''tmane arghya-pātrāya namaḥ iti saṃvidhāya pātraṃ saṃspṛśya kalāḥ saurīḥ sauḥ soma-maṇḍalāya ṣoḍaśa-kalā-''tmane arghyâmṛtāya namaḥ - iti pūrayitvā ādimaṃ dattvopādima-madhyamau pūjayitvā vidhoḥ kalā-ṣoḍaśakam

tatra vilikhya try-asram a-ka-thâdi-maya-rekhaṃ ha-la-kṣa-yugânta-sthita-haṃsa-bhāsvaraṃ vāk-kāma-śakti-yukta-koṇaṃ haṃsenârādhya bahir vṛtta-ṣaṭ-koṇaṃ kṛtvā ṣaḍ-asraṃ ṣaḍ-aṅgena puro-bhāgâdy abhyarcya mūlena saptadhā abhimantrya datta-gandhâkṣata-puṣpa-dhūpa-dīpaḥ tad-vipruḍbhiḥ prokṣita-pūjā-dravyaḥ sarvaṃ vidyāmayaṃ kṛtvā tat spṛṣṭvā caturnavati-mantrān japet

tritārī-namas-saṃpuṭitāḥ tejas-tritaya-kalā aṣṭatriṃśat |
sṛṣṭi-ṛddhi-smṛti-medhā-kānti-lakṣmī-dyuti-sthirā-sthiti-siddhayo brahma-kalā daśa | jarā pālinī śāntir īśvarī rati-kāmike varadâhlādinī prītir dīrghā viṣṇu-kalā daśa | tīkṣṇā raudrī bhayā nidrā tandrī kṣudhā krodhinī kriyodgārī-mṛtyavo rudra-kalā daśa | pītā śvetā-'ruṇā-'sitāś catasra īśvara-kalāḥ | nivṛtti-pratiṣṭhā-vidyā-śāntîndhikā-dīpikā-recikā-mocikā-parā-sūkṣmā-sūkṣmâmṛtā-jñānā-jñānâmṛtā-pyāyinī-vyāpinī-vyomarūpāḥ ṣoḍaśa sadāśiva-kalāḥ ||
haṃsaś śuci-ṣad vasur antarikṣa-sad dhotā vvedi-ṣad atithir duroṇa-sat |
nṛ-ṣad vara-sad ṛta-sad vayoma-sad ab-jā go-jā ṛta-jā adri-jā ṛtaṃ bṛhat ||
pra tad-viṣṇuḥ stavate vīryeṇa mṛgo na bhīmaḥ ku-caro giri-ṣṭhāḥ |
yasyoruṣu triṣu vikrameṣv adhikṣiyanti bhuvanāni vviśvā ||
tryambakaṃ yajāmahe su-gandhiṃ puṣṭi-vardhanam |
urvārukam iva bandhanān mṛtyor mukṣīya mâmṛtāt ||
tad-viṣṇoḥ paramaṃ padaṃ sadā paśyanti sūrayaḥ |
divîva cakṣur ātatam ||
tad-viprāso vipanyavo jāgṛ-vāṃsaḥ samindhate |
viṣṇor yat paramaṃ padam ||
viṣṇur yoniṃ kalpayatu tvaṣṭā rūpāṇi piṃśatu |
āsiñcatu prajāpatir dhātā garbhaṃ dadhātu te ||
garbhaṃ dhehi sinīvāli garbhaṃ dhehi sarasvati |
garbhaṃ te aśvinau devāv ādhattāṃ puṣkara-srajā ||
ity ete pañca-mantrāḥ ||
mūla-vidyā câhatya caturnavati-mantrāḥ

atha haike pañcabhir akhaṇḍâdyair abhimantraṇam āmananti

akhaṇḍaika-rasânanda-kare para-sudhā-''tmani |
sva-cchanda-sphuraṇam atra nidhehy akula-nāyike ||
akula-sthâmṛtâkāre śuddha-jñāna-kare pare |
amṛtatvaṃ nidhehy asmin vastuni klinna-rūpiṇi ||
tad-rūpiṇy aikarasyatvaṃ kṛtvā hy etat sva-rūpiṇi |
bhūtvā parâmṛtâkārā mayi cit-sphuraṇaṃ kuru ||
iti tisro 'nuṣṭubho vidyāḥ

atho vācaṃ blūṃ jhraum iti jūṃ saḥ - iti coktvā amṛte amṛtodbhave amṛteśvari amṛta-varṣiṇi amṛtaṃ srāvaya srāvaya svāheti caturtho mantraḥ

vāgbhavo vada vada tato vāg-vādini vāṅ-madana-klinne kledini kledaya mahā-kṣobhaṃ kuru-yugalaṃ mādanaṃ śaktir mokṣaṃ kuru kuru śabdo ha-sa-caturdaśa-pañcadaśa-piṇḍaḥ sa-ha-caturdaśa-ṣoḍaśa-piṇḍaś ceti pañcamîyaṃ vidyaitābhiḥ abhimantrya jyotir-mayaṃ tad arghyaṃ vidhāya

tad-bindubhis triśaḥ śirasi guru-pādukām iṣṭvā ārdraṃ jvalati jyotir aham asmi jyotir jvalati brahmâham asmi yo 'ham asmi brahmâham asmi aham asmi brahmâham asmi aham evâhaṃ māṃ juhomi svāheti tad bindum ātmanaḥ kuṇḍalinyāṃ juhuyāt

etad arghya-śodhanam iti śivam