Scripture Library

Paippalāda-Saṃhitā · Chapter 6.7

6.7.1

kaśyapaś ca suparṇaś ca
yan marīcyām atiṣṭhatām |
suparṇaḥ pary avāpaśyat
samudre bhūmim āvṛtām ||

6.7.2

yāṃ suparṇaḥ paryapaśyad
antar mahaty arṇave |
tāṃ sūkara tvaṃ māyayā
triḥ samudrād ud ābharaḥ ||

6.7.3

yaṃ samudrād udabharo
bhūmiṃ sūkara māyayā |
saiṣā viṣasya dūṣaṇy
asmai bhavatu bheṣajī ||

6.7.4

acyutā hiraṇyena
yā satye adhitiṣṭhati |
tasyās te viśvadhāyaso
viṣadūṣaṇam ud bhare ||

6.7.5

yasyāḥ kulāyam ity ekā ||

6.7.6

yasyā bhūmyā upajīkā
gṛhaṃ kṛṇvata ātmane |
tasyās te viśvadhāyaso
viṣadūṣaṇam ud bhare ||

6.7.7

yas tvā bhūme 'nvavindad
yas tvā bhūma udābharat |
tayoḥ sahasradhāmann
ahaṃ nāmāni jagrabha ||

6.7.8

yāni ta indro akṛṇod
bhūme nāmāni vṛtrahā |
tāni te babhroḥ saṃ vidma
sehaidhi viṣadūṣaṇī ||

6.7.9

yāni te marutaś cakrur
yāni saptarṣayo viduḥ |
viśva ādityā yāṃ viduḥ
sā bhūmir viṣadūṣaṇī ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0