પૈપ્પલાદ-સંહિતા · અધ્યાય 5.24

સમા ભૂમિઃ સૂર્યેણ-
-અહ્ના રાત્રી સમાવતી ।
કૃણોમિ સત્યમ્ ઊતયે
અરસાઃ સન્તુ કૃત્વરીઃ ॥

યો દેવાઃ કૃત્યાં કૃત્વા
હરાદ્ અવિદુષો ગૃહમ્ ।
વત્સો ધારુર્ ઇવ માતરં
તં પ્રત્યગ્ ઉપ પદ્યતામ્ ॥

અમા કૃત્વા પાપ્માનં યસ્
તયાન્યં જિઘાંસતિ ।
અશ્માનસ્ તસ્યાં દગ્ધાયાં
બહુલાઃ ફટ્ કરિક્રતુ ॥

સહસ્રધામન્ વિશિખાન્
વિગ્રીવાઞ્ છાયયા ત્વમ્ ।
પ્રતિ સ્મ ચક્રુષે કૃત્યાં
પ્રિયાં પ્રિયાવતે હર ॥

યા ચકાર ન શશાક
શશ્રે પાદમ્ અઙ્ગુલિમ્ ।
ચકાર ભદ્રમ્ અસ્મભ્યમ્
અભગા ભગવદ્ભ્યઃ ॥

અનયાહમ્ ઓષધ્યા
સર્વાઃ કૃત્યા અદૂષયમ્ ।
યાં ક્ષેત્રે ચક્રુર્ યાં ગોભ્યો
યાં વા તે પુરુષેભ્યઃ ॥

અપામાર્ગો ઽપ માર્ષ્ટુ
ક્ષેત્રિયં શપથાંશ્ ચ મત્ ।
અપાહ યાતુધાન્યો
ઽપ સર્વા અરાય્યઃ ॥

અપમૃજ્ય યાતુધાનાન્
અપ સર્વા અરાય્યઃ ।
અપામાર્ગ પ્રજયા
ત્વં રય્યા સચસ્વ નઃ ॥