પૈપ્પલાદ-સંહિતા · અધ્યાય 6.9

વૃષાયમ્ અંશુર્ વૃષભાય ગૃહ્યતે
વૃષાયમ્ ઉગ્રો નૃચક્ષસે ।
દિવ્યો નર્યો ઽચિક્રદન્
મહન્ નામર્ષભસ્ય યત્ કકુત્ ॥

વિષુવાન્ વિષ્ણો ભવ
ત્વં યો નૃપતિર્ મમ ।
અથો ઇન્દ્ર ઇવ દેવેભ્યો
વિ બ્રવીતુ જનેભ્યઃ ॥

મનુષ્યેભ્યો વિ બ્રવીતુ
સજૂર્ ઇન્દ્રેણ મેદિના ।
અગ્નિશ્ ચ તુભ્યં સાહન્ત્યો
રાષ્ટ્રં વૈશ્વાનરો દધત્ ॥

યસ્યાયં ભાગ ઋષભ
ઇન્દ્રાય પરિણીયતે ।
સ હન્તુ શત્રૂન્ આયતો
અથો હન્તુ પરાયતઃ ॥

સ હન્તા શત્રોર્ ભવતુ
હન્તા ભવતુ દોધતામ્ ।
વિશામ્ અહ પ્રણીર્ અયદ્
અગ્રમ્ ઉદ્ભિન્દતામ્ અસત્ ॥

આયુષ્મન્તં વર્ચસ્વન્તમ્
અથો અધિપતિં વિશામ્ ।
અસ્યાઃ પૃથિવ્યાશ્ ચેત્તારમ્
ઇમમ્ ઇન્દ્રર્ષભં કૃણુ ॥

યઃ સુશૃઙ્ગઃ સુકકુદઃ
કલ્યાણો બર્હિર્ આસદત્ ।
કાર્ષીવણપ્રજાનેન
ઋષભેણ યજામહે ॥

ઋષભેણ યજમાના
અક્રૂરેણેવ સર્પિષા ।
મૃધશ્ ચ સર્વા ઇન્દ્રેણ
પૃતનાશ્ ચ સહામહે ॥

યં તુભ્યં ભાગમ્ ઋષભં
દેવાઃ કેવલ્યં દદુઃ ।
તેન વૃત્રાણિ જઙ્ઘનઃ
શત્રૂંશ્ ચ જહ્ય્ આહવે ॥

જહિ શત્રૂન્ વિ મૃધો નુદસ્વ
કૃષ્યાઃ સંભૂતો અસિ વીર્યાવાન્ ।
ઇન્દ્રાય ભાગં પરિ ત્વા નયામ
ઉરુર્ નો લોકો અપૃતન્યો અસ્તુ ॥

ઘૃતવૃદ્ધ ઘૃતાહુત
સહસ્રશૃઙ્ગ સુષ્ટુત ।
ઘૃતાહવન દીદિહિ ॥

યો ઘૃતેનાભિઘારિત
ઉગ્રો જૈત્રાય તિષ્ઠસિ ।
સ નઃ સઙ્કાસુ પારય
પૃતનાસાહ્યેષુ ચ ॥