પૈપ્પલાદ-સંહિતા · અધ્યાય 6.22

બ્રહ્માસ્ય શિરો બૃહદ્ અસ્ય પૃષ્ઠં
વામદેવ્યમ્ ઉદરમ્ ઓદનસ્ય ।
છન્દાંસિ પક્ષૌ મુખમ્ અસ્ય સત્યં
વિષ્ટારી યજ્ઞસ્ તપસો ઽધિ જાતઃ ॥

અનસ્થાઃ શુદ્ધાઃ પવનેન પૂતાઃ
શુચયઃ શુચીન્ અપિ યન્તિ લોકાન્ ।
વિષ્ટારિણમ્ ઓદનં યે પચન્તિ
નૈષાં શિશ્નં પ્ર દહતિ જાતવેદાઃ ॥

નૈષાં શિશ્નં પ્ર દહતિ જાતવેદાઃ
સ્વર્ગે લોકે બહુ સ્ત્રૈણમ્ એષામ્ ।
નૈનાન્ યમઃ પરિ મુષ્ણાતિ રેતઃ ॥

આસ્તે યમ ઉપ યાતિ દેવાન્
સં ગન્ધર્વૈર્ મદતિ સોમ્યૈઃ ।
વિષ્ટારિણમ્ ઓદનં યે પચન્તિ
નૈનાન્ અવર્તિઃ સચતે કુતશ્ ચન ॥

રથી હ ભૂત્વા રથયાન ઈયતે
પક્ષી હ ભૂત્વાપિ દિવં સમ્ એતિ ।
એષ યજ્ઞો વિતતો વહિષ્ઠો
વિષ્ટારી પક્વો દિવમ્ આ સસાદ ॥

ચતુરઃ કુમ્ભાંશ્ ચતુર્ધા દદાતિ
ક્ષીરેણ પૂર્ણાન્ ઉદકેન દધ્ના ।
એતાસ્ ત્વા કુલ્યા ઉપ યન્તુ વિશ્વતઃ
સ્વર્ગે લોકે સ્વધયા પિન્વમાનાઃ ॥

ઘૃતહ્રદા મધુકૂલાઃ સુરોદકાઃ
ક્ષીરેણ પૂર્ણા ઉદકેન દધ્ના ।
એતાસ્ ત્વા કુલ્યા ઉપ યન્તુ વિશ્વહા
સ્વર્ગે લોકે સ્વધયા માદયન્તીઃ ॥

પુણ્ડરીકં કુમુદં સં તનોતિ
બિસં શાલૂકં શફકો મુલાલી ।
સ્વર્ગે લોકે સ્વધયા પિન્વમાના
ઉપ મા તિષ્ઠન્તુ પુષ્કરિણીઃ સમક્તાઃ ॥

યમ્ ઓદનં પચામિ શ્રદ્દધાનો
વિષ્ટારિણં લોકજિતં સ્વર્ગમ્ ।
સ મે મા ક્ષેષ્ટ સદમ્ અશ્યમાનો
વિશ્વરૂપા કામદુઘા ધેનુર્ અસ્તુ મે ॥

વૃષભં સન્તં સહ સૂનૃતયા
સ્વર્ગે લોકે અમૃતં દુહાનમ્ ।
યે મે પુત્રાઃ પિતરશ્ ચ સન્તિ
તે ત્વા વિષ્ટારિન્ન્ ઉપ સર્વે સદેયુઃ ॥

ય ઇમાન્ યજ્ઞાન્ અભિ વિતષ્ટાર
યસ્યેમે લોકાઃ સ્વધયા સમક્તાઃ ।
યે મે પૌત્રા ઉત યે પિતામહાસ્
તેભ્યો વિષ્ટારિન્ન્ અમૃતાનિ ધુક્ષ્વ ॥

યદિ પૃથિવીં યદ્ય્ અન્તરિક્ષં
યદિ દિવં દેવતા વા જગન્થ ।
યે મે પ્રપૌત્રાઃ પ્રપિતામહાશ્ ચ
તે ત્વા વિષ્ટારિન્ન્ અનુ પ્ર જ્ઞેષુર્ અત્ર ॥

સ્વર્ગે લોકે અપ્સરસ એનાઞ્
જાયા ભૂત્વોપ શેરતે ।
વિષ્ટારિણમ્ ઓદનં યે પચન્ત્ય્
અસ્મિંલ્ લોકે દક્ષિણયા પરિષ્કૃતમ્ ॥