Scripture Library

Paippalāda-Saṃhitā · Chapter 6.8

6.8.1

sahasva yātudhānān
sahasva yātudhānyaḥ |
sahasva sarvā rakṣāṃsi
sahamānāsy oṣadhe ||

6.8.2

sahamāne sahasvati
sahanty ahamuttare |
utāham asmi sāsahiḥ
sāsahe vaḥ sadānvāḥ ||

6.8.3

yā sahamānā carasi
sāsahāna ivarṣabhaḥ |
sadānvāghnī rakṣoghnī
sā tvam ugrāsy oṣadhe ||

6.8.4

khele hai lambanastani
naśyetaḥ prāmutaḥ pata |
na tvām avivyacad iha-
-ukṣeva śṛṅgavac chiraḥ ||

6.8.5

asuvāne bahuputre
anantarve mahodari |
pathāsmat satvare tvaṃ
śarkarā bapsatī cara ||

6.8.6

ye 'rāyāś caratha
pākasyecchanta āsutim |
tān agne kṛṣṇavartane
tīkṣṇaśṛṅgodṛṣann ihi ||

6.8.7

ado yad dāru plavate
sindhor madhye apūruṣam |
tad ā rabhasva durhaṇo
tena yāhi parastaram ||

6.8.8

yasyā janitram iṣṭargā
adṛṣṭāḥ krimayaḥ pluṣayaḥ |
tasyai balāsapatnyai
namas kṛṇomi kuṣṭhyai ||

6.8.9

śarvaputre bhavapatni
yātubhrātri sadānve |
tasyāddhi putrān bhrātṝṃś ca
yatra tvā vinayāmasi ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0