Parameshvara Samhita · Chapter 2

// śrīḥ //
kriyākāṇḍe dvitīyo'dhyāyaḥ
śāṇḍilyaḥ --
athādhikārasiddhyarthaṃ snānaṃ vakṣyāmi pūrvataḥ/
yena bhakto'bhiṣiktastu syādarho yāgahomayoḥ

snānaṃ tu dvividhaṃ kuryānmalasaṃkaraśuddhaye/
sāmānyavidhinā snātvā viśeṣavidhinā tataḥ

sāmānyaṃ laukikaṃ snānaṃ viśiṣṭaṃ mantrasaṃskṛtam/
taccāpi śaucapūrvaṃ syāttadādau kathayāmi te

brāhmaṃ muhūrtamāsādya udayātpūrvameva ca/
mantrajñaḥ prayataḥ kuryādvidhidṛṣṭena karmaṇā

saṃprabuddhaḥ prabhāte tu utthāya śayane sthitaḥ/
nāmnāṃ saṃkīrtanaṃ kuryāt ṣoḍaśānāṃ prayatnataḥ

oṃ namo vāsudevāya namaḥ saṃkarṣaṇāya te (ca)/
pradyumnāya namaste'stu aniruddhāya te namaḥ

kramaśaḥ keśavādīnāṃ yāvaddāmodaraṃ dvija!/
namo namaḥ keśavāya namo nārāyaṇāya ca

mādhavāya namaścaiva govindāya namastataḥ/
viṣṇave'tha namaskuryānnamaste madhusūdana

namastrivikramāyātha vāmanāya namastataḥ/
śrīdharāya namaścātha(ścaiva) hṛṣīkeśāya oṃ namaḥ

namaste padmanābhāya namo dāmodarāya ca/
divyānāmavatārāṇāṃ daśānāmatha kīrtanam

ekaśrṛṅgādikānāṃ tu vihitaṃ kramaśaḥ prabhoḥ/
namaste mīnarūpāya kamaṭhāya namo namaḥ

namo'stvādivarāhāya nārasiṃhāya te namaḥ/
namo vāmanarūpāya namo rāmatrayāya ca

kuṭhārajyāhalāstrāya namaḥ kṛṣṇāya vedhase/
kalki(n‌)viṣṇo namaste'stu pūrvaṃ sapraṇavaṃ dvija!

yathāsthitakrameṇaiva bhedāṃstvetān harervibhoḥ/
namaskuryāt prabhāte tu yāgānte tu dinakṣaye

śabdenoccatareṇaiva saṃhṛ(tu)ṣṭijananena tu/
stotrāṇi cātha mantrāṇi udīryānyāni vai tataḥ

ityevamādibhiḥ stotrairabhiṣṭūya śriyaḥ patim/
idaṃ vijñāpayāmāsa haraye varadāyine

harirharirbruvaṃstalpādutthāya bhuvi vinyaset/
namaḥ kṣitidharāyoktvā vāmapādaṃ mahāmate!

bahirnirgamanārthaṃ tu sañcālyādau tameva hi/
jalasaṃpūrṇapātraṃ ca astramantroddhṛtaṃ mune!

devāgnigirigoṣṭheṣu nadyāṃ vā na śmaśānake/
valmīke mūṣikāsthāne vṛkṣamūle surālaye

jalāntare ca mārge ca na gṛhṇīyāt kadācana/
deśe manorame grāhyā vihāya caturaṅgulam

prāṇyaṅgatuṣabhasmāsthikāṣṭhaloṣṭavivarjitam/
paraśaucāvaśiṣṭaṃ yacchreyaḥkāmaiḥ sadā naraiḥ

anaṅgārāmanūṣārāṃ tathā kṛṣṇāmavālukām/
śastrādinā'strajaptena nikhanecchubhadeśagām

mṛdaṃ doṣavinirmuktāṃ tatastenaiva cāharet/
snānopakaraṇaṃ cānyacchamīśākhāḥ sapallavāḥ

arkanyagrodhakhadirakarañjakakubhādikam/
śarajodumbarāśvatthaplakṣadarbhāṃśca vaiṇavān

āmrāṅkuramapāmārgamarjunaṃ dhātakīṃ śamīm/
anyāni ca pavitrāṇi teṣu saṃpannamāharet

yathāvasarametadvai nṛpavat saṃprayojya ca/
kūpasnānaṃ na kurvīta taṭākādiṣu satsu ca

teṣu nālpodake snāyāttīrtheṣu bahuvāriṣu/
eteṣvapi tu na snāyāt satyāṃ sariti sādhakaḥ

saritsvapi ca sarvāsu viśiṣṭāḥ syuḥ samudragāḥ/
tāsāmapi viśiṣṭāḥ syuḥ sarvāḥ prāksrotasaḥ sadā

nadīnāmapi sarvāsāṃ dakṣiṇaṃ tīramuttamam/
prāksrotasaḥ sravantyastu yatra codaṅmukhasthitāḥ

prāktīraṃ tatra tīrthaṃ syāt sarvapāpapraṇāśanam/
kūpāddaśaguṇā vāpī vāpyā daśaguṇā nadī

nadyāṃ snānaphalaṃ snātustathā tasyāḥ samudragāḥ/
tathā daśaguṇaṃ tasyāḥ prāksrotāḥ kurute phalam

prāksrotasodaṅ‌mukhāyāḥ prāktīre'nantakaṃ phalam/
pūrvaṃ tu kṣālite tīre saṃprokṣya sthāpayet pṛthak

jalasaṃpūrṇapātraṃ ca astramantroddhṛtaṃ mune!/
śaucārthaṃ mṛdamāhṛtya jalakūle nidhāya vai

manorame śucau deśe tṛṇānnikṣipya bhūtale/
divāsandhyāsu karṇasthabrahmasūtra udaṅmukhaḥ

kuryānmūtrapurīṣe tu rātrau ceddakṣiṇāmukhaḥ/
na kuryādbhuvi viṇmūtre saṃbhavaddīrghajantuṣu

na cāpsu na girau cāpi catvareṣu catuṣpathe/
na rājamārge no vīthyāṃ na devāyatane kvacit

na śmaśāne na caitye ca na bhasmani na govraje/
na grāmamadhye viprendra! kurvītāpyanyathāvidhi

ātmacchāyāṃ tarucchāyāṃ na meheta kadācana/
avakuṇṭhyottamāṅgaṃ tu na paśyeddiggaṇaṃ malam

tathā jyotīṃṣyapaśyaṃśca devatāyatanāni ca/
purīṣaṃ gudasaṃyuktaṃ kāṣṭhaparṇatṛṇādibhiḥ

vāmahastena sammārjya tena hastatalena tu/
gṛhītaśiśnaścotthāya jalakūlaṃ samāśrayet

ūrudvayāntarasthena gudaṃ mṛddāyinā'pi ca/
dākṣiṇyajānorbāhyaṃ ca dīyamānajalena ca

vāmena dakṣiṇenaiva pāṇinā kukkuṭāsanī/
aspṛṣṭatīrthaḥ śaucārthaṃ mṛdbhirabhyuddhṛtairjalaiḥ

gandhalepakṣayakaraṃ śaucaṃ kuryādatandritaḥ/
tisro liṅge mṛdo deyā ekaikāntaramṛttikāḥ

pañca vāmakare deyāstisraḥ pāṇyorviśuddhaye/
mūtrotsarge śuddhireṣā purīṣasyāpyanantaram

ardhaprasṛtimātraṃ tu prathamā mṛttikā smṛtā/
dvitīyā ca tṛtīyā ca tadardhā parikīrtitā

biḍālapadamātraṃ tu tadūrdhvā parikīrtitā/
pañcāpāne mṛttikāḥ syustathaivāntaramṛttikāḥ

daśa vāmakare deyāḥ sapta tūbhayahastayoḥ/
pādābhyāṃ tisṛbhiḥ śuddhirjaṅghāśuddhiśca pañcabhiḥ

niyojayettato vipra! kaṭyāṃ vai sapta mṛttikāḥ/
svadehasvedadoṣaghnā bāhyakardamaśāntaye

bhaktānāṃ śrotriyāṇāṃ ca varṣāsvevaṃ nirūpitam/
prāvṛ(ṭ‌sū)ḍuktāttu vai tasmādekamṛdvyapanodanam

śaradgrīṣmavasanteṣu nityaṃ kāryaṃ kriyāparaiḥ/
etasmādapi caikaikā parilopyā tu mṛttikā

hemante śiśire vipra! śrotriyaiḥ saṃyamasthitaiḥ/
pathi śaucaṃ prakartavyaṃ deśakālānurūpataḥ

gandhalepamapāsyaivaṃ manaḥ śuddhyā viśudhyati/
vihitāḥ pādaśauce tu biḍālapadasaṃmitāḥ

mṛdaścaturdvijendrāṇāṃ trirdvirekā kramāttataḥ/
varṇānāṃ śūdraniṣṭhānāṃ kaṭiśauce tathaiva hi

sapta sapta ca ūrubhyāṃ karābhyāṃ tritayaṃ punaḥ/
sarveṣāmeva sāmānyaṃ pāṇiśaucamudāhṛtam

antarjānugataṃ kṛtvā bhujayugmaṃ dvijottama!/
caturdhā maṇibandhasthaṃ toyaṃ kṛtvā sunirmalam

budbudādyairvinirmuktaṃ pibedvipro hṛdā tataḥ/
ekaikāṃ hrāsayenmātrāṃ varṇatrayamanukramāt

pāṇinā kṣālitenaiva punarācāmayedbudhaḥ/
evaṃ prakṣālya vidhivadācamya prayataḥ śuciḥ

prāṅmukhodaṅmukho vā'pi upaviśyāsanaṃ(ne) tataḥ/
arkādibhirapāmārgaiḥ kārayeddantadhāvanam

prātarbhuktvā ca mṛdvagraṃ kaṣāyakaṭutiktakam/
bhakṣayeddantadhavanaṃ dantamāṃsānyabādhayan

dvādaśāṅgulamātraṃ tu vakragranthivivarjitam/
payobhiḥ saha tarjanyā brahma(n‌)dvādaśasaṃkhyayā

kāṣṭhālābhe tu roge vā kartavyaṃ dantadhāvanam/
ṣoḍaśāṅguladīrghaistu vakragranthivivarjitaiḥ

hemādinirmitairvā'pi kuśadarbhādibhistathā/
jihvānirlehanaṃ caiva gaṇḍūṣaṃ mukhadhāvanam

kuryādācamanaṃ vipra! śuddhena salilena ca/
vinā vividhasaṃparkaiḥ pañcāṅgasnānamācaret

mukhaṃ karadvayopetaṃ pādau kaṭitalāvadhi/
strīsaṅgādyupaghāteṣu snānaṃ kuryādyathāvidhi

adhottamāṅgāt pādāntaṃ śirasā'bhyañjayeddvija!/
aṅgānyudvartya cāstreṇa caraṇāntānyanukramāt

gomayena mṛdā vipra! nirmalīkṛtya vigraham/
narāmaraprayuktāṃ prāk snānārthaṃ cāharet khalīm

māṣacūrṇādinā dehaṃ nirhṛtya kavacaṃ smaran/
śuddhyarthaṃ prathamaṃ snātvā mantrasnānaṃ samācaret

snāyādrājopacāreṇa divyairgandhaiḥ purā''hṛtaiḥ/
hṛnmantreṇa ca viprendra! vāmahastatale tataḥ

mṛdā''malakamānena kramaśo'bhinidhāya ca/
prāntaparvāvadhau madhye maṇibandhasamīpataḥ

astramantreṇa mūlena kramāt pañcāṅgamantritam/
kṛtvā niyojya dikṣvapsu sarvāṅgālepanaṃ kramāt

adha ūrdhve ca tanmantraṃ mudrābandhena saṃyutam/
tena snānaharā vighnā digvidikparisaṃsthitāḥ

prayānti vihvalībhūtā yāvattannopasaṃhṛtam/
mṛdbhāgo mūlmantreṇa mantrito yaḥ purā sthitaḥ

tamuccaran samādāya toyamadhye vinikṣipet/
tena tad‌dvijaśārdūla! tatkṣaṇādeva jāyate

gaṅgātoyena saṃpūrṇaṃ yāmunena śubhena ca/
prayāgaṃ cakratīrthaṃ ca prabhāsaṃ puṣkarāṇi ca

bhavanti sannidhībhūtā mantrasyāsya prabhāvataḥ/
tato vai viṣṇutīrthāya mantrānte padamuccaret(ran)

sanamaskaṃ bhavettena viṣṇutīrthasya sannidhau/
anyatīrthe yadā snānaṃ kuryāttatra ca yojayet

kevalaṃ mūlamantraṃ tu viṣṇutīrthapadaṃ vinā/
tīrthāntareṣvidaṃ nāma na saṃkīrtayate sudhīḥ

nityasannidhitīrthasya yadyanyasyābhidhāṃ smaret/
snātasya tatra tīrthaṃ tadabhiśāpaṃ kṣaṇaṃ(ṇāt) sṛjet//
nirjharāmbutaṭākādau sāmānyasnānakarmaṇi/
gaṅgādīnāṃ nadīnāṃ ca tīrthānāṃ ca prakīrtanam

mantrasnānaṃ(na) kramaiḥ samyagviṣṇutīrthāya kīrtayet/
tato'ṅgamantrajaptaṃ ca bhāgaṃ pāṇitale sthitam

toyenāloḍya masṛṇaṃ tāpayedarkaraśmibhiḥ/
meghacchanne svakaṃ mantraṃ sūryavat khasthitaṃ smaret

darśayitvā karau tasya tābhyāṃ sarvā'ṅgakaṃ spṛśet/
apāsya proccaran varma mṛllepaṃ vāriṇā'ṅgagam

darbhapuñjīlamādāya dakṣiṇena kareṇa tu/
jale tvāvartya tanmantraṃ sakṛdvā bahuśo dvidhā

tataḥ kumbhābhiṣekaṃ vā pāṇikumbhodarāmbunā/
sa(saṃ)hitā(kṛdā)vartitenaiva abhiṣekaṃ tu mūrdhani

śrotradṛgvadanaṃ nāsāṃ svakarāṅgulibhiḥ kramāt/
sthagayitvā nimajyātha sāṅgaṃ mantramathoccaran

sakṛdvā bahuśaḥ śaktyā dhyāyejjyotirmayaṃ harim/
devaṃ hṛtpuṣkarāntasthaṃ netrayoratha cāntare

sarvapāpanirāsārthaṃ kṛtvaivamaghamarṣaṇam/
prāṇāyāmaistribhirdvābhyāmekena niyatena vā

samutthāyācaret paścāt sannirīkṣyārkamaṇḍalam/
mantramūrtirmahātejāḥ samuttīrya jalāntarāt

snānavastraṃ parityajya paridhāyāmbarāntaram/
śikhayā'tha śikhābandhaṃ kṛtvā''camya yathāvidhi

aṅguṣṭhamūlaṃ brāhmaṃ tu aṅgulyagraṃ tu daivikam/
paitṛkaṃ hastamadhyaṃ tu tīrthaṃ dakṣiṇahastajam

brāhmeṇa tu pibettoyaṃ paitṛkena tu mārjrayet/
daivikena spṛśedaṅgān yeṣāṃ tṛptiṃ yadīcchati

tridhā caturdhā vā vipra! dvirāmṛjya mukhaṃ punaḥ/
vāmahastatalaṃ prokṣya pādayośca tale śubhe

talena hṛdayaṃ spṛṣṭvā mukhamaṅgulibhistathā/
aṅguṣṭhānāmikāṃ kṛtvā netre spṛṣṭvā ca vāriṇā

tenaiva tarjanīṃ kṛtvā tathā dve nāsikāpuṭe/
kaniṣṭhikāṃ tathā kṛtvā tenaiva śravaṇaṃ spṛśet

tathaiva madhyamāṃ kṛtvā bāhudeśāvubhau spṛśet/
tenaiva nābhideśaṃ ca savairyuktaiḥ śiraḥ spṛśet

etadācamanaṃ proktaṃ sarvakarmasu sarvadā/
sajalaṃ dakṣiṇaṃ hastaṃ kṛtvā ghrāṇāgragaṃ mune!

smaran hṛnmantramāghrāya sandhārya kavacaṃ lapan/
virecya samudīryāstraṃ toyakṣepeṇa vai saha

tatastu hastayordehe nyāsaṃ kuryādyathāga(kra)mam/
hṛdā vāmakare toyamādāya galitaṃ ca tat

vibudhānūrdhvadehasthān hlādayecchikhayā kṣipan/
smarannastraṃ kṣipedbhūmau duṣṭadoṣapraśāntaye

antarāntarayogena hyūrdhvāntaṃ prāgadhastataḥ/
jalāñjalimathādāya sa(sva)mantreṇa hariṃ smaran

sūryamaṇḍalamadhyasthaṃ tarpayettena vāriṇā/
sakuśordhvakaraścātha vinimīlitadṛgjapan

sūryaṃ nirīkṣayenmantraṃ yadardhyeṇārcitaṃ purā/
tatopaviśya santarpya ā(sā)dhārāsanapūrvakam

sāṅgaṃ saparivāraṃ ca mantraṃ tadanu vai kramāt/
indrādīn viṣṇupūrvāṃśca vāsudevādikānapi

mūrtīrdvādaśaśaktīśca paramātmānameva ca/
pṛthivyādīni bhūtāni ṛṣīṃśca pitṛbhissaha

ādau nāma dvitīyāntaṃ tarpayāmīti coccaran/
eṣa mantrastu nirdiṣṭastarpaṇeṣu yathākramam

tilodakaistarpayitvā svapitṝṃśca pitāmahān/
prapitāmahasaṃjñāṃśca sadārānanutarpayet

tarpayetsarvapitṝṇāṃ dakṣiṇābhimukhena tu/
devānāṃ ca tadanyeṣāṃ prāṅmukho vā'pyudaṅmukhaḥ

pavitrakaṃ tyajet paścāt punarācamya mantravit/
sāyaṃ prātardiśo vandyāddhyātvā nārāyaṇaṃ prabhum

karaśuddhisamopetaṃ digbandhaṃ cāvakuṇṭhanam/
prāṇāyāmādikaṃ kuryādbhutaśuddhisamanvitam

mantranyāsaṃ tataḥ kṛtvā mudrāṃ badhvā smareddharim/
jalamadhye'pi yāgasya bhogaiścaivāsanādikaiḥ

tato mantrī samabhyarcya patrapuṣpaphalairvibhum/
saṃbhave sati puṣpāṇāṃ vihitaṃ tatra cārcanam

audakenopacāreṇa bhāvanābhāvitena ca/
tarpayedambhasā prāgvaddhomabhāvanayā'khilam

evaṃ kṛtvā jagannāthaṃ samiddānaṃ samācaret/
juhuyācca yathāśakti tatastilaghṛtādi yat‌

nyūnātiriktaśāntyarthaṃ sarvakarmasamāptaye/
pūrṇāhutyavasānāntaṃ kuryādvai jalatarpaṇe

stutvā ca praṇamedvipra! aṣṭāṅgenātha daṇḍavat/
dūrvāṃ siddhārthakopetāṃ śikhāmantrābhimantritām

cūḍyottamāṅge śirasā upasaṃhṛtya sāsanam/
vācyaṃ jalāt svahṛdvyomni manasā niṣkalātmanā

kṛtvābhigamanaṃ kṛtyaṃ sanyasecca vicakṣaṇaḥ/
kuryādbhogārjanaṃ paścānyāyopāyasamārjitam

mūlena vā'stramantreṇa puṣpamūlaphalādikam/
avapannaṃ tvabhimatamanāptaṃ bhāvadūṣitam

vyāmiśrahīnasaṃspṛṣṭaṃ śuktaṃ līḍhaṃ ca varjayet/
samyak pūrakayuktyā tu dhiyā vācakamuccaran

apāmārgaśamīśākhāyugmaṃ saṃbhrāmya mūrdhani/
savyāpasavyayogena pṛṣṭhato'straṃ paṭhan‌ kṣipet

snānavastraṃ ca niṣpīḍya tataścācamya vāgyataḥ/
ityuktamaudakaṃ snānamatha māntraṃ nibodha me

toyābhāve ca yatkuryāddurge(ṣṭe)kāle tu śītale/
gamane kṣiprasiddhau vā gurukārye'svatantratām

prāptāṃ vā vīkṣya viprendra! niśābhāge dinasya vā/
prakṣālya pādāvācamya proddhṛtena ca vāriṇā

sthānaṃ daśa diśaḥ prāgvat saṃśodhyopaviśettataḥ/
prāṇāyāmagaṇaṃ kuryādbhutaśuddhiṃ tatastanau

mūlamantrāditaḥ kuryāt sarvamantragaṇena tu/
kevalādudakasnānāt saṃskāraparivarjitāt

prayāgādiṣu tīrtheṣu yatphalaṃ kurute dvija!/
snānācchataguṇaṃ tasmānmantrasnānasya sattam!

dhyānasnānamatho vakṣye dvābhyāmapi paraṃ tu yat/
khasthitaṃ puṇḍarīkākṣaṃ mantramūrtiṃ prabhuṃ smaret

tatpādodakajāṃ dhārāṃ patamānāṃ hi mūrdhani/
cintayedbrahmarandhreṇa praviśantīṃ svakāṃ tanum

tayā saṃkṣālayet sarvamantardehagataṃ malam/
tatkṣaṇādvirajā mantrījāyate sphaṭikopamaḥ

dhyānasnānaṃ paraṃ mantrasnānācchataguṇaṃ smṛtam/
sadhyānasnānamityuktaṃ divyasnānādikaṃ śrṛṇu

sahātapena varṣeṇa snānaṃ divyamanantaram/
samidhāṃ dīpitānāṃ ca gomayasya huta(śubha)sya ca

sitena bhasmanā'ṅgeṣu lalāṭādiṣu ca kramāt/
yadūrdhvapuṇḍrakaraṇaṃ mantroccāraṇapūrvakam

dāhanaṃ tu bhavetsnānaṃ śodhanaṃ paramaṃ smṛtam/
gacchatsu goṣu vātotthai rajobhirbhūmisaṃbhavaiḥ

sparśanaṃ vapuṣaḥ snānaṃ vāyavyaṃ tadudāhṛtam/
praśaste parvatāgrādau jātayā śvetamṛtsnayā

uccārya keśavādīni nāmānyaṅge yathākramam/
lalāṭādau yadvidhānamūrdhvapuṇḍrasya tatsa(tkṣa)mam

pārthivasnānamityevaṃ sarvapāpaharaṃ śubham/
tasmādekatamaṃ kāryaṃ snānaṃ śraddhāpareṇa tu

snānācamanaśaucena prāṇāyāmena deśikaḥ/
antarbahiḥ śarīrasya sādhakastu viśudhyati

snānapūrvāḥ kriyāḥ sarvāḥ phalasaṃsiddhihetavaḥ/
tasmātsnānaṃ prakurvīta devarṣipitṛtarpaṇam

iti śrīpāñcarātre pārameśvarasaṃhitāyāṃ kriyākāṇḍe sādhakasnānavidhirnāma
dvitīyo'dhyāyaḥ //