Scripture Library

Paippalāda-Saṃhitā · Chapter 4.39

4.39.1

indrasya manve śaśvad yasya manvire
vṛtraghna stomā upa mema āguḥ |
yo dāśuṣaḥ sukṛto havam etā
sa no muñcatv aṃhasaḥ ||

4.39.2

yaś carṣaṇipro vṛṣabhaḥ svarvid
yasya grāvāṇaḥ pravadanti nṛmṇe |
yasyādhvaraḥ saptahotā madacyut
sa no muñcatv aṃhasaḥ ||

4.39.3

ya ugrāṇām ugrabāhur yajur yo
dānavānāṃ balam āsasāda |
yena jitāḥ sindhavo yena gāvaḥ
sa no muñcatv aṃhasaḥ ||

4.39.4

yasya vaśāsa ṛṣabhāsa ukṣaṇo
yasmai mīyante svaravaḥ svarvide |
yasmai śukraḥ pavate brahmaśumbhitaḥ
sa no muñcatv aṃhasaḥ ||

4.39.5

yasya juṣṭiṃ sominaḥ kāmayante
yaṃ havanta iṣuvantaṃ gaviṣṭau |
yasminn arkaḥ śiśriye yasminn ojaḥ
sa no muñcatv aṃhasaḥ ||

4.39.6

ya uttamaḥ karmakṛtyāya jajñe
yasya vīryaṃ prathamasyānubuddham |
yenodyato vajro 'bhyāyatāhiṃ
sa no muñcatv aṃhasaḥ ||

4.39.7

yaḥ saṃgrāmān nayati saṃ yudhe vaśī
yaḥ puṣṭāni saṃsṛjati dvayāni |
staumīndraṃ nāthito johavīmi
sa no muñcatv aṃhasaḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0