પૈપ્પલાદ-સંહિતા · અધ્યાય 4.39

ઇન્દ્રસ્ય મન્વે શશ્વદ્ યસ્ય મન્વિરે
વૃત્રઘ્ન સ્તોમા ઉપ મેમ આગુઃ ।
યો દાશુષઃ સુકૃતો હવમ્ એતા
સ નો મુઞ્ચત્વ્ અંહસઃ ॥

યશ્ ચર્ષણિપ્રો વૃષભઃ સ્વર્વિદ્
યસ્ય ગ્રાવાણઃ પ્રવદન્તિ નૃમ્ણે ।
યસ્યાધ્વરઃ સપ્તહોતા મદચ્યુત્
સ નો મુઞ્ચત્વ્ અંહસઃ ॥

ય ઉગ્રાણામ્ ઉગ્રબાહુર્ યજુર્ યો
દાનવાનાં બલમ્ આસસાદ ।
યેન જિતાઃ સિન્ધવો યેન ગાવઃ
સ નો મુઞ્ચત્વ્ અંહસઃ ॥

યસ્ય વશાસ ઋષભાસ ઉક્ષણો
યસ્મૈ મીયન્તે સ્વરવઃ સ્વર્વિદે ।
યસ્મૈ શુક્રઃ પવતે બ્રહ્મશુમ્ભિતઃ
સ નો મુઞ્ચત્વ્ અંહસઃ ॥

યસ્ય જુષ્ટિં સોમિનઃ કામયન્તે
યં હવન્ત ઇષુવન્તં ગવિષ્ટૌ ।
યસ્મિન્ન્ અર્કઃ શિશ્રિયે યસ્મિન્ન્ ઓજઃ
સ નો મુઞ્ચત્વ્ અંહસઃ ॥

ય ઉત્તમઃ કર્મકૃત્યાય જજ્ઞે
યસ્ય વીર્યં પ્રથમસ્યાનુબુદ્ધમ્ ।
યેનોદ્યતો વજ્રો ઽભ્યાયતાહિં
સ નો મુઞ્ચત્વ્ અંહસઃ ॥

યઃ સંગ્રામાન્ નયતિ સં યુધે વશી
યઃ પુષ્ટાનિ સંસૃજતિ દ્વયાનિ ।
સ્તૌમીન્દ્રં નાથિતો જોહવીમિ
સ નો મુઞ્ચત્વ્ અંહસઃ ॥