Paippalāda-Saṃhitā · Chapter 6.9

vṛṣāyam aṃśur vṛṣabhāya gṛhyate
vṛṣāyam ugro nṛcakṣase |
divyo naryo 'cikradan
mahan nāmarṣabhasya yat kakut ||

viṣuvān viṣṇo bhava
tvaṃ yo nṛpatir mama |
atho indra iva devebhyo
vi bravītu janebhyaḥ ||

manuṣyebhyo vi bravītu
sajūr indreṇa medinā |
agniś ca tubhyaṃ sāhantyo
rāṣṭraṃ vaiśvānaro dadhat ||

yasyāyaṃ bhāga ṛṣabha
indrāya pariṇīyate |
sa hantu śatrūn āyato
atho hantu parāyataḥ ||

sa hantā śatror bhavatu
hantā bhavatu dodhatām |
viśām aha praṇīr ayad
agram udbhindatām asat ||

āyuṣmantaṃ varcasvantam
atho adhipatiṃ viśām |
asyāḥ pṛthivyāś cettāram
imam indrarṣabhaṃ kṛṇu ||

yaḥ suśṛṅgaḥ sukakudaḥ
kalyāṇo barhir āsadat |
kārṣīvaṇaprajānena
ṛṣabheṇa yajāmahe ||

ṛṣabheṇa yajamānā
akrūreṇeva sarpiṣā |
mṛdhaś ca sarvā indreṇa
pṛtanāś ca sahāmahe ||

yaṃ tubhyaṃ bhāgam ṛṣabhaṃ
devāḥ kevalyaṃ daduḥ |
tena vṛtrāṇi jaṅghanaḥ
śatrūṃś ca jahy āhave ||

jahi śatrūn vi mṛdho nudasva
kṛṣyāḥ saṃbhūto asi vīryāvān |
indrāya bhāgaṃ pari tvā nayāma
urur no loko apṛtanyo astu ||

ghṛtavṛddha ghṛtāhuta
sahasraśṛṅga suṣṭuta |
ghṛtāhavana dīdihi ||

yo ghṛtenābhighārita
ugro jaitrāya tiṣṭhasi |
sa naḥ saṅkāsu pāraya
pṛtanāsāhyeṣu ca ||