પૈપ્પલાદ-સંહિતા · અધ્યાય 5.18

ઉત દેવા અવહિતં
દેવા ઉદ્ ધરતા પુનઃ ।
ઉતો મરિષ્યન્તં દેવા
દૈવાઃ કૃણુથ જીવસે ॥

આ ત્વાગમં શંતાતિભિર્
અથો અરિષ્ટતાતિભિઃ ।
દક્ષં તે ભદ્રમ્ આહાર્ષં
પરા સુવામ્ય્ આમયત્ ॥

દ્વાવ્ ઇમૌ વાતૌ વાત
આ સિન્ધોર્ આ પરાવતઃ ।
દક્ષં તે અન્ય આ વાતુ
પરાન્યો વાતુ યદ્ રપઃ ॥

આ વાત વાહિ ભેષજં
વિ વાત વાહિ યદ્ રપઃ ।
ત્વં હિ વિશ્વભેષજો
દેવાનાં દૂત ઈયસે ॥

ત્રાયન્તામ્ ઇમં દેવાસ્
ત્રાયન્તાં મરુતો ગણૈઃ ।
ત્રાયન્તાં વિશ્વા ભૂતાનિ
યથાયમ્ અગદો ઽસતિ ॥

ઘૃતેન દ્યાવાપૃથિવી
ઘૃતેનાપઃ સમ્ ઉક્ષત ।
ઘૃતેન મુચ્યસ્વૈનસો
યદ્ આત્મકૃતમ્ આરિથ ॥

અયં મે હસ્તો ભગવાન્
અયં મે ભગવત્તરઃ ।
અયં મે વિશ્વભેષજો
ઽયં શિવાભિમર્શનઃ ॥

હસ્તાભ્યાં દશશાખાભ્યાં
જિહ્વા વાચઃ પુરોગવી ।
અનામયિત્નુભ્યાં શંભુભ્યાં
તાભ્યાં ત્વાભિ મૃશામસિ ॥

આપ ઇદ્ વા ઉ ભેષજીર્
આપો અમીવચાતનીઃ ।
આપો વિશ્વસ્ય ભેષજીસ્
તાસ્ તે કૃણ્વન્તુ ભેષજમ્ ॥