Paippalāda-Saṃhitā · Chapter 5.32

ye te pāśā varuṇa sapta saptatīs
tredhā tiṣṭhanti viṣitā ruśantaḥ |
sinanti sarve anṛtaṃ vadantaṃ
yaḥ satyavādy ati taṃ sṛjanti ||

iha spaśaḥ pra carantīme asya
sahasrākṣā ati paśyanti bhūmim |
yo 'sya vrataṃ pramināti kaś ca
na sa mucyate varuṇasya pāśāt ||

uteyam asya pṛthivī samīcy
utāsau dyaur bṛhatī dūreantā |
uto samudro varuṇasya kukṣā
utāsminn alpa udake namuktaḥ ||

yas tiṣṭhati manasā yaś ca vañcati
yo nilāyaṃ carati yaḥ pralāyam |
dvau yadyad vadataḥ sanniṣadya
rājā tad veda varuṇas tṛtīyaḥ ||

sarvaṃ tad rajā varuṇo vi caṣṭe
yad antarā rodasī yat parastāt |
saṃkhyātā asya nimiṣo janānām
akṣān na śvaghnī bhuvanā mimīte ||

tvam eva rājan varuṇa
dhartā devānām asi viśvarūpaḥ |
duścarmāstv adhamaḥ piśaṅgo
yaḥ satyāṃ vācam anṛtena hanti ||

yaḥ samāmyo varuṇo yo vyāmyo
yaḥ sandeśyo varuṇo yo videśyaḥ |
yo daivyo varuṇo yaś ca mānuṣaḥ
sarvāṃs tve tān prati muñcāmy atra ||

śatena pāśair varuṇābhi dhehi
mā te mocy anṛtavāṅ nṛcakṣaḥ |
āstāṃ jālma udaraṃ śraṃsayitvā
kośa ivābandhraḥ parikṛtyamānaḥ ||

uto tvat pra pātayaty
uto tvad api nahyati |
uto tvad asvakaṃ kṛtvā
rājā varuṇa īyate ||

ainaṃ chinatti varuṇo
naḍaṃ kaśipune yathā |
mūlaṃ tasya vṛścati
ya enaṃ pramimīṣati ||