Paippalāda-Saṃhitā · Chapter 6.22

brahmāsya śiro bṛhad asya pṛṣṭhaṃ
vāmadevyam udaram odanasya |
chandāṃsi pakṣau mukham asya satyaṃ
viṣṭārī yajñas tapaso 'dhi jātaḥ ||

anasthāḥ śuddhāḥ pavanena pūtāḥ
śucayaḥ śucīn api yanti lokān |
viṣṭāriṇam odanaṃ ye pacanti
naiṣāṃ śiśnaṃ pra dahati jātavedāḥ ||

naiṣāṃ śiśnaṃ pra dahati jātavedāḥ
svarge loke bahu straiṇam eṣām |
nainān yamaḥ pari muṣṇāti retaḥ ||

āste yama upa yāti devān
saṃ gandharvair madati somyaiḥ |
viṣṭāriṇam odanaṃ ye pacanti
nainān avartiḥ sacate kutaś cana ||

rathī ha bhūtvā rathayāna īyate
pakṣī ha bhūtvāpi divaṃ sam eti |
eṣa yajño vitato vahiṣṭho
viṣṭārī pakvo divam ā sasāda ||

caturaḥ kumbhāṃś caturdhā dadāti
kṣīreṇa pūrṇān udakena dadhnā |
etās tvā kulyā upa yantu viśvataḥ
svarge loke svadhayā pinvamānāḥ ||

ghṛtahradā madhukūlāḥ surodakāḥ
kṣīreṇa pūrṇā udakena dadhnā |
etās tvā kulyā upa yantu viśvahā
svarge loke svadhayā mādayantīḥ ||

puṇḍarīkaṃ kumudaṃ saṃ tanoti
bisaṃ śālūkaṃ śaphako mulālī |
svarge loke svadhayā pinvamānā
upa mā tiṣṭhantu puṣkariṇīḥ samaktāḥ ||

yam odanaṃ pacāmi śraddadhāno
viṣṭāriṇaṃ lokajitaṃ svargam |
sa me mā kṣeṣṭa sadam aśyamāno
viśvarūpā kāmadughā dhenur astu me ||

vṛṣabhaṃ santaṃ saha sūnṛtayā
svarge loke amṛtaṃ duhānam |
ye me putrāḥ pitaraś ca santi
te tvā viṣṭārinn upa sarve sadeyuḥ ||

ya imān yajñān abhi vitaṣṭāra
yasyeme lokāḥ svadhayā samaktāḥ |
ye me pautrā uta ye pitāmahās
tebhyo viṣṭārinn amṛtāni dhukṣva ||

yadi pṛthivīṃ yady antarikṣaṃ
yadi divaṃ devatā vā jagantha |
ye me prapautrāḥ prapitāmahāś ca
te tvā viṣṭārinn anu pra jñeṣur atra ||

svarge loke apsarasa enāñ
jāyā bhūtvopa śerate |
viṣṭāriṇam odanaṃ ye pacanty
asmiṃl loke dakṣiṇayā pariṣkṛtam ||