Paippalāda-Saṃhitā · Chapter 6.3

ko vaḥ paścāt prāvicchāyat
kaḥ puraḥ prākhanat pathaḥ |
yadaita tvaramāṇā
varuṇaprasūtā āpaḥ ||

prajāpatir asṛjata
sa puraḥ prākhanat pathaḥ |
sa u no anv avāsṛjat
tena sṛṣṭāḥ kṣarāmasi ||

punānā āpo bahudhā sravanti -
-imāṃś ca lokān pradiśaś ca sarvāḥ |
punantv asmān duritād avadyān
muñcantu mṛtyor nirṛter upasthāt ||

āpo asmān mātaraḥ sūdayantu
ghṛtena no ghṛtapuvaḥ punantu |
viśvaṃ hi ripraṃ pravahanti devīr
ud id ābhyaḥ śucir ā pūta emi ||

āpo devīr mātaraḥ sūdayiṣṇavo
ghṛtaścuto madhunā saṃ papṛcre |
tā asmabhyaṃ sūrayo viśvam āyuḥ
kṣapa usrā varivasyantu śubhrāḥ ||

udakasyodakatamā
revattamā revatīnām |
śundhantām āpaḥ
śundhantv asmān ||

yūyam āpo vīraśriyo
yūyaṃ sūdayathā śucīn |
yuṣmākam id diśo mahīr
īyante pradiśaḥ pṛthak ||

yūyaṃ mitrasya varuṇasya yonir
yūyaṃ somasya dhenavo madhiṣṭhāḥ |
yuṣmān devīr deva ā kṣiyatīndur
yūyaṃ jinvata brahmakṣatram āpaḥ ||

śaśvad ābhiḥ śāśadānāḥ
śamanānvayāmasi |
āpo viśvasya sūdanīr
yā devā manave dadhuḥ ||

yad dhāvanti punate tad āpo
yat tiṣṭhanti śuddhā it tad bhavanti |
nāsām avadyam avidaṃ na ripraṃ
sanād eva madhunā saṃ papṛcre ||

hiraṇyavarṇāḥ śucayaḥ pāvakāḥ
pra cakramur hitvāvadyam āpaḥ |
śataṃ ca vaḥ prasravaṇeṣu devīḥ
sahasraṃ ca pavitāraḥ punanti ||

tās tādṛśīr brahmāṇaṃ sūdayanty
aṅgoṣṭhyā stotryā jīvadhanyāḥ |
yā viśvasya śucikṛto ayātor
gāva iva payasā sthā sujātāḥ ||

viśvād riprān muñcata sindhavo no
yāny enāṃsi cakṛmā tanūbhiḥ |
indrapraśiṣṭā varuṇaprasūtā
ā siñcatāpo madhv ā samudre ||