Paippalāda-Saṃhitā · Chapter 6.23

nir ṇudaināṃ pra ṇudaināṃ
svān nipadanād adhi |
vibhraṃśam asyai kṛṇmo
vi gṛhair bhraṃśatām asau ||

apāñcaṃ patim ā kurv
adharācīṃ striyaṃ naya |
atīmān daśa parvatān
atīmā nāvyā daśa ||

adharācīm avācīm
atho akuśalāṃ diśam |
vibhraṃśam asyai kṛṇmas
tenaināṃ pra dahāmasi ||

āja nir aja bilaṃ
bilād araṇyam ā kurv
araṇyād araṇaṃ janam |
mṛgām̐ anu pra pātaya
vātasyaināṃ śikhāṃ kuru ||

vātāgre asyā hṛdayaṃ
mano reṣmaṇi dadhmasi |
vibhraṃśam asyai kṛṇmo
vidhvaṃśam āsaktaṃ dame ||

sarvam anu pari plavatām
antarā dyāvāpṛthivī ubhe |
yathānavadhṛtā carād
vṛṣatūlam ivopari ||

aśam asyai vāto vātv
aśaṃ tapatu sūryaḥ |
atho yad annam aśnāti
tad asyai viṣavattaram ||

siṃhas te astu cakṣuṣa ity ekā ||

eṣa vām agnir antarā
sa viṣvañcau vy asyatu |
yathā vāṃ na sahāsaty
uttarasmiṃś canāyuṣi ||

ut pātaya śimidāvati
pra pātaya śimidāvati |
imau vy asya dampatī
pakvaṃ māṃsam ivāsinā ||

meyam asmin patau raṃsta
mo asmiñ chayane sve |
jahātu vasanaṃ svam
ahir jīrṇām iva tvacam ||

yathā mṛtāś ca jīvāś ca-
- asmiṃl loke vyokasaḥ |
evemau dampatī stām
asmiṃl loke vyokasau ||