Scripture Library

Paippalāda-Saṃhitā · Chapter 5.21

5.21.1

dyauś ca naḥ pitā pṛthivī ca mātā-
-agniś ca nṛcakṣā jātavedāḥ |
te takmānam adharāñcaṃ nyañcaṃ
daśāhnam asyantv adhi dūram asmat ||

5.21.2

takman yaṃ te kṣetrabhāgam
apābhajaṃ pṛthivyāḥ pūrve ardhe |
atihāya tam atha no hinassi
grāhiḥ kila tvā grahīṣyati kilāsaśīrṣaḥ ||

5.21.3

takman parvatā ime
himavantaḥ somapṛṣṭhāḥ |
vātaṃ dūtaṃ bhiṣajaṃ no akran
naśyeto maraṭām̐ abhi ||

5.21.4

na tvā striyaḥ kāmayante
na pumāṃsaḥ katame cana |
neha takmakāmyā-
-alpo roditi no mahān ||

5.21.5

mā no hiṃsīr mahato
mā hiṃsīr mahyas tvam |
kumārān babhro mā hiṃsīr
mā no hiṃsīḥ kumāryaḥ ||

5.21.6

yaḥ sākam utpātayasi
balāsaṃ kāsam udrajam |
bhīmās te takman hetayas
tābhi ṣma pari vṛṅdhi naḥ ||

5.21.7

anyakṣetre na ramate
sahasrākṣo 'martyaḥ |
abhūd u prārthas takmā
sa u no mṛḍayiṣyati ||

5.21.8

takman na ta ihāśvā
na gāvo neha te gṛhāḥ |
śakambharasya muṣṭihā
punar gaccha mahāvṛṣān ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0