Scripture Library

Paippalāda-Saṃhitā · Chapter 5.1

5.1.1

namaḥ piśaṅgabāhvai
sindhau jātāyā ugrāyai |
yo asyai nama it karad
aped asya gṛhād ayat ||

5.1.2

apehi no gṛhebhyo
apehi vatsatantyāḥ |
ātmānam atra rotsyasy
ava roha mahānasāt ||

5.1.3

hā amba suhūtale
atho hai sāmanantame |
putro yas te pṛśnibāhus
tam u tvaṃ sāmanaṃ kṛdhi |
atho duhitaraṃ naptrīm
atho tvaṃ sāmanā bhava ||

5.1.4

bhūtapatir nir ajatv
indraś cetaḥ sadānvāḥ |
gṛhasya budhna āsīnās
tā vajreṇādhi tiṣṭhatu ||

5.1.5

apetetaḥ sadānvā
ahiṃsantīr imaṃ gṛham |
dhenur vātra ya sthāsyaty
anaḍvān verayā saha ||

5.1.6

yā sahamānā carasi
sāsahāna iva rṣabhaḥ |
sadānvāghnīṃ tvā vayaṃ
jaitrāyācchā vadāmasi ||

5.1.7

sahasva no abhimātiṃ
sahasva pṛtanāyataḥ |
sahasva sarvā rakṣāṃsi
sahamānāsy oṣadhe ||

5.1.8

tvaṃ vyāghrān sahase
tvaṃ siṃhām̐ ubhayādataḥ |
makṣāś cit kṛṇvānā madhu
tvaṃ sahasa oṣadhe ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0