Scripture Library

Paippalāda-Saṃhitā · Chapter 5.24

5.24.1

samā bhūmiḥ sūryeṇa-
-ahnā rātrī samāvatī |
kṛṇomi satyam ūtaye
arasāḥ santu kṛtvarīḥ ||

5.24.2

yo devāḥ kṛtyāṃ kṛtvā
harād aviduṣo gṛham |
vatso dhārur iva mātaraṃ
taṃ pratyag upa padyatām ||

5.24.3

amā kṛtvā pāpmānaṃ yas
tayānyaṃ jighāṃsati |
aśmānas tasyāṃ dagdhāyāṃ
bahulāḥ phaṭ karikratu ||

5.24.4

sahasradhāman viśikhān
vigrīvāñ chāyayā tvam |
prati sma cakruṣe kṛtyāṃ
priyāṃ priyāvate hara ||

5.24.5

yā cakāra na śaśāka
śaśre pādam aṅgulim |
cakāra bhadram asmabhyam
abhagā bhagavadbhyaḥ ||

5.24.6

anayāham oṣadhyā
sarvāḥ kṛtyā adūṣayam |
yāṃ kṣetre cakrur yāṃ gobhyo
yāṃ vā te puruṣebhyaḥ ||

5.24.7

apāmārgo 'pa mārṣṭu
kṣetriyaṃ śapathāṃś ca mat |
apāha yātudhānyo
'pa sarvā arāyyaḥ ||

5.24.8

apamṛjya yātudhānān
apa sarvā arāyyaḥ |
apāmārga prajayā
tvaṃ rayyā sacasva naḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0