Scripture Library

Paippalāda-Saṃhitā · Chapter 4.3

4.3.1

yat te candraṃ kaśyapa rocanāvad
yat saṃhitaṃ puṣkalaṃ citrabhānu |
yasmin sūryā ārpitāḥ sapta sākaṃ
tasmin rājānam adhi vi śrayemam ||

4.3.2

yebhiḥ śilpaiḥ paprathānām adṛṃho
yebhir divam abhyapiṃśaḥ pravidvān |
yebhir vācaṃ puṣkalair avyayas
tena māgne varcasā saṃ sṛjeha ||

4.3.3

yebhiḥ sūrya ātapati pra ketubhir
yebhir agnir dadṛśe citrabhānuḥ |
yebhir āpaś candravarṇā ajinvan
tena māgne varcasā saṃ sṛjeha ||

4.3.4

āyaṃ bhātu pradiśaḥ pañca devīr
indra iva jyeṣṭho bhavatu prajānām |
asmin dhehi puṣkalaṃ citrabhānv
ayaṃ pṛṇātu rajasor upastham ||

4.3.5

anu tvendro 'vatv anu bṛhaspatir
anu tvā somo anv agnir āvīt |
anu tvā viśve avantu devāḥ
sapta rājāno ya udābhiṣiktāḥ ||

4.3.6

anu tvā mitrāvaruṇehāvatām
anu dyāvāpṛthivī oṣadhībhiḥ |
sūryo 'hobhir anu tvāvatu
candramā nakṣatrair anu tvedam āvīt ||

4.3.7

dyauś ca tvā pṛthivī ca pracetasau
śukro bṛhan dakṣiṇā tvā pipartu |
anu svadhā cikitāṃ somo agniḥ
pūṣā tvāvatu savitā savena ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0