Scripture Library

Paippalāda-Saṃhitā · Chapter 5.31

5.31.1

atyāsarat prathamā dhokṣyamāṇā
sarvān yajñān bibhratī vaiśvadevī |
upa vatsaṃ sṛjata vāśyate gaur
vy asṛṣṭa sumanā hiṃ kṛṇoti ||

5.31.2

badhāna vatsam abhi dhehi bhuñjatīṃ
ni dya godhug upa sīda dugdhi |
iḍām asmā odanaṃ pinvamānā
kīlālaṃ ghṛtaṃ madam annabhāgam ||

5.31.3

sā dhāvatu yamarājñaḥ savatsā
sukṛtāṃ pathā prathameha dattā |
atṛṣṭa dattā prathamedam āgan
vatsena gāṃ saṃ sṛja viśvarūpām ||

5.31.4

prathamedam āgan prathamā dattetād
yasmim̐l loke sadya u tvā dadāti |
sainaṃ dheno prathamā pārayāsi
śraddhayā dattā parame vyoman ||

5.31.5

jānīhi sma saṃskṛte dheno gopatiṃ
yas tvā dadāti prathamāṃ svadhānām |
pūrvā hi tatra sukṛtaḥ parehy
athaiṣa aitā jarasaḥ parastāt ||

5.31.6

ati dhenur anaḍvāham
aty anyad vayo akramīt |
ati vatsānāṃ pitaraṃ
ṛṣabhaṃ pratimāsarat ||

5.31.7

jyotiṣmatī sukṛto yāhi sūre
syonās te dheno patayo bhavantu |
sapta tvā sūryā anvātapantu
yamaṃ dhāva māti saraḥ parācīḥ ||

5.31.8

dātre *'mutra mahyaṃ duhānā-
-ubhau lokau bhuñjatī vi kramasva |
iṣam ūrjaṃ dakṣiṇāḥ saṃvasānā
bhagasya dhārām avase pratīmaḥ ||

5.31.9

sahasrāṅgā śataṃ jyotīṃṣy asyā
yajñasya paprir amṛtā svargā |
sā na aitu dakṣiṇā viśvarūpā-
-ahiṃsantīṃ prati gṛhṇīma enām ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0