પૈપ્પલાદ-સંહિતા · અધ્યાય 6.3

કો વઃ પશ્ચાત્ પ્રાવિચ્છાયત્
કઃ પુરઃ પ્રાખનત્ પથઃ ।
યદૈત ત્વરમાણા
વરુણપ્રસૂતા આપઃ ॥

પ્રજાપતિર્ અસૃજત
સ પુરઃ પ્રાખનત્ પથઃ ।
સ ઉ નો અન્વ્ અવાસૃજત્
તેન સૃષ્ટાઃ ક્ષરામસિ ॥

પુનાના આપો બહુધા સ્રવન્તિ -
-ઇમાંશ્ ચ લોકાન્ પ્રદિશશ્ ચ સર્વાઃ ।
પુનન્ત્વ્ અસ્માન્ દુરિતાદ્ અવદ્યાન્
મુઞ્ચન્તુ મૃત્યોર્ નિરૃતેર્ ઉપસ્થાત્ ॥

આપો અસ્માન્ માતરઃ સૂદયન્તુ
ઘૃતેન નો ઘૃતપુવઃ પુનન્તુ ।
વિશ્વં હિ રિપ્રં પ્રવહન્તિ દેવીર્
ઉદ્ ઇદ્ આભ્યઃ શુચિર્ આ પૂત એમિ ॥

આપો દેવીર્ માતરઃ સૂદયિષ્ણવો
ઘૃતશ્ચુતો મધુના સં પપૃચ્રે ।
તા અસ્મભ્યં સૂરયો વિશ્વમ્ આયુઃ
ક્ષપ ઉસ્રા વરિવસ્યન્તુ શુભ્રાઃ ॥

ઉદકસ્યોદકતમા
રેવત્તમા રેવતીનામ્ ।
શુન્ધન્તામ્ આપઃ
શુન્ધન્ત્વ્ અસ્માન્ ॥

યૂયમ્ આપો વીરશ્રિયો
યૂયં સૂદયથા શુચીન્ ।
યુષ્માકમ્ ઇદ્ દિશો મહીર્
ઈયન્તે પ્રદિશઃ પૃથક્ ॥

યૂયં મિત્રસ્ય વરુણસ્ય યોનિર્
યૂયં સોમસ્ય ધેનવો મધિષ્ઠાઃ ।
યુષ્માન્ દેવીર્ દેવ આ ક્ષિયતીન્દુર્
યૂયં જિન્વત બ્રહ્મક્ષત્રમ્ આપઃ ॥

શશ્વદ્ આભિઃ શાશદાનાઃ
શમનાન્વયામસિ ।
આપો વિશ્વસ્ય સૂદનીર્
યા દેવા મનવે દધુઃ ॥

યદ્ ધાવન્તિ પુનતે તદ્ આપો
યત્ તિષ્ઠન્તિ શુદ્ધા ઇત્ તદ્ ભવન્તિ ।
નાસામ્ અવદ્યમ્ અવિદં ન રિપ્રં
સનાદ્ એવ મધુના સં પપૃચ્રે ॥

હિરણ્યવર્ણાઃ શુચયઃ પાવકાઃ
પ્ર ચક્રમુર્ હિત્વાવદ્યમ્ આપઃ ।
શતં ચ વઃ પ્રસ્રવણેષુ દેવીઃ
સહસ્રં ચ પવિતારઃ પુનન્તિ ॥

તાસ્ તાદૃશીર્ બ્રહ્માણં સૂદયન્ત્ય્
અઙ્ગોષ્ઠ્યા સ્તોત્ર્યા જીવધન્યાઃ ।
યા વિશ્વસ્ય શુચિકૃતો અયાતોર્
ગાવ ઇવ પયસા સ્થા સુજાતાઃ ॥

વિશ્વાદ્ રિપ્રાન્ મુઞ્ચત સિન્ધવો નો
યાન્ય્ એનાંસિ ચકૃમા તનૂભિઃ ।
ઇન્દ્રપ્રશિષ્ટા વરુણપ્રસૂતા
આ સિઞ્ચતાપો મધ્વ્ આ સમુદ્રે ॥