Paippalāda-Saṃhitā · Chapter 5.19
sahṛdayaṃ sāṃmanasyam
avidveṣaṃ kṛṇomi vaḥ |
anyo anyam abhi haryata
vatsaṃ jātam ivāghnyā ||
anuvrataḥ pituḥ putro
mātrā bhavatu savrataḥ |
jāyā patye madhumatīṃ
vācaṃ vadatu śantivām ||
mā bhrātā bhrātaraṃ dvikṣan
mā svasāram uta svasā |
samyañcaḥ savratā bhūtvā
vācaṃ vadata bhadrayā ||
yena devā na viyanti
no ca vidviṣate mithaḥ |
tat kṛṇmo brahma vo gṛhe
saṃjñānaṃ puruṣebhyaḥ ||
jyāyasvantaś cittino mā vi yauṣṭa
saṃrādhayantaḥ sadhurāś carantaḥ |
anyo anyasmai valgu vadanta eta
samagrā stha sadhrīcīnāḥ ||
samānī prapā saha vo 'nnabhāgaḥ
samāne yoktre saha vo yunajmi |
samyañco 'gniṃ saparyata-
-arā nābhim ivābhitaḥ ||
yena devā haviṣā yajatrā
apa pāpmānam aghnata |
krodhaṃ manyum anṛtaṃ bhāmaṃ
duruktam abhiśocanam
āre yakṣmaṃ ni dadhmasi ||
sadhrīcīnān vaḥ saṃmanasaḥ kṛṇomy
ekaśnuṣṭīn saṃvananena saṃhṛdaḥ |
devā ived amṛtaṃ rakṣamāṇāḥ
sāyaṃprātaḥ susamitir vo astu ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0