Scripture Library

Paippalāda-Saṃhitā · Chapter 4.4

4.4.1

stuvānam agna ā naya
yātudhānaṃ kimīdinam |
tvaṃ hi devāntito
hantā dasyor babhūvitha ||

4.4.2

ājyasya parameṣṭhiñ
jātavedas tanūvaśin |
agne taulasya prāśāna
yātudhānān vi lāpaya ||

4.4.3

vi lapantu yātudhānā
atriṇo ye kimīdinaḥ |
athedam agne no havir
indraś ca prati haryatam ||

4.4.4

agniḥ purastād ā yacchatu
prendro nudatu bāhumān |
bravītu sarvo yātumān
ayam asmīty etya ||

4.4.5

paśyāmi te vīryā jātavedaḥ
pra ṇo brūhi yātudhānān nṛcakṣaḥ |
tvayā sarve paritaptāḥ purastād
ā yantu prabruvāṇā upedam ||

4.4.6

ā rabhasva jātavedo
hṛdaḥ kāmāya randhaya |
dūto no agna ut tiṣṭha
yātudhānān ihā naya ||

4.4.7

tvam agne yātudhānān
upabaddhān ihā naya |
athaiṣām indro vajreṇa-
-api śīrṣāṇi vṛścatu ||

4.4.8

idaṃ havir yātudhānān
nadī phenam ivā vahāt |
yadīdaṃ strī pumān akar
iha sa stuvatāṃ janaḥ ||

4.4.9

yātudhānasya somapa
jahi prajāṃ nayasva ca |
ni ṣṭuvānasya pātaya
param akṣy utāvaram ||

4.4.10

ayaṃ stuvāna āgamat
taṃ smota prati haryata |
bṛhaspate vaśe kṛthā
agnīṣomā vi vidhyatam ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0