પૈપ્પલાદ-સંહિતા · અધ્યાય 4.3

યત્ તે ચન્દ્રં કશ્યપ રોચનાવદ્
યત્ સંહિતં પુષ્કલં ચિત્રભાનુ ।
યસ્મિન્ સૂર્યા આર્પિતાઃ સપ્ત સાકં
તસ્મિન્ રાજાનમ્ અધિ વિ શ્રયેમમ્ ॥

યેભિઃ શિલ્પૈઃ પપ્રથાનામ્ અદૃંહો
યેભિર્ દિવમ્ અભ્યપિંશઃ પ્રવિદ્વાન્ ।
યેભિર્ વાચં પુષ્કલૈર્ અવ્યયસ્
તેન માગ્ને વર્ચસા સં સૃજેહ ॥

યેભિઃ સૂર્ય આતપતિ પ્ર કેતુભિર્
યેભિર્ અગ્નિર્ દદૃશે ચિત્રભાનુઃ ।
યેભિર્ આપશ્ ચન્દ્રવર્ણા અજિન્વન્
તેન માગ્ને વર્ચસા સં સૃજેહ ॥

આયં ભાતુ પ્રદિશઃ પઞ્ચ દેવીર્
ઇન્દ્ર ઇવ જ્યેષ્ઠો ભવતુ પ્રજાનામ્ ।
અસ્મિન્ ધેહિ પુષ્કલં ચિત્રભાન્વ્
અયં પૃણાતુ રજસોર્ ઉપસ્થમ્ ॥

અનુ ત્વેન્દ્રો ઽવત્વ્ અનુ બૃહસ્પતિર્
અનુ ત્વા સોમો અન્વ્ અગ્નિર્ આવીત્ ।
અનુ ત્વા વિશ્વે અવન્તુ દેવાઃ
સપ્ત રાજાનો ય ઉદાભિષિક્તાઃ ॥

અનુ ત્વા મિત્રાવરુણેહાવતામ્
અનુ દ્યાવાપૃથિવી ઓષધીભિઃ ।
સૂર્યો ઽહોભિર્ અનુ ત્વાવતુ
ચન્દ્રમા નક્ષત્રૈર્ અનુ ત્વેદમ્ આવીત્ ॥

દ્યૌશ્ ચ ત્વા પૃથિવી ચ પ્રચેતસૌ
શુક્રો બૃહન્ દક્ષિણા ત્વા પિપર્તુ ।
અનુ સ્વધા ચિકિતાં સોમો અગ્નિઃ
પૂષા ત્વાવતુ સવિતા સવેન ॥