Scripture Library

Paippalāda-Saṃhitā · Chapter 4.2

4.2.1

bhūto bhūteṣu paya ā dadhāti
sa bhūtānām adhipatir babhūva |
sa te mṛtyuś carati rājasūyaṃ
sa rājā rājyam anu manyatām idam ||

4.2.2

abhi prehi vīrayasva-
-ugraś cettā sapatnahā |
ā tiṣṭha mitravardhana
tubhyaṃ devā adhi bruvan ||

4.2.3

ātiṣṭhantaṃ pari viśve abhūṣañ
chriyaṃ vasānaś carati svarociḥ |
mahat tad vṛṣṇo asurasya nāma-
-ā viśvarūpo amṛtāni tasthau ||

4.2.4

enā vyāghraṃ pariṣasvajānāḥ
siṃhaṃ hinvanti mahate saubhagāya |
mahiṣaṃ na subhuvas tasthivāṃsaṃ
marmṛjyante dvīpinam apsv antaḥ ||

4.2.5

vyāghro adhi vaiyāghre
vi kramasva diśo mahīḥ |
viśas tvā sarvā ā yantv
āpo divyāḥ payasvatīḥ ||

4.2.6

yā āpo divyāḥ payasā madanti
yā antarikṣa uta pārthivā yāḥ |
tāsāṃ tvā sarvāsām apām
abhi ṣiñcāmi varcasā ||

4.2.7

abhi tvā varcasāsicaṃ
divyena payasā saha |
yathāso mitravardhanas
tathā tvā savitā karat ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0