Scripture Library

Paippalāda-Saṃhitā · Chapter 5.23

5.23.1

īśānaṃ tvā bheṣajānāṃ
vijeṣāya vṛṇīmahe |
cakre sahasravīryaṃ
sarasvān oṣadhe tvā ||

5.23.2

satyajitaṃ śapathayāvanīṃ
sahamānāṃ punaḥsarām |
sarvāḥ sam ahvy oṣadhīr
ito mā pārayān iti ||

5.23.3

yā śaśāpa śapanena
yā vā gha mūram ādadhe |
yā vā rasasya prāśāya -
- ārebhe tokam attu sā ||

5.23.4

pratīcīnaphalo hi tvam
apāmārga babhūvitha |
sarvān mac chapathām̐ adhi
varīyo yāvayā tvam ||

5.23.5

yac ca bhrātṛvyaḥ śapati
yac ca jāmiḥ śapāti naḥ |
brahmā yan manyutaḥ śapāt
sarvaṃ tan no adhaspadam ||

5.23.6

yāṃ te cakrur āme pātre
yāṃ sūtre nīlalohite |
āme māṃse kṛtyāṃ yāṃ cakrus
tayā kṛtyākṛto jahi ||

5.23.7

duṣvapnyaṃ durjīvitaṃ
rakṣo abhvam arāyyaḥ |
durvācaḥ sarvaṃ durbhūtaṃ
tad ito nāśayāmasi ||

5.23.8

kṣudhāmāraṃ tṛṣṇāmāram
agotām anapatyatām |
apāmārga tvayā vayaṃ
sarvaṃ tad apa mṛjmahe ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0